42
أيتماس ن يوسف ݣ تمازيرت ن مصر
1 نتّا ئسلا سيدنا يعقوب ئس ئلّا ئمندي ݣ تمازيرت ن مصر، ئنّا يي واراو نّس: «مّاخ ألّيݣ تقّيميم داد لا تمينّايم ئنݣراون؟
2 هاتين سليخ ئس ئلّا ئمندي ݣ تمازيرت ن مصر. دّويات شالاتاخ شا ئمندي حما ؤر نتمتات س بوهيّوف!»
3 داي دّون أيتماس ن سيدنا يوسف س عشرا غر تمازيرت ن مصر أد شيلن ئمندي.
4 ئد بنيامين، ؤماس أشقيق ن سيدنا يوسف، ؤر ت-يوزين سيدنا يعقوب د أيتماس، ئدّخ ئݣود أد-اس ئجرو شا.
أمجماع أمزْوارو ن يوسف د أيتماس
5 داي دّون واراو ن سيدنا يعقوب د ميدّن ياضن غر تمازيرت ن مصر حما أد شيلن ئمندي، ئدّخ ئلّا بوهيّوف ݣ تمازيرت ن كنعان نّاݣ زدغن.
6 يافد لحال سيدنا يوسف أيد ئݣّان أنبّاض ن تمازيرت ن مصر د نتّا أيد ئزّنوزان ئمندي يي ميدّن كول. داي دّاند أيتماس ن سيدنا يوسف أها بندقن دات-اس.
7 غاس يانّاي سيدنا يوسف أيتماس، ياكزتن، ماشان نتّا ئݣا أمّي ؤر تن ئسّين. أها ئسيول أݣّيدسن س واوال ئوعرن ئنّاياسن: «ما زݣ تدّام؟» داي نّاناس: «زݣ تمازيرت ن كنعان حما أنشيل ئمندي».
8 داي ياكز سيدنا يوسف أيتماس، ماشان نيتني ؤر ت-ؤكيزن.
يوسف دا ئتسقسا أيتماس
9 ئشتيد سيدنا يوسف تيويرݣا نّا غيفسن ئوارجا لّيݣ ئمژي أها ئنّاياسن: «كونّي ئشكّامن أيد تݣام، هاتين تدّامد أت تسينم أنسيون نّاݣ-ؤر تلّي لعسّا ݣ تمازيرت».
10 داي نّاناس: «حاشا أسيدي! ندّاد غاس أنشيل ئمندي.
11 كول نّخ نݣا أراو ن يون ؤرݣاز. نكني ديݣنخ لامان أها ؤر نݣي ئشكّامن! ؤر نددّي حما أنسين أنسيون نّاݣ-ؤر تلّي لعسّا ݣ تمازيرت».
12 ئنّاياسن سيدنا يوسف: «ئهي! تدامد بلعاني أت تيسينم أنسيون نّاݣ-ؤر تلّي لعسّا».
13 داي نّاناس: «حاشا أسيدي! نكني أراو ن يون ؤرݣاز، ندّاد زݣ تمازيرت ن كنعان أها نلّا س تناعش ن واوماتن، أمزيّان ديݣنخ ئقّيمن د-ئبّاتنخ، ئد يون ياضن يوشكا».
14 داي ئنّاياسن سيدنا يوسف: «نّيخاون كوني ئشكّامن أيد تݣام!
15 والاينّي دّيخ أد كون ئسينخ ئد ستيت أيدا تّينيم. ؤحقّ فرعون، ؤر تفّيغم سياد أل ديدّو ؤماتون أمژيان غر داد.
16 ئوا أزنات يون زيݣون أد دياوي ؤماتون أمژيان، ئد ويياض أد قّيمن ݣ لحبس أل ئسينخ صّاحت ن واوال نّون، نغد ؤحقّ فرعون غاس ئشكّامن أيد تݣام».
17 داي ئݣرتن ݣ لحبس شراض ن ووسان.
18 ݣ واسّ ويسّ شراض، ئنّاياسن سيدنا يوسف: «ݣات أياد مش ترام أت تقّيميم ݣ تودرت، نكّين يون ؤرݣاز ئتݣدن ربّي.
19 مش ديݣون لامين، أدجات يون زيݣون ݣ لحبس، ئد وياض أد-اوين ئمندي يي لاهل نّسن نّا ئنغا بوهيّوف.
20 هاتين ئلازم أد-يي تاويم ؤماتون أمژيان حما أد ئسينخ صّاحت ن واوال نّون أها ؤر تمتاتم». داي مساسان خف ؤياد.
21 داي ميونان ئنݣراسن: «ستيت، نخضا ݣ-ؤماتنخ، هاتين نانّاي تامارا نّا غيفس ئكّان لّيݣ أل-اخ ئسحوژور أها ؤر تنوي ديكس. أياد أخف مي أخ تجرا لمصيبت-اد.
22 داي ئنّاياسن رأوبين: «ئس ؤر-اون نّيخ أد-ؤر تݣات شا ؤر-ئحلين يي يوسف، أها ؤر غوري تسّغدم؟ دغي، هان أموتل نّس يومژاخ، ئدّخ نكني أيد تينغان».
23 ؤر دمين واوماتن ئس ئسّن سيدنا يوسف ماي تّينين، ئدّخ ئلّا غورس تّرجمان نّا س-ئتفرّازن أوال.
24 داي ئفّغ زّيكسن أها ئدّو غر تّيساع ئقّيم أل ئترو. لّيݣ د ياغول غورسن ئنّاياسن: «دّيخ أد ݣرخ شمعون ݣ لحبس». داي يامژيت ئشرفت دات-اسن.
أعايد ن واراو ن يعقوب غر ئبّاتسن
25 ئنّا سيدنا يوسف يي ئمزلزن نّس أد-اسن عمرن ئخنشيين نّسن س-ئمندي، رارناسن نّقرت نّسن نّا س شيلن ݣ-ئخنشيين نّسن أها وشيناسن لعوين يي ؤبريد. داي ݣين أم ؤينّا سن ئنّا.
26 ݣرين واوماتن ئخنشيين خف ئغيال نّسن أها دون.
27 لّيݣ بدّين ݣيض حما أد نسين، ئكّر يون زيكسن ئرژم أخنشي نّس أد ئوش لعلف يي ؤغيّول نّس داي يوفا نّقرت نّس ݣ-ئمي ن تخنشييت.
28 ئسغوي أها ئنّا يي أيتماس: «هان نّقرت ئنو تاغوليييد، هات ݣ تخنشيت ئنو». داي ݣّدن شايݣان أها قّيمن أل تّينين: «ماتّا ؤياد أخ ئݣا ربّي؟».
29 نتّا ئوضن غر ئبّاتسن ݣ تمازيرت ن كنعان داي قيسناس أينّا غيفسن يارْون أها نّاناس:
30 «أنبّاض ن تمازيرت ن مصر ئسيولاخ س-ؤزعاف. ئݣرا غيفنخ ئس نݣا ئشكّامن، ندّاد حما أنيسين أنسيون نّاݣ-ؤر تلّي لعسّا».
31 داي ننّاياس: «أسيدي! نكني شّرفا أيد نݣا ؤر نݣي ئشكّامن».
32 نلّا س تناعش ن واوماتن أراو ن يون ؤرݣاز، يون يوشكا ئد أمژيان ديݣنخ ئقّيمن د-ئبّاتنخ ݣ تمازيرت ن كنعان.
33 داي ئنّاياخ ؤنبّاض ن تمازيرت: حما أد ئسينخ ئس تݣام شّرفا، أدجات يون زيݣون داد، تاويم ئمندي يي لاهل نّون نّا ئنغا بوهيّوف أها تدّوم،
34 تاويمد ؤماتون أمژيان. س-ؤياد أس دّيخ أد كون ئسينخ ئس تݣام شّرفا ؤر تݣيم ئشكّامن، داي رژمخ يي ؤماتون أها أدجخ كون أت تسّارام ݣ تمازيرت».
35 نتّا بدعن أر خݣّون ئخنشيين نّسن داي يوفا كو يون زّيكسن نّقرت نّس ݣ-ؤخنشي نّس. غاس أنّاين نيتني د-ئبّاتسن تيكمسين ن نّقرت داي ݣّدن عنوݣّا.
36 داي ئنّاياسن سيدنا يعقوب: «هاتين تزلامي أراو ئنو: يوسف د شمعون. دغي، ترام أت تاويم بنيامين! ئوا نكّين أمي تݣّيم تيعقّيدين-اد!»
37 داي ئنّاياس رأوبين: «غاس ݣيت ݣ-ؤمور ئنو. داي مش ؤر-اش تين رّيخ، نغ أراو ئنو سّين».
38 داي ئنّا سيدنا ئعقوب: «ئهي! ممّي ؤغا أݣّيدون ئتمّون شا. هاتين ئمّوت ؤماس أشقيق أها ؤر يي ئقّيم غاس نتّا. داي مش-اس ئجرا شا ݣ-ؤبريد، تدّام أد يي تنغيم س تيخت غر توسر ئنو».