41
تيويرݣا ن فرعون
1 فّير ن سين ن-ئسݣّاسن، ئوارݣا فرعون: أمّي ئبدّا تاما ن واسيف ن النيل،
2 داي يانّاي سبعا ن تفوناسين قوانين ژيلنت فّغند زݣ واسيف. أها قّيمن أل تّاوغنت.
3 ضاراسن، فّغند ألّو زݣ واسيف سبعا ن تفوناسين تيموحال خّانين. أها بدّينت تاما نّسن.
4 داي تّشين تفوناسين تيموحال نّا خانت تيفوناسين قوانين نّا ژيلينت. داي ئفافا فرعون زݣ ؤنودّم.
5 ئعاود فرعون أنودّم أها ئوارݣا ألّو: سبعا ن تايدرين عمّرن أها ژيلنت، مغينت ݣ يوت ن تغانيمت.
6 داي مغينت فّير-اسن سبعا ن تايدرين ؤرانت قّورنت س-ؤشرقي.
7 تّشين تايدرين نّا سديدن تايدرين نّا عمّرن. داي ئفافا فرعون، ياف ئخف نّس غاس لا ئتوارݣا.
8 تيفوت ئكّر فرعون لا ئطيراس، ئغرد يي ئد بوتحرݣا د لعولما ن تمازيرت ن مصر. أها ئقّيساسن تاوارݣيت نّس، والاينّي أود يون ديكسن ؤر ئغي أد-اس ت-ئسّفرو.
9 داي ئنّاياس ؤخاتار ن وينّا دا س ياكّان أد ئسو: «أسيدي هاتين شتيخد أسّ-اد لخضا نو!
10 يون واسّ ئطيراك غيفي نكّين د-ؤخاتار ن-ئخبّازن داي تحبستاخ أسيدي ݣ لحبس ن-ؤخاتار ن-ئعسّاسن.
11 يون ييض، نوارجا نكني سّين يوت ن توارݣيت داي كو تاوارجيت س لمعنا نّس.
12 داي ييلي أݣيدنخ ݣ لحبس يون ؤعرّيم أعبراني زݣ ئسمغان ن-ؤخاتار ن-ئعسّاسن، نقّيساس أينّا نوارجا. داي ئسّفرو يي كو يون زّيݣنخ تاوارجيت نّس.
13 داي ئجروياخ أم ؤينّا ئنّا: نكّين أغولخ س-أنسا نو، ئد أخاتار ن-ئخبّازن ئتّياݣل خف ؤحنيݣ».
فرعون دا ئتغيسا تيويرݣا نّس يي يوسف
14 يازن فرعون أد-اس د-أوين سيدنا يوسف. أها دّون دغيا سّوفغنتيد زݣ لحبس. داي فّير ن ماس كّسن أزّار أها بدّلناس ئعبان. سّكشمنت غر فرعون.
15 داي ئنّا فرعون يي سيدنا يوسف: «وارجاخ يوت ن توارݣيت أها ؤر ئلّي ما غا ت-ئسّفرون، والاينّي سليخ لا تّينين غيفك ئس لا تسّفروياد تيويرجا».
16 داي ئنّاياس سيدنا يوسف: «ؤر-ئد نكّين، ماشان ربّي أغا يينين أسّفرو ئژيلن يي سيدي».
17 داي ئنّا فرعون يي سيدنا يوسف: «أنّايخ ݣ توارجيت ئنو أمّي بدّيخ تاما ن واسيف ن النيل.
18 داي ؤليند زيكس سبعا ن تفوناسين قوانين، ژيلنت، أها قّيمن أل تّاوغنت تاما ن واسيف.
19 شوي هان سبعا ن تفوناسين ضنين تيموحال أها ؤر ژيلنت، ؤليند فّير-اسن. ؤر دجين أنّايخ أم نيتني ݣ لوخّييت ݣ تمازيرت ن مصر.
20 داي تّشين سبعا ن تفوناسين تيمزوورا نّا قوانين.
21 داي واخّا تن تشان ؤر ئبدّيل ؤراعا نّسن أها سولن أم ؤينّا ݣان ݣ تيزويري. داي فافاخ زݣ ؤنودّم.
22 داي وارجاخ يوت ن توارجيت ضنين: أنّايخ سبعا ن تايدرين ژيلنت أها عمّرن. مغينت ݣ يوت ن تغانيمت.
23 داي فّير-اسن مغينت سبعا ن تايدرين ضنين ؤرانت أها قّورنت س-ؤشرقي.
24 داي سّغلين تايدرين-اد تايدرين نّا عمرنين. هاتين قّيسخ تيويرجاياد يي ئد بوتحرݣا، والاينّي ؤر ئغي أود يون أد يي تن ئسّفرو».
يوسف دا ئسّفرو تيويرݣا يي فرعون
25 ئنّا سيدنا يوسف يي فرعون: «أسيدي تيويرݣا نّش سّنات يوت أيد ݣان. هان ربّي ئسّنعتاش أيين غا ئݣ.
26 سبعا ن تفوناسين غودانين د سبعا ن تايدرين عمّرنين ݣانت سبعا ن-ئسݣّاسن. هاتين غاس يوت ن توارݣيت أياد.
27 داي سبعا ن تفوناسين تيموحال ؤر ژيلنت د سبعا ن تايدرين ؤرانت قّورنت س-ؤشرقي ݣانت أود نيتني سبعا ن-ئسݣّاسن، ماشان سبعا ن-ئسݣّاسن ن بوهيّوف.
28 أينّا ش نّيخ أسيدي، ئرا ربّي أد-اش ئسّنعت أيين غا ئݣ.
29 هاتين دّان أد دّون سبعا ن-ئسݣّاسن ن توانت أها يوعدّو لخير ݣ تمازيرت ن مصر.
30 داي دّان أد دّون فّير-اسن سبعا ن-ئسݣّاسن ن بوهيّوف. داي تّون ميدّن كول لخير نّا ئكّان تمازيرت ن مصر أها ئخلو تامازيرت.
31 ئدّا أد-ئوعيرعنوݣّا أها ؤر ئشتّي أود يون توانت نّا ئكّان تامازيرت.
32 هاتين ت تّوعاوداش توارجيت سنات ن لمرات، ئدّخ ئعوّل ربّي أد ئݣ أينّا. أها ئدّا أت ت-ئݣ دغيا.
33 دغي، أد ئرزو سيدي يون ؤرݣاز ئنژّين أها ئوشاس تانباطّ خف تمازيرت ن مصر.
34 ئݣ ئنبدادن خف تمازيرت ن مصر حما أد-أمژن أمور ويسّ خمسا زݣ لغلّات ن سبعا ن-ئسݣّاسن ن لخير.
35 أها سمونن لغلّات ن-ئسݣّاسن ن لخير نّا ديدّان، داي خزنتن ݣ تمدنين دّاو ن تنباطّ نّك.
36 أت تخزنّ أفيد أد أفن أيت تمازيرت ماي تتّان ݣ-ئسݣّاسن ن بوهيّوف ن غا ئكّين تمازيرت ن مصر أها ؤر تمتاتن ميدّن».
37 داي ئعجباس واوال-اد يي فرعون د-ئنبّاضن نّس.
38 داي ئنّاياسن فرعون: «أرݣاز-اد ئعمّر س رّوح ن ربّي! ئد أناف شا ئݣان أم نتّا؟»
39 داي ئنّا فرعون يي سيدنا يوسف: «زݣّوس أش ئسّنعث ربّي أياد كول، ؤر ئلّي أود يون ئنژّين أم شݣّ.
40 شݣّين أغا ئݣين أنباضّ ن تݣلّديت ئنو، ئضاعش شّعب ئنو أها ؤر ئتّيلي ماغ-اش ياݣرن غاس نكّين، ئدّخ ݣيخ أݣلّيد.
41 ها نكّين دغي دا ش أكّاخ تانباطّ خف تمازيرت ن مصر كول».
42 داي ئكّس فرعون تالخاتمت زݣ ؤضاض نّس، ئݣيت ݣ-ؤضاض ن سيدنا يوسف، ئسّلساس ئعبان ن لشتّان أها ئݣاس يوت ن تسّديت تاخاتارت ن دّهب ݣ حنݣي.
43 داي ئسنيت ݣ لكرّيسا ن-ؤرݣاز ويسّين ݣ تݣلّديت. داي قّيمن ئعسّاسن أل تبرّاحن دات-اس: «بندقات!» س-ئمشي أس ئوشا ؤݣلّيد تانباطّ يي سيدنا يوسف خف تمازيرت ن مصر كول.
44 داي ئنّا فرعون يي سيدنا يوسف: «واخّا نكّين أݣّان أݣلّيد! أود يون ؤر ئتݣ شا ؤسكّين مش ؤر-اس تنّيد».
45 داي نتّا ئݣا سيدنا يوسف أنبّاض خف تمازيرت ن مصر. ئبدلاس فرعون ئسم أها ئݣاس "صفنات فعنيح" أها ياولاس ئلّيس ن فوطي فارع أخاتار ن دّين ن تمدينت ن-أون، ئسم نّس أسنات.
سبعا د-ئسݣّاسن ن لخير
46 لّيݣ ئكشم سيدنا يوسف أد ئخدم غر فرعون، تلّا ݣ لعمر نّس تلاتين ن-ؤسݣّاس. داي نتّا ئفّغ زݣ غورس ئدّو أل ئسّارا ݣ تمازيرت ن مصر.
47 داي تورْو تمازيرت شايݣان ن لغلّات ݣ سبعا ن-ئسݣّاسن ن توانت.
48 ئكّر سيدنا يوسف أل ئتجماع لغلّات ن سبعا ن-ئسݣّاسن ن لخير، أر تن ئخزّن. داي كو تامدينت ئخزن ديكس لغلّات ن-ئݣران نّا ت-ئدجاورن.
49 داي ئجمع سيدنا يوسف شايݣان ن لغلّت ألّيݣ ؤر ئقّيم لا ت-ئتحاساب، ئدّخ تعدّا عنوݣا أنشت ن-ؤكژاژ ن لبحر.
أراو ن يوسف
50 داي تورْو أسنات يي سيدنا يوسف سين ن-ئشيرّان دات ن-ئسݣّاسن ن بوهيّوف. a
51 داي ئݣاس يي ومنزو مَنَسَّى لمعنا ن-ئسم-اد: ئتّو، أها ئنّا: «يودجايي ربّي أت تّوخ أخوب نّا غيفي ئكّان د بطّو ن لاهل ئنو».
52 داي ئݣ يي ويسّين أفرايم لمعنا ن-ئسم-اد: لا ئتّارو. أها ئنّا: «ئوشايي ربّي ئشيرّان ݣ تمازيرت نّاݣ غيفي تكّا شايݣان ن تمارا».
سبعا ن-ئسݣّاسن ن بوهيّوف
53 زرين سبعا ن-ئسݣاسن ن توانت ݣ تمازيرت ن مصر.
54 داي بدعن ئسݣّاسن ن بوهيّوف أر تّاوضن أم ؤينّا ئنّا سيدنا يوسف. ياوض بوهيّوف تميزار كول، ماشان تامازيرت ن مصر ئلّا ديكس شايݣان ن لخير.
55 نتّا ييوض لاژ ئمصريين، كرن أر سغويّون غر فرعون ران ماي تتّان. داي ئنّاياسن: «دّويات غر يوسف أها تݣيم أيين غا أون ييني».
56 داي يادر بوهيّوف ݣ تمازيرت كول. داي ئكّر سيدنا يوسف ئرژم يي يحونا أل ئزنوزا ئمندي يي ئمصريين. أها ئزايد بوهيّوف ݣ واسّاس ݣ تمازيرت ن مصر.
57 داي دّاند ميدّن زݣ مايد ئݣّان أنسا غر مصر حما أد شال ئمندي زݣ سيدنا يوسف، ئدّخ ئحرا بوهيّوف ݣ مايد-ئݣّان أدغار.