40
أناݣام د ؤخباز ن فرعون ݣ لحبس
1 داي فّير ن-ؤينّا، ئكّر ؤخاتار ن وينّا دا ياكّان يي وݣلّيد أد-ئسو د-ؤخاتار ن-ئخبّازن عصون فرعون أݣلّيد ن تمازيرت ن مصر.
2 داي ئطيراس عنوݣّا يي فرعون غيفسن
3 أها ئحبستن ݣ لحبس ن-ؤخاتار ن-ئعسّاسن، أدغار نّاݣ-ئݣا سيدنا يوسف أحبّاس.
4 ئوشتن ؤخاتار ن-ئعساسن يي سيدنا يوسف أد ئسّن ئكلّف أينّا كّان ݣ لحبس. داي قّيمن شان لوقت ݣ لحبس.
5 يون ييض، ئوارجا ؤخاتار ن وينّا ياكّان يي ؤݣليد أد-ئسو د-ؤخاتار ن-ئخبّازن ن-ؤݣلّيد يوت ن توارݣيت، داي كو تاوارجيت س لمعنا نّس.
6 تيفوت لّيݣ ديدّا سيدنا يوسف أت تن يانّاي يوفاتنين ئطيراسن.
7 داي ئسقساتن: «مّاخ ألّيݣ غيّرن ؤدماون نّون أسّ-اد؟»
8 داي نّاناس: «ئوارجا كو يون ديݣنخ يوت ن توارݣيت أها ؤر-ئلّي ماغ-اخ تن ئسفرون». داي ئنّاياسن سيدنا يوسف: «ئس ؤر-ئد غاس ربّي أݣ سّفرون تيويرجا؟ ئوا قيساتي ماي توارجام».
يوسف دا ئسفرو تاوارݣيت يي ؤناݣام ن فرعون
9 داي ئقّيس ؤخاتار ن وينّا دا ياكّان يي وݣلّيد أد ئسو تاوارجيت نّس يي سيدنا يوسف. ئنّاياس: «أنّايخ ݣ توارجيت ئنو أمي تلّا داتي يوت ن دّيليت.
10 لّان ديكس شراض ن ئعروشن. نتّا طّيقسن ئغدّوين، تݣا ئلدجيݣن، أها نوان ئزرورن ن واضيل.
11 داي ييلي ؤغرّاف ن فرعون ݣ-ؤفوس ئنو، أر ديكس تژماخ أضيل أها أژضخاست يي وفوس نّس».
12 داي ئنّا سيدنا يوسف يي وخاتار ن وينّا ياكّان يي ؤݣلّيد أد ئسو: «هان مايد ئݣان لمعنا ن توارݣيت نّش: شارض ن ئعروشن: ݣان شارض ن ووسّان.
13 ݣ شارض ن ووسّان ئدّا فرعون أد-اك ئسامح، ئرارك س-أدغار نّش أها أل-اس تاكّاد أغراف أم ؤينّا أر تݣّاد مشحال أياد.
14 ماشان أدّاي تݣد لاباس ݣييي يون لخير هان أد يي تتّود! سيول غيفي يي فرعون حما أد يي ئسّوفغ زݣ لحبس-اد.
15 لاحقّاش ئوينييد س درع زݣ تمازيرت ن-ئعبرانيين، أها أود داد ؤر ݣيخ شا خف مي غا يي ݣرين ݣ لحبس».
يوسف دا ئسّفرو تاوارݣيت يي ؤخباز ن فرعون
16 نتّا يانّاي ؤخاتار ن-ئخبّازن ئس ئژيل ؤسّفرو ن سيدنا يوسف، ئنّاياس: «أنّايخ أود نكّين يوت ن توارجيت: أمّي ؤسيخ شارض ن-ئسويتن ن-ؤغروم أملّال خف ئخف ئنو.
17 داي ئسوي أنافلّا ئعمر س-ؤينّا تحبّالخ كول يي فرعون، والاينّي دّاند ئجضاض أر زّيكس تنقّابن نّيݣ ن-ئخف ئنو».
18 داي ئنّاياس سيدنا يوسف: «هان مايد ئݣان لمعنا ن توارݣيت نّش: شارض ن-ئسويتن ݣان شراض ن ووسّان.
19 ݣ شراض ن ووسّان، ئدّا أد ئبّي فرعون ئخف نّش، ياݣليك غر شا ؤحنيݣ داي نقّبن ئجضاض أكسوم نّك».
20 ݣ واسّ ويسّ شراض، أسّ ن تلاليت ن فرعون، ئكر فرعون ئݣ يوت ن زّردا تاخاتارت يي ئنبّاضن نّس كول أها ئسّوفغد زݣ لحبس أخاتار ن وينّا دا س ياكّان أد-ئسو د-ؤخاتار ن-ئخبّازن.
21 داي ئرار أخاتار ن وينّا دا س ياكّان أد-ئسو س-أدغار نّس حما أد-اس ئتّاژّاض أغرّاف أم لّي.
22 ئد أخاتار ن-ئخبازن ياݣلت خف ؤحنيݣ أم ؤينّا سن ئنّا سيدنا يوسف.
23 والاينّي ئتّو ؤخاتار ن وينّا دا ياكّان يي ؤݣلّيد أد-ئسو سيدنا يوسف أها ؤر غيفس ئسيول يي فرعون.