39
يوسف ݣ تادارت ن فوطيفار
1 سيدنا يوسف نّا ييوين ئعطّارن غر تمازيرت ن مصر، ئسغات يون ؤمصري ئسم نّس فوطيفار، أخاتار ن-ئعسّاسن ن فرعون أݣلّيد ن تمازيرت ن مصر. a
2 ييلي مولانا د سيدنا يوسف أها ئسخرّاس كو لحاشت. داي ئزدغ ݣ تادارت ن فوطيفار.
3 يانّاي فوطيفار ئس ئلّا مولانا د سيدنا يوسف أها ئسخّراس أينّا ئتݣّا كول.
4 ئعجب سيدنا يوسف يي فوطيفار أها ئݣيت د-أنبّاض خف تادّارت نّس د لمال نّس كول.
5 داي زݣ لوقت نّا، ئبارك مولانا تادّارت ن فوطيفار أمصري د لمال نّس د-ئݣران نّس كول ݣ وودم ن سيدنا يوسف.
6 أياد أخف ئݣا فوطيفار أيدّا نّس دّاو ن تنباط ن سيدنا يوسف أها ؤر ئسّين غاس أد ئتّش ئسو.
داي ئݣ سيدنا يوسف زين ݣ تيدّي د وودم.
يوسف د تمطّوطّ ن فوطيفار
7 ضارت ن شا ن لوقت، ئعجباس يي تمطّوطّ ن فوطيفار. أها تنّاياس: «أورا أݣّيدي تݣند!»
8 داي ئنّاياس سيدنا يوسف: «ئهي! سيدي يومن ديݣي، ئوشايي تانباطّ خف لمال نّس كول، ؤغا تيتّاوي ݣ شا ؤسكّين ݣ تادّارت نّس.
9 ؤر ئلّي ما يي يوݣرن ݣ تادّارت-اد أها ؤر يي ئكّيس أود يون ؤسكّين ماعدا شمّين، ئدّخ تݣيد تامطّوطّ نّس. حاشا أد ݣخ لمعصيت-اد تاخاتارت أها عصوخ ربّي.
10 داي تقّيم أر-اس ت تّيني كوياس، ماشان سيدنا يوسف ؤر-ئري أݣّيدس ئݣن.
11 داي يون واسّ، ئكشم سيدنا يوسف أد ئݣ شان لخدمت أها ؤر ئلّي أود يون ݣ تادّارت.
12 داي تامژت تمطّوطّ ن فوطيفار زݣ ؤعبان أر-اس تّيني: «أورا ݣن أݣّيدي»، والاينّي سيدنا يوسف ئزرياس أعبان ݣ-ؤفوس ئرول غر برّا.
13 داي نتّا تانّاي ئس-اس ئزري أعبان ݣ-ؤفوس أها ئرول غر برّا.
14 ترژم يي وغويي تغرد يي ئمزلّزن أها تنّاياسن: «هان ئسمغ أعبراني نّا د ييوي ؤرݣاز ئنو ئتعدا غيفي! أها ئكشم غيري، ئرا أݣيدي ئݣن. داي سغويخ غيفس.
15 نتّا ئسلايي لاسغيّوخ ئزري أعبان نّس داي ئرول غر برّا».
16 داي تادج أعبان ن سيدنا يوسف غورس ألّيݣ ديدّا ؤرݣاز نّس.
17 داي تقّيساس أم ؤينّا تنّا يي ئمزلّزن: «ئسمغ أعبراني نّاخ تيويد، ئكشم غوري أها ئتعدا غيفي.
18 والاينّي غاس سكّرخ ئغويّان، ئزري أعبان نّس أها ئرول غر برّا».
تاݣوري ن سيدنا يوسف ݣ لحبس
19 نتّا ئسلا فوطيفار يي ؤينّا س تقّيس تمطّوطّ نّس خف سيدنا يوسف، داي ئطيراس عنوݣّا. "داي تاغ لعافيت ݣ وول نّس"
20 أها ئكّر يامژ سيدنا يوسف، ئݣريت ݣ لحبس نّاݣ لّان ئحباسن ن-ؤݣلّيد.
21 ماشان ئلّا مولانا د سيدنا يوسف، ئسنعتاس لخير نّس أها ئݣ لحنانيت ݣ وول ن-ؤنبّاض ن لحبس حما أد-يكس ئنهلّا.
22 داي ئوش ؤنبّاض ن لحبس يي سيدنا يوسف تانباطّ خف ئحبّاسن كول د سيدنا يوسف أݣ تّينين يي ئحباسن ماي تݣّان.
23 داي ؤغا تيتّاوي ؤنبّاض ن لحبس ݣ-أود يان ؤسكّين نّا ئلّان دّاو ن تنباطّ ن سيدنا يوسف، ئدّخ ئلّا مولانا أݣّيدس أها ئسّخراس كول أينّا ئتݣّا.