38
يهوذا د واراو نّس
1 ݣ لوقت-اد، ئدّو يهوذا زݣ أيتماس أها ئسرّح غر تمدينت ن عدلام غر يوك ؤرݣاز ئسم نّس حيرا.
2 دينّا، يانّاي يهوذا ئلّيس ن يوك ن-ؤرݣاز أكنعاني ئسم نّس شوع. داي ييليت.
3 داي تورْو يان ؤربا يي يهوذا. أها ئݣاس ئسم: عير.
4 تورْو ألّو يون ؤربا داي تݣاس ئسم: أونان.
5 داي تورْو ديخ ألّو أربا ياضن، لّيݣ ئلّا يهوذا ݣ تمدينت ن كزيب أها تݣاس ئسم: شيلا.
6 نتّا ئمقّور عير أمنزو ن يهوذا، داي ياولاس يوت ن تمطّوطّ ئسم نّس تامار.
7 ماشان ئنغا مولانا عير أمنزو ن يهوذا، ئدّخ ئݣا ئمعصي أخاتار دات ن مولانا.
8 فّير ن لموت ن عير، ئنّا يهوذا يي أونان: «ثسّند ماي غيفش ئلازمن، ئخصّاش أت تاولت تامطّوطّ ن ؤماش أمنزو، ئدّخ تݣيد ألوس نّس حما أد-اس تارْو يون ؤربا». a
9 ماشان أونان ئسّن ئس ؤر دّين ئفراخ أد ݣين وينّس. أياد أخف ؤغا ئتّادجا تامطّوطّ ن-ؤماس أت تاسي أت تارْو أدّاي أݣّيتس ئݣن حما ؤر-ئتݣ ئشيرّان يي ؤماس.
10 ؤر ئعجيب ؤياد ئݣا يي مولانا. أها ئنغيت أود نتّا ديخ ألتو.
11 داي ئنّا يهوذا يي تامار، تامطّوطّ ن ممّيس: «قّيم أت تݣد تادجالت ݣ تادارت ن ئبّام، راجا أل ئمغور شيلا ممّي». ئنّا أياد، ئدّخ ئݣّد أد ئمّت شيلا أود نتّا أم أيتماس. داي تدّو تامار تقّيم ݣ تادارت ن-ئبّاس.
لقيست ن يهوذا د تامار
12 نتّا تزّري شايݣان ن لوقت، تمّت ئلّيس ن شوع، تامطّوطّ ن يهوذا. لّيݣ كملن ووسّان ن ؤسعنا، يالي يهوذا د-ؤمدّاكل نّس حيرا أعدلامي غر ئجلامن ن لمال نّس ݣ تمدينت ن تمنا.
13 داي ياوض ؤنغميس تامار ئس ئدّا ؤمغار نّس غر تمدينت ن تمنا أد ئلس ؤلي نّس.
14 تعلا ئس ئمقور شيلا أها ؤر ديدّي يهوذا أت ت-ئتّر يي ممّيس، داي تكّر تكّس تيلبطّb، تݣ لّتام، تغمس حما ؤر تواسّان. تدّو تقّيم ݣ لباب ن-ؤسون ن عينايم نّا ئلّان ݣ ؤبريد ن تمدينت ن تمنا.
15 داي يانّايت يهوذا أها ئغال ئس تݣا شا ن تمطّوطّ ئفسدن، ئدّخ تغمس يي وودم نّس.
16 ؤر تيوكيز ئد تامطّوطّ ن ممّيس. داي ئعيّنت غر ئميسّي ؤبريد أها ئنّاياس: «دّجيي أݣّيدم ݣنخ». داي تنّاياس: «ماغا يي توشت حما أت تݣند أݣّيدي؟»
17 أها ئنّاياس يهوذا: «أد-ام د أزنخ أمكّارتو زݣ لمال ئنو»، داي تنّاياس: «واخا، ماشان وشيي شان ضمانت c ݣ وانسا نّس أل يي تيتّازند».
18 داي ئنّاياس: «ماتّا لحاشت أغا م وشخ؟» أها تنّاياس تامار: «تالخادن نّاݣ-ئلّا ئسم نّك د سنسل نّس، د تغرييت نّا ئلّان ݣ-ؤفوس نّك». داي ئشاستن، ئݣن أݣّيدس أها تاسي زيكس أر تارْو.
19 داي تدّو غر تادّارت نّس، أها تكّس لتام نّس أها ترس تيلبطّ.
20 ضارت ن ؤينّا، يازند يهوذا أمكارتو د-ؤمداكل نّس حيرا حما أد يامژ ئسكّين نّا ئوشا يهوذا ݣ ضمانت يي تمطّوطّ، ماشان حيرا ؤر تيوفي.
21 داي ئسقسا ميدّن ن وانسا يين: «ماني تامطّوطّ نّا أر ئتغيمان تاما ن-ؤبريد، نّا ئفسدن؟» داي نّاناس: «ؤر تلّي دا أيد ئشت ن تمطّوطّ ئفسدن».
22 أها ياغول غر يهوذا ئنّاياس: «ؤر توفيخ، أود ميدّن ن وانسا يين نّاني: ؤر تلّي داها شان تمطّوطّ ئفسدن».
23 داي ئنّاياس يهوذا: «أدجيت أت تن تاوي، عمّرك أت ترزود حما ؤر نتݣّا تاطّصا. ها نكني نݣا أينّا غيفنخ ئلّان، ؤزنخاس أݣّيك أمكارتو، أها ؤر تّوفيد».
تالاليت ن فارص د زارح
24 ألّيݣ تزري أم شراض ئيّورن، ييوض ؤنغميس يهوذا ئس تفسد تسليت نّس تامار أها تلّا س-ؤديس. داي ئنّاياسن يهوذا: «سّوفغات غر برّا ن تمدينت أها تسغوسمت لا تدّر».
25 ماشان لّيݣ أر ت سّوفوغن، توزن غر يهوذا أمغار نّس، تنّاس: «أرݣاز نّا مي ݣان ئسكّين-اد وينّس أزݣ ؤسيخ أعدّيس، ئوا حقّا تين مي أيد تݣا تالخاتنت-اد د سنسل نّس د تغرييت-اد».
26 داي ياكزتن يهوذا أها ئنّا: «نتّات ؤر ترژي شّرع، نّك أي ت-ئرژان، ئدّخ ؤر ت-ئويلخ يي شيلا ممّي». أها ؤر دجين ئعايد أݣيدس ئݣن.
27 نتّا تيوض لوقت نّاݣ غا تارْو، سّن تمقابلين ئس لان ئكنيون غر تامار.
28 نتّا تومژ أسغون، ئسّوفغد يوك ديكسن أفوس نّس. تاسي تمقابلت ئفيلي أزݣّاغ تكرساست خف ؤفوس نّس أها تنّا: «واد أيد ئفغن د أمزْوارو».
29 نتّا ئرّا أفوس نّس، ئفّغد ؤماس. داي تنّاياس: «ميمشي تݣيد ألّيݣ تفّغد د-أمزْوارو؟» أياد أخف ئݣا ئسم نّس فارص. لمعنا ن فارص: ئفّغد س دّرع.
30 داي فّير-اس ئفّغد ؤماس نّا غر ئلّا ئفيلي أزݣّاغ ݣ-ؤفوس أها ئݣ ئسم نّس زارح. لمعنا ن زاراح: أزݣّاغ.