37
تاوارݣيت ن يوسف
1 ئزدغ سيدنا يعقوب ݣ تمازيرت ن كنعان نّاݣ ئزدغ ئبّاس مشحال أياد.
2 تاد أيد ئݣان لقيست ن تاروا ن سيدنا يعقوب: لّيݣ تلّا ݣ لعمر ن سيدنا يوسف سبعطاعش ن-ؤسݣّاس ئلّا أل ئكسّا لمال نتّا د أيتماس. a داي ئكر سيدنا يوسف أل ئساوال يي ئبّاس خف لفعايل نّا ؤر ئحلين ن أيتماس.
3 أل ئتّيري سيدنا يعقوبb سيدنا يوسف ؤݣار ن واراو نّس كول، ئدّخ ئݣا ممّيس ن توسر نّس. أها ئكر ئعديل-اس يون ن تّشامير أبرباش.
4 غاس أنّاين أيتماس ئس لا ت ئتّيري ئبّاتسن ؤݣار نّسن كول، داي أغولن ؤر ت حميلن أها ؤغا س ساوالن س شا ن واوال ئژيلن.
5 يوت ن لّمرت، ئوارجا سيدنا يوسف يوت ن توارݣيت أها ئكّر ئقّيست يي أيتماس. داي زايدن ؤر تحميلن ألّو ؤݣار.
6 داي ئنّاياسن: «سغدات يي توارݣيت-اد نّا وارجاخ.
7 وارݣاخ أمّي نلّا ݣ-ئݣر أل نتاسّا تادلوين. شوي تكّر تادلا نو تبدّ داي ضورناس تادلوين نّون أها أل-اس تّسجادن».
8 داي نّاناس أيتماس: «مّاخ ئس تريد أت تݣد أݣلّيد؟ ئس تريد أد غيفنخ تنبطّ؟» داي أغولن ؤر تحميلن ؤݣار خف نّيرت ن تيويرجا نّس د-ئواليون نّس».
9 داي ئوارجا سيدنا يوسف يوت ن توارݣيت ياضن أها ئقّيست يي أيتماس ئنّاياسن: «هاتين وارجاخ يوت ن توارݣيت ألّو، وارݣاخ: تافوشت د وايور د حضاعش ن-ئتري سجدن دات-يي».
10 داي ئقّيس تاوارجيت-اد ألّو ئ-يبّاس، والاينّي ئبّاس ئنهرت أها ئنّاياس: «ماي تنّيد؟ ئس-اخ ئخصّا نكين د مايش د أيتماك أد ندّو أها نسجد دات-اش أل أشال».
11 داي حسدنت أيتماس. ماشان ئبّاس ئقيم أل ئتخمام ݣ تويرݣاياد.
لغضر ن أيتماس ن يوسف
12 يون واسّ، دّان أيتماس ن سيدنا يوسف غر تمازيرت ن شكيم حما أد كسين لمال ن-ئبّاتسن
13 داي ئنّا سيدنا يعقوب c يي سيدنا يوسف: «هان أيتماش لا كسان لمال ݣ تمازبرت ن شكيم أورا أك أزنخ غيرسن». داي ئنّاياس سيدنا يوسف: «واخّا أيبّا»
14 داي ئنّاياس: «دّو أت تن تانّايد ئد لاباس غورسن نيتني د لمال داي تاغولد تاويدييد لخبار». داي يازن سيدنا يعقوب سيدنا يوسف زݣ ؤسكار ن حبرون. داي لّيݣ ن ييوض سيدنا يوسف غر تمازيرت ن شكيم.
15 يوشكا ݣ لخلا أها يوفاتيد يون ؤرݣاز، داي ئسقسات، ئنّاياس: «مايدا تورزود؟»
16 داي ئنّاياس سيدنا يوسف: «لا ؤرزّوخ أيتما، ئس ؤر تسّيند ماني دا كسان؟»
17 داي ئنّاياس ؤرݣاز: «هاتين مّوتّين زݣ سيّاد، أها سليخ أسن أل تّينين: "كرتاخ أندّو غر دوتان"». داي ئدّو سيدنا يوسف أد ئرزو أيتماس، أها يافتنين ݣ تمازيرت ن دوتان.
18 نتّا أنّاينت زݣ تّيساع. داي قبل أت تن ياوض، مساسان غيفس أت تنغين.
19 داي ميونّان ئنݣراسن: «هان بوتويرݣا ئدّاد غورّخ.
20 أوريو أت تنّغ أها نݣرت ݣ شا ݣ-ؤنا. داي نيني يي ميدّن: "ئتشات شا ݣ لوحوش، أها نانّاي ئد أد جرون تويرݣا نّس؟"»
21 داي لّيݣ ئسلا رأوبين ئماس أخاتار ن سيدنا يوسف يي ؤياد، ئرا أت ت-ئفوكّا زّيكسن أها ئنّاياسن: «ؤر ت نقّا شا!»
22 داي حما أت ت-ئفوكّا زݣ ئفاسّن نّسن أها ئرارت يي ئبّاس، ئناياسن رأوبين: «أد ؤر نقات روح. غاس ݣرات ݣ وانوياد ݣ لخلا».
23 نتّا ييوض سيدنا يوسف غر أيتماس، أمژنت، كسناس تشامير نّس أبرباش
24 داي ݣرينت ݣ يون وانو وار أمان.
ئزنزي ن يوسف يي ئعطّارن ن أيت مديان
25 داي فير ن-ؤينّا، قّيمن أد تّشين. أها أنّاين يون ؤشبار ن-ئعطّارن نّا ئݣان زݣ أيت إسماعيل، دّاند زݣ تمازيرت ن جلعاد أها عينن تامازيرت ن مصر. ؤسين ئلغمان نّسن ئسوفار د لجاوي د ليدام د رّوايح.
26 داي ئنّاياسن يهوذا: «ماتّا رّبح غيرنخ ئلّان مش نّغا ؤماتنخ أها ننكر لموت نّس؟
27 يوف أت تنزّنز يي يعطّارن ؤلا نسرس ئفاسّن نّخ غيفس، ئدّخ ئݣا ؤماتنخ زݣ ئدامّن نّخ!» داي ݣيناس س رّاي.
28 داي لّيݣ غيرسن قرّبن ئعطّارنd، نزغند واوماتن سيدنا يوسف زݣ وانو أها زّنزيناسنت س عشرين ن-ؤقاريض ن نقّرت. داي ئوينت ئعطّارن e غر تمازيرت ن مصر.
29 داي نتّا ياغولد رأوبين غر أنو، ؤر يوفي سيدنا يوسف، داي ئكّر أل ئفلّي ئعبان نّس.
30 داي ئعايد غر أيتماس أها ئنّاياسن: «ماغا ݣخ دغي؟ هان يوسف ؤرئقّيم ݣ وانو».
31 داي كّرن واوماتن غرسن يي يون ؤمكّارتو أها تّشارن تّشامير ن سيدنا يوسف س-ئدامّن.
32 داي ئوين تّشامير أبرباش يي ئبّاتسن أها نّاناس: «هاتين نوفان تشامير-اد حقّا ئد وين ممّيش، ماد ئهي؟»
33 نتّا ئحقّا ديكس سيدنا يعقوب أها ياكزت داي ئسغوي: «تّشامير ن ممّي أياد! شان لوحش أيت ئݣان د تقّطّيضين أها ئتّشيت».
34 داي ئفلي سيدنا يعقوب ئعبان نّس، ئلس ئعبان ن لحزن. أها ئقّيم أل ئترو خف ممّيس شايݣان ن ووسّان.
35 داي دّاند واراو نّس كول أت تعزّان، ماشان ؤر ئري لعزايت أها ئنّا: «أد مّتخ س-ئمطّاون خف ممّي». داي ئقيم أل غيفس ئترو.
36 ئد ئعطّارن ئوين سيدنا يوسف غر تمازيرت ن مصر أها زّنزينت يي فوطيفار. فوطيفار-اد ئݣا أخاتار ن-ئعسّاسن ن فرعون: أݣلّيد ن تمازيرت ن مصر.