50
أحنض ن لݣنازت ن سيدنا يعقوب
1 داي ئحودر سيدنا يوسف خف ئبّاس ئسّودم-اس ئنير، ئرو غيفس.
2 داي يامر سيدنا يوسف يي ئضبيبن نّس أد ݣين لحنوض يي لݣنازت ن-ئبّاس حما ؤر ديكس تكّرن ئبوخا.
3 داي قّيمن ئضبيبن ربعين ن واسّ ݣ-ؤحنض ن لݣنازت، ؤسّان-اد أسن ئخصّان خف لحساب ن لعاتّ ن-ئمصريين حما أد شمّلن لحنوض. داي رون ئمصريين خف سيدنا يعقوب سبعين ن واسّ.
تانضلت ن سيدنا يعقوب ݣ تمازيرت ن كنعان
4 لّيݣ زرين ووسّان ن مشرضول، ئسيول سيدنا يوسف يي ئمعيوان ن فرعون، ئنّاياسن: «لخير ن غا يي تݣيم، ئنيات يي فرعون:
5 ئسݣالّييي ئبّا أها ئنّايي: "أدّاي مّتخ، نضليي ݣ تنضلت نّا غزيخ ݣ تمازيرت ن كنعان". دغي، عافاك، أدجيي أد دّوخ أد نضلخ ئبّا أها عايدخد».
6 داي ئنّاياس فرعون: «دّو نضل ئبّاش أم ؤينّا س تقاولد».
7 داي ئدّو سيدنا يوسف أد ئنضل ئبّاس، مّون أݣّيدس ميدّن ن فرعون د-ئمزلّزن نّس د-ئخاتارن ن تمازيرت ن مصر
8 د أيت تادّارت نّس كول د-ايتماس د أيت تادّارت ن-ئبّاس أها ؤر زرين ݣ تمازيرت ن جاسان غاس ئفراخ ئمژيّان د لمال.
9 أها ئمّون أݣّيدس ألتو يون ؤشبار أخاتار ن لكرارس د-ئمناين د شايݣان ن لقوم.
10 داي لّيݣ ئوضن أنرار ن أطاد ؤرين يي واسيف ن الاردن، رون غيفس عنوݣّا. أها ئݣاس سيدنا يوسف سبعا ن ووسّان ن لحزن.
11 نتّا أنّاين ئكنعانيين أدجار ن-ؤنرار ن أطاد أياد، نّان: «شايݣان ن لحزن أياد غر ئمصريين». داي ݣين ئسم يي وانسا نّا "آبِلَ مِصْرَايِمَ" (لمعنا نّس: لحزن ن-ئمصريين).
12 داي ݣين واراو ن يعقوب أم ؤينّا سن ئنّا ئبّاتسن.
13 داي ئوينت غر تمازيرت ن كنعان أها نضلنت ݣ-ئفري نّا ئلّان ݣ-ئݣر ن مكفيلا تاما ن ممرا نّا ئسغا سيدنا إبراهيم د-ئݣر زݣ عفرون أحثي حما أت ت-ئݣ د-ئسنضال.
14 فّير ن مايد ئنضل سيدنا يوسف ئبّاس، يغولد غرتمازيرت ن مصر نتّا د-ايتماس د-وينّا أݣّيدس ئمّون كول.
سيدنا يوسف دا ئتݣّا لخير يي أيتماس
15 نتّا أنّاين أيتماس ن سيدنا يوسف ئس ئمّوت ئبّاتسن، داي ميونّان ئنݣراسن: «ئدّا يوسف أد غيفنخ ئسّيك تيعقّيدين نّا غيفس نسّيك».
16 داي أزنن غورس نّاناس: «هان ئبّاش ئزري لوصيت ئنّا:
17 "ها ماغا تنيم يي يوسف: عافاش سامح يي أيتماش، هاتين ݣاناش شايݣان ن لعار. دغي دا زّيك نتتّر أد-اخ تسامحد نكني ئسمغان ن ربّي نّا ئعبد ئبّاك"».a داي يولّا سيدنا يوسف شايݣان لّيݣ ئسلا يي واوال-اد.
18 داي دّاند أيتماس ياضنb داي بندقن دات-اس أها نّاناس: «ئسمغان نّش أيد نݣا».
19 داي ئنّاياسن: «أد ؤر تݣدات شا! ؤر ئد نكّ أيد ئݣان ربّي!
20 لعار نّا يي ترام، ئروراييت ربّي د لخير أم ؤينّا دا تانّايم حما أد-ئسروح تودرت ن شايݣان ن ميدّن.
21 دغي، أد-ؤر تݣدات شا! ها نكّين دّيخ أد-اون أكّاخ أينّا تحدادجام كول، كوني د واراونّون». س-ئواليون-اد أس-ئسّفرح وولاون نّسن.
22 ئقيم سيدنا يوسف د أيت ؤخام نّس د لاهل ن-ئبّاس ݣ تمازيرت ن مصر. أها ييدير ميّا د عشرا ن-ؤسݣّاس.
23 ألّيݣ يانّاي أراو ن واراو ن أفرايم أها ئسّݣم أراو ن ماكير ممّيس ن منسّى.
24 يون واسّ، ئنّا سيدنا يوسف يي أيتماس: «ها نكّين دّجاورخ أد مّتخ، والاينّي ربّي ئدّا أد كون ئعاون أها ئسّوفغكون زݣ تمازيرت-اد. ياويكون غر تمازيرت ن كنعان نّا ئقاول يي لجدودنّخ: إبراهيم د إسحاق د يعقوب».
25 داي ئنّا سيدنا يوسف يي واراو ن يعقوب: «ئدّا ربّي أد كون ئعاون، ئوا ݣالّاتييي ئس تدّام أت تاويم لݣنازت ئنو أݣّيدون زݣ سيا».
لموت ن سيدنا يوسف
26 داي ئمّت سيدنا يوسف ݣ تمازيرت ن مصر لّيݣ تلّا ݣ لعمر نّس ميّا د عشرا ن-ؤسݣّاس. داي ݣين لحنوض يي لݣنازت نّس أم ؤينّا ݣان يي لݣنازت ن بّا نّس أها ݣينت ݣ صّندوق.