35
أعايد ن يعقوب غر بيت إيل
1 يون واسّ، ئنّا ربّي يي يعقوب: «كّر دّو زدغ ݣ بيت إيل أها تبنوديي دينّا يون ؤسغرص، نكين ربّي نّا ش د-ئضهرن لّيݣ ترولد زݣ ؤماش عيسو».
2 داي ئنّا يعقوب يي أيت ؤخام نّس د ويسّ ئلّان أݣّيتس كول: «ݣرات ئد لاصنام نّا غورون ئلّان، تسّزديݣم ئخفاون نّون أها تبدلم ئعبان نون،
3 كراتاخ أندّو غر بيت إيل، أد بنوغ دينّا أسغرص يي ربّي نّا أݣّيدي ئبدّين ݣ واسّ ن تمارا نو أها ييلي أݣّيدي ݣـ-ؤينّا زݣ كّيخ كول».
4 داي وشين يي يعقوب ئد لاصنام كول نّا ئلّان غورسن د تخرصين نّا ئلّان ݣ ئمجّان نّسن. داي ئنضلتن يعقوب دّاو ن-وسكلو ن تاسافت نّا ئلّان تاما ن شكيم.
5 نتّا ݣّودجان، ئوش ربّي تيݣّت يي ئمزداغ ن تمدينين نّا ئلّان تاما نّسن أها ؤر تفارن أراو ن يعقوب.
6 لّيݣ ييوض يعقوب د ميدّن نّا أݣّيدس ئمّون غر تمدينت ن لوز نّا مي تّينين دغي بيت إيل ݣ تمازيرت ن كنعان.
7 ئبنو دينّا يون ؤسغرص داي ئݣ ئسم يي وانسا نّا: ربّي ن بيت إيل، ئدّخ أدغار-اد أݣ-اس ئضهر ربّي لّيݣ ئرول زݣ دات ن-ؤماس.
8 ديبورا، تيسمغتّ نّا ئسّݣمان ريفقا، تمّوت أها تونضل تاما ن بيت إيل دّاو ن-ئشت ن تاسافت، داي زݣ واسّ نّا ئݣا ئسم ن-ودغار نّا: تاسافت ن تالّا. a
ؤفوغ ن ربّي غر يعقوب
9 داي ئفّغد ربّي غر يعقوب ديخ ألّو، فّير ن مايد د-ئعّايد زݣ تمازيرت ن أرام أها ئباركت.
10 داي ئنّاياس ربّي: «ئسم نّش يعقوب. زݣ سيّا غر دات ؤر ئدّي ئسم نّش أد ئݣ يعقوب، ماشان ئدّا أد ئݣ إسرائيل». داي ئݣ ئسم نّس إسرائيل.
11 داي ئنّاياس ربّي ألّو: «نكّ أيد ئݣان ربّي نّا ئغين يي كولشي. تّارو، ئلين غورش شايݣان ن-ئشيرّان أها تݣد ئبّاس ن يوك ن لݣنس د شايݣان ن تقبيلين. ئقّن أد فّغن ئݣلّيدن زݣ تاروا نّش.
12 تامازيرت نّا وشيخ يي إبراهيم د إسحاق شݣ أمي غا ت وشخ د واراو نّش فّير-اش».
13 داي ئدّو ربّي زݣ وانسا نّاݣ-ئسيول يي يعقوب.
14 أها ئصك يعقوب يوت ن ترسل س يان ؤژرو ݣ وانسا نّاݣ-أݣّيدس ئسيول ربّي. أها ئفّرغ غيفس شراب د زيت حما أت تيوش يي ربّي.
15 داي ئݣ يعقوب ئسم يي وانسا نّاݣ-اس ئسيول ربّي: بيت إيل.
تالاليت ن بنامين د لمّوت ن راحيل
16 أها دّون زݣ بيت إيل. ألّيݣ أسن ئقّيم غاس شوي حما أد أوضن غر تمدينت ن-أفراتا، داي تامژ راحيل أسغون حما أت تارو، ماشان توعراس تاروا.
17 نتّا ؤر تفوكّا فيسّاع، تنّاس تمقابلت: «أد-ؤر تݣد شا! ئدّخ أود واد لعيل أݣّا».
18 داي لّيݣ أر تسوفوغ رّوح، تݣاس ئسم: «بن أوني» لمعنا ن-ئسم-اد: ممّيس ن مكرضول، ئد ئبّاس ئسمّاياس «بنيامين» لمعنا ن-ئسم-اد: أربا نّا غر ئلا لخير.
19 داي تمّت راحيل أها تّونضل تاما ن-ؤبريد ن تمدينت ن أفراتا، نّا ئݣان دغي بيت لحم.
20 داي ئݣ يعقوب يوت ن تمنزيت خف تنضلت نّس، تيمنزيت-اد دا تسنعات تانّل ن راحيل زݣ تورلي أل أسّ-اد.
21 أها ئݣّادج يعقوبb، داي ئصك أخام نّس فّير ن لبرج ن عدر. c
22 داي لّيݣ ئسول ئزدغ ݣ تمازيرت-اد ئكر رأوبين ئݣن د بلها، تامطّوطّ ن ئبّاس. أها ياوض لخبار يعقوب.
ئشيرّان ن يعقوب.
داي يارو يعقوب تناعش ن-ؤربا:
23 هان أراو نّا س تورْو لايا: رأوبين: أمنزو ن يعقوب د شمعون د لاوي د يهوذا د يسّاكر د زبولون.
24 هان أراو نّا س تورْو راحيل: يوسف د بنيامين.
25 هان أراو نّا س تورْو بلها، تيسمغت ن راحيل: دان د نفتلي.
26 هان أراو نّا س تورْو زلفا، ثيسمغث ن لايا: جاد د أشير. ويدّ أيد-ئݣّان أراو ن يعقوب نّا غيرس ئلالن ݣ تمازيرت ن أرام.
لموت ن إسحاق
27 أها ئدّود يعقوب غر إسحاق ئبّاس نّا ئزدغن ݣ ممرا طّرف ن قرية أربع، نّا ئݣان أسّ-اد تامدينت ن حبرون، ماني ݣ-ئݣا إبراهيم أغريب نتّا د إسحاق.
28 داي ييلي ݣ لعمر ن إسحاق ميّا د تمانين ن-ؤسݣّاس.
29 أها ئمّت، ياويت ربّي أم لجدود نّس فّير ن مايد ئزّري شايݣان ن-ئسݣّاسن ݣ دّونيت. أها نضلنت واراو نّس عيسو د يعقوب.