34
شكيم دا ئسخسار دِينَا ئليس ن يعقوب
1 يون واسّ، تفّغ دِينَا ئلّيس ن يعقوب نّا س تورْو لايا، حما أت تميوسّان د تشيرّاتين ن تمازيرت.
2 داي يانّايت شكيم ممّيس ن شّيخ ن تمازيرت حمور أحويِّ، داي ياويتّ ئجن أݣّيدس س دّرع أها ئسخسرت.
3 ماشان تعجباس دِينَا ئلّيس ن يعقوب، ييريت عنوݣّا أها ئسيولاس س تايري حما أت تيري أود نتّات.
4 داي ئنّا شكيم يي ئبّاس حمور: «تّريي تاربات-اد، رّيخ أت تيليغ».
5 فّير ن-ؤينّا، ئسلا يعقوب ئس ئسّخسر شكيم دِينَا. ئد ئشيرّان نّس يافاتنيد لحال كسان لمال نّس ݣ-ئݣر. ئفستا يعقوب ألّيݣ دّ-يوضن.
6 داي ئدّود حمور ئبّاس ن شكيم غر يعقوب حما أد-اس ئسيول.
7 نتّا دّاند واراو ن يعقوب زݣ ئݣر، سلين يي ؤينّا ئجران، ؤرأسن ئعجيب لحال أها ئطيراسن عنوݣّا. شكيم ئݣا لفضاحت يي أيت إسرائيل، ئدّخ ئسخسر تاربات ن يعقوب، هان أياد ؤغا ئتواݣّا.
8 داي ئنّاياسن حمور: «شكيم، ممّي، ئرا ئلّيتون س-وول نّس، عافاون وشاتاست أت تݣ تامطّوطّ نّس.
9 تݣيماخ د-ئضولان، توشيماخ ئسّيتون، نوشاويت ئسّيتنخ.
10 أها تزدغم أݣّيدنخ، هان تامازيرت دات-اون قّيمات ديكس أت تݣيم لبيع ؤشرّا أها تسغيم تيميزار».
11 داي ئنّا شكيم يي يعقوب د أيتماس ن دِينَا: «مش يي ترام، أد وشخ أينّا يي تتّرم،
12 ن صّداق د-ؤروكو، غاس وشاتييي تاربات أت تاولخ».
13 داي عوّلن واراو ن يعقوب أد غضرن شكيم د-ئبّاس حمور، ئدّخ ئسخسر شكيم ؤلتماتسن دِينَا،
14 نّاناسن: «ؤر نتيغي أنوش ؤلتماتنخ يي يون ؤرݣاز ؤر ئزيّين، ئدّخ ئݣا غورنخ لعيب.
15 مش ترام أنݣ أينّا خ تتّرم ئخصّاويت أت تزيّنم ئوتمان نّون كول حما أد ݣين أم نكني.
16 داي نوشاون ئسّيتنخ أها توشيماخ ئسّيتون، داي نزدغ أݣّيدون، أها نݣ يوت ن تقبيلت.
17 داي مش ؤر تريم أت تزيّنم، أناوي ؤلماتنخ a أها ندّو ئبردان نّخ».
18 داي ئعجباس واوال-اد يي حمور د ممّيس شكيم.
19 داي ؤر-ئماضل شكيم نّا مي ئمقّور وادّور غر أيت ؤخام نّس، أد ئݣ أينّا س نّان واراو ن يعقوب، ئدّخ دا ئتّيري دِينَا شايݣان.
20 داي ئدّود حمور د ممّيس شكيم غر لباب ن تمدينت نّاݣ تمّون أيت تمدينت أها نّاناسن:
21 «ميدّن-اد ديكسن لامين، دجاتن أد زدغن ݣ تمازيرت نّخ ݣين ديكس لبيع ؤشرّا، ها تامازيرت توسع عنوݣّا دات-اسن أد ݣين أينّا ران، أناول يي ئفراخ نّخ تيشيرّاتين نّسن نوشاسن تيشيرّاتين نّخ.
22 والاينّي ؤر رّين أݣيدنخ زدغن أها نݣ يوت ن تقبيلت غاس مش زيّن ئوتمان نّخ أم وينسن.
23 مش نمساسا أݣّيدسن دان أد زدغن أݣّيدنخ أها ئدّا لمال نّسن د لخير نّسن د لبهايم نّسن أد ݣين وينّخ».
24 داي ݣين س رّاي يي حمور د ممّيس شكيم كول ويسّ حضرين ݣ لباب ن تمدينت. أها زيّن كول ئوتمان ن تمدينت.
25 داي ݣ واسّ ويسّ شراض، لا ئسول ديكسن لحر ن-ؤزيّن، كّرن سين زݣ واراو ن يعقوب: شمعون د لاوي أيتماس ن دِينَا، ياسي كو يوك تافروت نّس، b دّون غر تمدينت س-ؤخزّون، نغين ماݣّان أوتم،
26 أها نغين أود حمور د ممّيس شكيم. داي أوين دِينَا زݣ تادارت ن شكيم دّون ئبردان نسن.
27 داي فّير ن-ؤينّا، دّاند أيتماتسن ن ضنيني، ئدّخ تّوسخسر ؤلتماتسن، كشّضن ئمتّين أها حوّصن كول أينّا ئلّان ݣ تمدينت:
28 ئوين ؤلّي د تغطّن د-ئزݣار د-ئغيال، كول أينّا ئلّان ݣ تمدينت د-ؤينّا ئلّان ݣ-ئݣران.
29 داي أوين أود ئسكّين نّسن كول د-ئشيرّان نّسن كول د تعيّالين نّسن أها حوّصن أينّا ئلّان ݣ تيدّار.