33
أمجماع ن يعقوب د عيسو
1 فّير ن-ؤينّا، ئهزّا يعقوب ألّن نّس، يانّاي زݣ تّيساع عيسو ئدّاد أها ئمّوند د ربع ميّا ن-ؤرݣاز. داي ئبضو ئشيرّان خف لايا د راحيل د تسمغين سّنات.
2 ئݣ تيسمغين د واراو نّسنت زݣ دات، ئستابعاسن لايا د واراو نّس، ئݣ راحيل د يوسف فّير-اسن.
3 داي ئزري نتّا دات-اسن، كّود ئتدّو ئتبنداق أل أشال ألّيݣ ئبندق سبعا ن تيلمرّات. نتّا ئدّجاور غر ؤماس عيسو،
4 داي يازلد عيسو ئنّالتيد، ئݣراس ئغيل داي ئسّودميت عنوݣا، أها قّيمن أل ترون سّين نّسن.
5 ئهزّا عيسو ألّن نّس يانّاي تيعيّالين د-ئفراخ داي ئنّاياس: «ماي مسين ويد أݣيك لّانين؟» ئنّاياس يعقوب: «ئشيرّان-اد، لباراكا نّا ئوشا ربّي يي يسمغ نّك».
6 حادّزند تسمغين سّنات د واراو نّسنت أها بندقن دات ن عيسو.
7 داي تحادّزد ألّو لايا د-ئفراخ نّس أها بندقن. فّير ن-ؤينّا ئحادّزد يوسف د راحيل داي بندقن.
8 داي ئنّاياس عيسو: «مّاخ ألّيݣ يي ن توزند لمال-اد كول نّا د مي مناقّارخ ݣ-ؤبريد؟» ئنّاياس يعقوب: «حما أد ئݣي ئفرّج سيدي».
9 داي ئنّاياس عيسو: «غوري شايݣان ن لمال، أوما أدّج أيدّا نّك غورش».
10 أها ئنّاياس يعقوب: «أراح، عافاش، مش غورك عزّخ عنوݣّا، أمژ لهديت نّا ك-ؤزنخ. لّيݣ عليخ ؤدم نّش أمّي ژريخ ؤدم ن ربّي، ئدّخ غيفي تحنّاد.
11 عافاش، أمژ لهديت نّا ك-ؤزنخ، ئدّخ ئوشايي ربّي شايݣان ن لخير، أها غوري أينّا حدادجاخ كول». داي ئݣا تامسّومانت يي عيسو ألّيݣ يومژ لهديت.
12 داي ئنّاياس عيسو: «كراخ أنݣّادج، دّيخ أݣّيك مّونخ».
13 ماشان يعقوب ئنّاياس: «تسّند أسيدي ئس يي مژيين ئفراخ د وولّي د-ئزݣار نّا غوري ئلّان دا سّوطوضن. داي مش نوسّ غيفسن ݣ توادا يون ن واسّ، دّان أد خلون كول.
14 عافاش أسيدي دّو داتي، ئد نكّين ئسمغ نّك دّيخ أد دّوخ س تّاويل خف لحساب ن لمال د-ئفراخ، أل كين أوضخ أسيدي غر تمازيرت ن سعير».
15 أها ئنّاياس عيسو: «دّيخ أد-اك زريخ ئتس زݣ ئرݣزن ئنو». داي ئنّاياس يعقوب: «مّاخ؟ باراكا غيفي أسيدي غاس أرحاب نّا ئسّي ترحبد».
16 داي ئعّايد عيسو ݣ واسّ نّا غر تمازيرت ن سعير.
17 ئد يعقوب ئݣّودجا غر تمازيرت ن سكّوت، داي ئبنو ئغرم يي يخف نّس د-ينولان يي لمال، خف ؤياد دا س تّينين يي وانساياد: سكّوت، لمعنا ن-ئسم-اد ئنولان.
أزدّوغ ن يعقوب ݣ تمدينت ن شكيم
18 داي ئݣّادج يعقوب زݣ تمازيرت ن سكّوت، ئدّو غر تمازيرت ن كنعان أها ئزدغ تاما ن تمدينت ن شكيم، ئمكي أس د ياغول يعقوب ݣ لمان زݣ تمازيرت ن أرام.
19 ئسغ يون ؤنقّال ن واشال نّاݣ ئصكا تاخامت نّس زݣ واراو ن حمور، ئبّاس ن شكيم س ميّا ن ؤقلعي ن نقّرت.
20 ئبنو دينّا يون ؤسغرص ئݣاس ئسم "إيل، ربّي نّا ئتعباد إسرائيل".