32
1 ئد يعقوب ئتامّا ݣ-ؤبريد نّس، نّالنتيد لمالايكات ن ربّي.
2 داي ئنّا يعقوب لّيݣ تن يانّاي: «لقشلا ن لعسكر ن ربّي أياد!» أها ئݣاس يي وانساياد ئسم ن محنايم، لمعنا ن-ئسم-اد: لقشلات سّين.
أسّيفض ن-ئمازان ن يعقوب غر عيسو
3 داي يازن يعقوب ئمازان دات-اس غر عيسو ؤماس، غر لعواري ن سعير نّا ئلّان ݣ تمازيرت ن أدوم.
4 أها ئوصّاتن، ئنّاياسن: «ئنياتاس يي سيدي عيسو: دا ش ئتّيني ئسمغ نّش يعقوب: "ݣيخ أغريب غر لابان أها قيمخن غورس أر دغي.
5 هات غوري ئزݣار د-ئغيال د وولي د-ئسمغان د تسمغين. داي أزنخاكن ئمازان أد-اك ت-ئنين أسيدي حما أد-ئسّي ترحبد"».
6 داي عّايدند ئمازان غر يعقوب أها نّاناس: «دا نيوضن غر ؤماك عيسو، هات ئدّاد أود نتّا أݣّيك ئمجماع أها لّان أݣيدس ربع ميّا ن-ؤرݣاز».
7 ئݣّد يعقوب عنوݣّا، داي ئبضو ميدّن نّا ئلّان أݣّيدس د وولّي د-ئزݣار د-ئلغمان خف سنات ن تربّاع.
8 أها ئنّا ݣ-ئخف نّس: «مش ئهجم عيسو خف تربيعت تامزياروت، أت تروح تيسّنات».
تاژاليت ن يعقوب
9 أها ئنّا يعقوب: «أمولانا: ربّي نّا أر-ئتعباد ئبّا حنيني إبراهيم د ونّا دا ئتعباد ئبّا إسحاق، كي أيي ئنّان: "عايد غر تمازيرت نّش د لهل نّش داي ݣخاش لخير"،
10 نكّ ؤر ستاهلخ لخير نّا يي تݣيد أها ؤر تتود أينا تقاولد يي ئسمغ نّش. ئدّخ لّيݣ نضوخ أسيف-اد ن لأرْدُن ؤرغوري غاس تاغرييت-ئنو، دغي لّان غوري سنات ن تربيعين.
11 عافاك، فوكّايي زݣ عيسو ؤما، ئدّخ ݣّدخ زّيكس أد-يينغ نكّين د تعيّالين د واراو.
12 هاتين شݣّ أيي ئنّان: "ستيت، دّيخ أد-اش ݣخ لخير، سّوعدّوخ أراونّش أنيت ن رّملا ن لبحر أها ؤر ئتيغي أود يون أت تيحاسب، ئدّخ تعدّا"».
لهديت ن يعقوب يي عيسو
13 داي ئنس ئض نّا ديهس، أها ئكّر ئستي زݣ ؤينّا غورس ئلّان لهديت ن غا ئوش يي عيسو ؤماس
14 لّان ديكس: ميتاين ن تاغاطّ د عشرين ن-ؤبرّيض، ميتاين ن تيخسي د عشرين ن-ؤحولي،
15 تلاتين ن تلغمت ئسّوطوضن د وراو نّس، ربعين ن تفوناست د عشرا ن-يوݣاون، عشرين ن تغيّولت د عشرا ن-ئغيال.
16 ئوشتن يي ئسمغان نّس، ئݣ كو أقضيع ئويلّ نّس. أها ئنّا يي ئسمغان نّس: «زريات داتي أها تادجيم شوي ن تّيساع ئنݣر ن-ئقضيعن».
17 داي ئوصّا ئسمغ أمزݣارو أها ئنّاياس: «أدّاي أݣّيك ئجمع عيسو ؤما أها ئسقساك: "مايمي تݣيد وينّس؟ ماني غر تدّيد؟ وين مي أݣّا لمال-اد نّا تنّهد؟"
18 داي تينيداس: "وين ئسمغ نّك يعقوب، لهديت-اد يوزنتّيد يي سيدي عيسو. هات لا ئدّاد فّيراخ"».
19 أها ئوصّا ألّو ويسّين، د ويسّ شراض د كول ويسّ تنّهنين ئقضيعن، ئنّاياسن: «أم واوال-اد أغا تينيم يي عيسو أدّاي أݣّيدس تمجماعم.
20 أها تينيم-اس ألّو: "هاش ئسمغ نّش يعقوب لا ئدّاد فيراخ!"» ئنّا يعقوب ݣ-ئخف نّس: "أداس عديلخ لخاطر س لهدييت-اد ئدّان داتي، حما أدّاي أݣّيدس مجماعخ، بار أد-ييسامح".
21 س واكي أس تدّا لهدييت دات-اس، ئد نتّا ئنسا ݣ-ئخامن نّاݣ-ئزدغ.
يعقوب دا ئتّݣ تاموغژيل د شا
22 داي ئكر ݣّيض نّا، ياوي تيعيّالين نّس سّنات د تسمغين نّس سّنات د-ئشيرّا نّس س حضاعش أها ئزّريثن زݣ ؤساكا ن واسيف ن يبوق.
23 داي لّيݣ تن ئسّنضو نيتني د ؤينّا غورس ئلّان كول،
24 ئقّيم غاس نتّا، شوي ئفّغد غيرس يان ن-ؤرݣاز، أر أݣّيدس ئتّݣ تاموغژيل ألّيݣ ئفّو لحال.
25 لّيݣ ئعلا ؤرݣاز ئس ؤر ئرّي يعقوب، ئوتّ غر سّمغور ن-ؤقرميم نّس أها ئسّلغژمت.
26 داي ئنّاياس: «رژم زيݣي، هان لحال دا ئفو». ماشان يعقوب ئنّاياس: «ؤغا ش تنورژومخ أل يي تباركد».
27 داي ئسقاسات ؤرݣاز، ئنّاياس: «ميسم نّش؟» ئنّاياس: «ئسم ئنو يعقوب».
28 أها ئنّاياس ؤرݣاز: «زݣ سّيا غر دات، ؤر ئقّيم ئسم نّش أد ئݣ يعقوب والاينّي إسرائيل، ئدّخ تنّاغد د ربّي د ميدّن أها تݣيد أمرنو». لمعنا ن-ئسم إسرائيل: دا ئتجاهاد د ربّي.
29 داي ئسقسات يعقوب، ئنّاياس: «عافاش، ئنييي ميسم نّش؟» داي ئنّاياس: «مّاخ ألّيݣ دا تسالت خف ئسم ئنو؟» داي ئرضو خف يعقوب.
30 داي ئݣ يعقوب ئسم يي وانسا نّا فنوئيل، لمعنا نّس ؤدم ن ربّي. ئدّخ ئنّا: «أنّايخ ربّي س-وودم نّس أها قّيمخ دّرخ».
31 نتّا تنقّر غيفس تافوكت، ئدّو زݣ فنوئيل، د نتّا لا ئسحيزون س-ؤلغژم نّا غيرس ئلّان ݣ-ؤقرميم نّس.
32 زݣّوس ئتواوت يعقوب غر سمغور ن-ؤقرميم، ؤغا تتّان واراو ن-إسرائيل تاكسون ن-ؤقرميم غر س-أسّ اد.