31
تارولا ن يعقوب
1 داي ئسلا يعقوب يي واراو ن لابان لا تّنين: «ييوي يعقوب كول أينّا ئݣان وين ئبّاتنخ أها س-ؤينّا أس ئݣا شّابع».
2 ئفرّج يعقوب ݣ لابان، يافتين ئسّخنشوa، ؤر ئقّيم ݣ-ؤينّا أݣّيدس ئݣا ݣ تيزوري.
3 داي ئنّا مولانا يي يعقوب: «عّايد غر تمازيرت ن لوالدين نّش د لاهل نّش دّيغ أݣّيك ئليغ».
4 داي ئغرد يعقوب يي راحيل د لايا غر ئݣر نّاݣ ئكسا لمال نّس،
5 أها ئنّاياسن: «أنّايخ ئبّاتكنت ئسّخنشو غيفي، ؤر ئقّيم ݣ-ؤينّا أݣّيدي ئݣا ݣ تيزوري. ماشان ربّي نّا ئتعباد ئبّا، ئلّا أݣّيدي.
6 لا تسّنن ئس ݣيغ ؤݣار ن لمجهود ئنو د-ئبّاتكنت،
7 ماشان ئبّاتكنت ئغضريي أها ئبّدل تيغراض ئنو عشرا ن لمرّات، والاينّي ربّي ؤر ت يودجي أد يي ئݣ شا ؤر ئحلين.
8 ئدغ ئنّا: "تيبرباشين أد ݣينت تيغراض نّش" يارو لمال كول تيبرباشين، داي مش ئنّا: "ئمخطّطن أد ݣين تيغراض نّش" يارو لمال كول تيمخطّطن.
9 ئمشيد أس ئكّس ربّي لمال يي ئبّاتكنت أها ئوشيييت.
10 داي ݣ لوقت ݣ تّالين ئعتراس خف تغطّن، أنّايغ ݣ يوكت ن توارݣيت: ئعتراس ئمخطّطن د-ئبرباشن د-ئمنقطّن دا تّالّين خف تغطّن.
11 داي ئنّايي لملاك ن ربّي ݣ توارجيت: "أيعقوب!" أها نّيخاس: "نعم".
12 ئنّايي: "هزّا ألّن نّش تاناّيد: كول ئعثراس نّا ئتّالين خف تغطّن ݣان ئمخطّطن د-ئبرباشن د-ئمنقطّن، ئدّخ أنّايغ أينّا ك-ئتݣّا لابان كول.
13 نكّ ربّي نّا ش-ئضهرن ݣ بيت إيل. ݣ وانسا نّاݣ تسّبديت ئسلّي b أها تفرّغد غيفس زّيت حما أد ئݣ وينو. ماني ݣ يي تقاولد يون لقيوال. دغي، كر فّغ زݣ تمازيرت-اد تعّايت غر تمازيرت نّاݣ تلوليد"».
14 داي تنّاس راحيل د لايا: «ؤر-اخ ئقّيم ؤمور ن غا نكّوسا ݣ تادارت ن-ئبّاتنخ.
15 ئس ؤر-اخ ئݣي د-ام تبرّانييين؟ ئدّخ دا ئزنزاخ أها ئتّش ألّو أتيݣ ن ييول c نّخ.
16 داي كول لخير نّا ئكس ربّي يي ئبّاتنخ وينّخ أيد ئݣا نكني د واراونّخ. دغي، أينّاش ئنّا ربّي ݣيت كول».
17 فّير ن-ؤينّا، ئكر يعقوب ياسي أروا نّس د تعيّالين نّس خف ئلغمان،
18 ئنّه لمال نّس قّاح، ياسي كول أينّا ئسمون ݣ تمازيرت ن أرام حما أد-ئدّو غر إسحاق ئبّاس ݣ تمازيرت ن كنعان.
19 لّيݣ سول ؤر سافرن، ئدّا لابان أد ئلّس لمال نّس. داي تكشم راحيل فّير-اس أها تاكر لاصنام ن-ئبّاس.
20 ئمشيد أس ئغضر يعقوب لابان أرامي، ئدّخ ؤر-أس ئنّي ئس دا ئتݣادجا.
21 أها ئرول س-ؤينّا غورس ئلّان قّاح. ئكر ئنضو أسيف ن لفرات، ئدّو غر تنيلا ن لعواري ن جلعاد.
لابان لا يورزو يعقوب
22 داي ݣ واسّ ويسّ شراض، ييوض ؤنغميس لابان ئس ئدّا ئرول يعقوب.
23 ئكر لابان ياوي أݣّيتس ئرݣزن نّس، ئتفارت تاودا ن سبعا ن ووسّان أها ئسيكلتين ݣ لعواري ن جلعاد.
24 ماشان ݣيّض ئضهرد ربّي يي لابان أرامي ݣ يوكت ن توارجيت أها ئنّاياس: «غوراش أت تݣد شا ؤر-ئحلين يي يعقوب».
25 لّيݣ ييوض لابان غر يعقوب، يوفاتين لا ئصكا أخام نّس ݣ لعواري ن جلعاد، ئصك أود نتّا د-ئرݣزن نّس أخام نّس دينّا.
26 داي ئنّا لابان يي يعقوب: «ماتّا ؤياد تݣيد؟ تغضردييي أها تاويد ئسّي أم شا ݣ تحبّاسين ن لݣيرّا!
27 مّاخ ألّيݣ ترولد س-ؤخزون أها تلعبد ئسّي؟ مّاخ ألّيݣ ؤر-يي تنّيد شا حما أك سّيفضخ س-ؤفراح د-ئزلان د والون د لوطار؟
28 ؤر-يي تدّجيد أد مسافاضخ د-ئسّي د واراو نّسنت، تيحيطّ أس تݣيد أياد.
29 هاتين غيخ أد-اون ݣخ لعار. والاينّي ربّي نّا ئتعباد ئبّاش ئسيوليي أسنّاطّ ݣّيض ئنّايي: غوراش أت تݣد شا ؤر-ئحلين يي يعقوب.
30 دغي، شݣ تدّيد ئدّخ ش-ينغا ؤمارݣ ن تادّارت ن ئبّاش، والاينّي مّاخ ألّيݣ يي توكرد لاصنام ئنو؟».
31 داي ئرار يعقوب خف ﻻبان، ئنّاياس: «ݣّدخ أد يي تكّسد ئسّيك س دّرع.
32 دغي، ونّا غر توفيد لاصنام نّش أد ئمّت. دات ن أيت ؤخامنّخ، رزو أيدّا نّش ݣ-ؤينّا غوري ئلّان أها تاويت». ماشان يعقوب لا ؤر ئسّين ئد راحيل أيد يوكرن لاصنام ن لابان.
33 داي ياكم لابان غر أخام ن يعقوب د-ؤخام ن لايا د-ؤخام ن-تسمغين سّنات، أها ؤر يوفي شا، داي ئفّغ ياكم غر أخام ن راحيل.
34 يافد لحال راحيل لا توسي لاصنام تݣتين داو ن تباردا ن-ؤلغم أها تقّيم غيفس. ئرزو لابان ݣ تخامت كول نّس أها ؤر يوفي شا،
35 داي تنّا راحيل يي يبّاس: «أد-ؤر ئتحراق سيدي، ؤر غيخ أد كرخ داتاش ئدّخ ئلّا غيفي لحقّ ن وايورd». واخّا ئرزا لابان ݣ تخامين كول ؤر يوفي لاصنام نّس.
36 داي تطيراس عنوݣّا يي يعقوب، ئفقّع خف لابان أها ئنّاياس: «ماتّا لخاطا نّا ݣيخ د ماتّا لمعصيت نّا ݣيخ ألّيݣ يي تتفارد س-ئمكي؟
37 ها شݣ تفتّشد تيلولا نو قّاح، مش توفيد شا ؤسكّين ئݣان وينّش؟ سرستيد داها دات ن أيت ؤخام ئنو د أيت ؤخام نّش حما أد حكمن غيفنخ سّين.
38 عشرين ن-ؤسݣّاس أي كّيخ غورش، ؤر دّجين غرين وولّي نّك د تغطّن نّك، أها ؤر دّجين تشيخ زݣ ئحولين ن لمال نّك.
39 ؤردّجين-اش دّ-يويخ تنّا ئنغا لوحش نكّ أي ت-ئتّوالان. داي تنّا ئتواكرن س واسّ نغد ݣّيض دا يي تّينيد دّيما خلّصيييت.
40 س واسّ لا يي ئنقّا ؤزيل، ݣّيض دا يي تنقّا تيرنت. أها ؤغا تّيغيخ أد ݣنخ.
41 عشرين ن-ؤسݣّاس أي كّيخ غيرك، خدمخ غورش ربعطاعش ن-ؤسݣاس حما أد أولخ ئسّيك سّنات د ستّا ن-ئسݣّاسن حما أد كسبخ لمال، ماشان شݣّين تبدّلت تيغراض ئنو عشرا ن تيلمرات.
42 موريد ئس ؤر ئلّي أݣّيدي ربّي ن-ئبّا، ربّي ن إبراهيم نّا ئتوقار إسحاقe، دا تصيفطّييي س ييري ن-ؤفوس. ماشان ربّي يانّاي تامارا نو د لخدمت تاموعارت نّا غورش خدمخ، أها ئحكم ديك أسنّاط ݣّيض».
تاضا ن يعقوب د لابان
43 داي ئرار لابان خف يعقوب ئنّاياس: «تيشيرّاتين-اد تينو أي ݣانت، أراو نّسن أراو ئنو أي ݣان، لمال، لمال ئنو، د كول أينّا ݣ تفراجد هات وينو أݣّا، ماغا ݣخ دغي يي ئسّي نغد يي واراو نّسنت نّا ؤرْونت؟
44 دغي، أورا أنموْش تاضاf، أها ئݣ ئنيݣي g ئنݣري أݣّيك».
45 داي ياسيد يعقوب يوك ن-ئسلّي ئسبدّيت.
46 أها ئنّا يعقوب يي أيت ؤخام نّس: «سموناتد ئژرا». داي أسيند ئژرا ݣين يوك ن-ؤكنكور أها تشين غيفس.
47 داي ئݣاس لابان ئسم "يجر سهدوتا"، لمعنا ن-ئسم-اد س واوال ن تمازيرت ن أرام: أكنكور ن-ئژرا حما أد-اخ ئسكتي. ئد يعقوب ئݣاس ئسم "جلعيد"، لمعنا ن-ئسم-اد س واوال ن-ئعيبرانين ئݣا أم وين أيت تمازيرت ن أرام.
48 أها ئنّاياس لابان: «هان أكنكور-اد أغاخ ئسكتين تاضا نّا ئلّان ئنݣري أݣّيك أسّ-اد». خف ؤياد ئݣا ئسم نّس جلعيد.
49 ميدّن دا س تّينين ألّو لمصفات. لمعنا نّس: أنسا ن لعسّا، h ئدّخ ئنّا ﻻبان: «مولانا أغا ئݣين ئمحضي ئنݣري أݣّيدك أدّاي نمبعاد.
50 مش تسخوبد أضو يي ئسّي، مش تيولد غيفسن، هان ربّي دا ك-ئتّانّاي ئدّا أد ئݣ ئنيݣي ئنݣري أݣّيك واخّا ؤر سليخ نكّ يي شا».
51 داي ئنّاياس لابان ألّو: «هاك أكنكور-اد د-ئسلّي-اد نّا سبديخ ئنݣري أݣّيك.
52 أغاخ ئسّكتين تاضا نّا ئلّان ئنݣري أݣّيك: نكّ ؤسار تن سّورفخ غيرك، د كي ؤسار تن تسّورفد غوري س شا ؤر-ئحلين.
53 ربّي نّا ئعبد إبراهيم د ربّي نّا ئعبد ناحور i أد بضون ئنݣراخ». داي ئݣّال يعقوب س ربّي نّا ئتوقار ئبّاس إسحاق.
54 فّير ن-ؤينّا، ئغرص يعقوب يي يوكت ن تمغروصت ݣ عاري ئغرد يي لاهل نّس أت تشين. داي تشين أها نسين ݣ عاري.
55 ئكّر لابان تيفوت زيك، ئمسافاض د وارو ن-ئسّيسّ د-ئسّيسّ، ئرضو غيفسن. داي ئدّو ئعّايد غر تمازيرت نّس.