30
1 لّيݣ تسّن راحيل ئس ؤغا تّارْو، تحسد ؤلتماس. داي تنّا يي يعقوب: «ييفيي أد مّتخ مش ؤر يي توشيد أراو!»
2 داي ئطيراس يي يعقوب زݣ راحيل أها ئنّاياس: «ئد نكّ أيد ئݣان ربّي نّا ؤر-ام ئوشين تاروا؟»
3 أها تنّاياس: «هاش بلها تيسمغت ئنو، دّو ݣن أݣّيدس حما أت تارو أراو، سݣّمختن، أها ݣين أراو ئنو نكّين».
4 تكّر راحيل داي توش تيسمغت نّس بلها يي ورݣاز نّس يعقوب أت تييلي. داي ئكشم غيفس.
5 تاسي بلها أل تّارو أها تورْو يون لعيل يي يعقوب.
6 داي تنّا راحيل: «يومژيي ربّي لحقّ، ئسّغد يي توترا نو أها ئوشايي أربا». خف ؤياد تݣاس ئسم دان. لمعنا ن-ئسم-اد علي حال أم لمعنا ن واوال-اد: ئحكم.
7 تاسي بلها، تيسمغت ن راحيل أل تّارو ألّو أها تورْو أربا ويسّين يي يعقوب،
8 داي تنّا راحيل: «أمنزاغ ئحرين أيد ݣيخ د-ؤلتما أها رّوخت». داي تݣاس ئسم نفتالي. لمعنا ن-ئسم-اد علي حال أم لمعنا ن واوال-اد: تاموغژيل.
9 نتّا تسّن لايا ئس ؤر تقيم دا تّارْو، توش تيسمغت نّس زلفا يي يعقوب أت تييلي.
10 داي تورْو زلفا أربا يي يعقوب،
11 داي تنّا لايا: «أياعري» أها تݣاس ئسم جاد. لمعنا ن-ئسم-اد علي حال أم لمعنا ن واوال-اد: سّعد.
12 أها تورْو زلفا تيمسغت ن-لايا لعيل ويسّين يي يعقوب،
13 داي تنّا لايا: «أياعري ئنو، ئدّخ دانت أد يي تّينين تعيّالين أياعريت نّم». أها تݣاس ئسم أشير. لمعنا ن-ئسم-اد علي حال أم لمعنا ن واوال-اد: أمطرّح.
14 داي فّير ن-ؤينّا، ئدّو رأوبين ݣ ؤسّان ن ؤمجر ن ييردن أها ياف ݣ-ئݣر يون ؤحشلاف ئسم نّس تاريالا، دا تّينين ئژيل يي تعيّالين نّا ؤغا ئتّارْون، ياوتيد غر مايس لايا. داي تنّا رحيل يي لايا: «عافام، وشييي شوي زݣ تاريالا ن ممّيم».
15 أها تنّاياس: «ئس ؤرام ئقدّا تيويديي أرݣاز ئنو؟ داي تريد أت تاويد ديخ ألّو تاريالا ن ممّي؟» أها تناياس راحيل: «مش تريد ئدّا أد-اݣّيدم ئݣن ئض-اد منيد ن تاريالا ن ممّيم!»
16 لّيݣ د ييوض يعقوب زݣ ئݣر غر تادݣّات تفّغد لايا تݣراس عرّاض أها تنّاياس: «غوري لحقّ أد غيري تنسد ئضاد، ئدّخ دا خلّصخت س تاريالا ن ممّي!» أها ئݣن أݣّيتس ئض نّا.
17 ئسلا ربّي يي توترا ن لايا، داي تاسي أل تّارو أها تورْو يي يعقوب أربا ويسّ خمسا،
18 داي تنّا لايا: «ئخلّصييي ربّي، ئدّخ وشيخ تيسمغت ئنو يي ورݣاز ئنو». أها تݣاس ئسم يسّاكر. لمعنا ن-ئسم-اد علي حال أم لمعنا ن واوال-اد: تيغراض ئنو.
19 داي أل تارو لايا ديخ ألّو أها تورْو أربا ويسّ ستّا يي يعقوب
20 أها تنّا لايا: «ئوشايي ربّي توكّي ئژيلن، دغي، ئدّا ؤرݣاز ئنو أد يي ئوقر ؤݣار، ئدّخ أس ؤروخ ستّا ن-يشيرّان». داي تݣاس ئسم زبولون. لمعنا ن-ئسم-اد علي حال أم لمعنا ن واوال-اد: لعزّ.
21 داي فّير ن-ؤينّا، تورْو يوت ن تربات أها تݣاس ئسم دِينَا.
22 داي ؤر ئتّو ربّي راحيل، ئسلا يي توترا نّس أها ئوشاس أل تاّرو،
23 تاسي أل تّارو داي تورْو أربا. أها تنّا: «ئكّس ربّي لعيب ئنو».
24 داي تݣاس ئسم يوسف، أها تنّا: «أد يي ئوش مولانا يوك ن لعيل ياضن». لمعنا ن-ئسم-اد علي حال أم لمعنا ن واوال-اد: أد يي ئزايد.
ماكا ݣّا يعقوب ألّيݣ ياغول ئݣا شّابع
25 داي لّيݣ تورْو راحيل يوسف، ئنّا يعقوب يي لابان: «دجيي أد دّوخ غر تمازيرت ئنو.
26 وشييي تيعيّالين ئنو د واراو ئنو نّا خف مي خدمخ غورش أها دّوخ ئبردان ئنو، ئدّخ تسّند ماي تسوا لخدنت نّا غورش خدمخ».
27 داي ئنّاياس لابان: «سّغد غوري عافاش. كاشفخ ئس يي ئبارش مولانا ݣ وودم نّك.
28 ئنييي تيغراض نّا تريد أد-اك تن وشخ».
29 داي ئنّاياس يعقوب: «شݣ تسّند ماي تسوا لخدمت نّا غورش خدمخ د ميمشي أݣ أغول لمال نّش زݣّوس أر تكسّاخ.
30 ئدّخ أينّا غورش ئلّان ن لمال دات ن ماني ݣ غا د دّوخ غيرك ئدروس، ياغول ئعدّا، أها ئسباركش مولانا ݣ وودم ئنو. واسا، ميلمي أغا ݣخ أود نكّين شا ن لّهم يي أيت ؤخام ئنو؟»
31 داي ئنّاياس لابان: «ماغ-اك وشخ؟» أها ئنّاياس يعقوب: «أد-ؤر يي ياكّا أود حاح، ماشان دّيخ أد عايدخ أد كسخ لمال نّش، أها حضوخت مش يي تݣيد يان ؤسكّين:
32 أد زريخ أسّ-اد ئنݣر ن لمال نّش كول، أها عزلخ زّيكس مايد ئݣان تيخسي تابرباشت د تامنقّطّ، د مايد ئݣان أعلّوش أحبشان، د تغطن تيمنقّضين د تبرباشين، أد ݣين تيغراض ئنو.
33 فّير ن-ؤياد، تديد أت تيسيند ئس ئلّا ديݣي لامين. أدّاي تدّود أت تانّايد تيغراض ئنو، قّاح تنّا ؤر ئݣين تابرباشت نغد تامنقّطّ ݣ تغطن د-وينّا ؤر ئݣين أبخّان ݣ-ئعلّوشن، هاتين توكرضا أي توكرخ».
34 داي ئنّاياس لابان: «واخّا، قبلخ أينّا تنّيد»،
35 ماشان ئكر لابان ئعزل ݣ واسّ نّا ئمكّورتا ئمخطّطّن د-ئمنقّطّن د قّاح تيغطّن تيبرباشين د تيمنقّطين، كول ماݣ تلّا تاملّي، د كول ماݣّان أبخّان زݣ ئعلّوشن أها ئشتن يي واراو نّس.
36 أها دّون زݣ يعقوب تاوادا ن شراض ن-ووسّان، ئد يعقوب ئقّيم أر ئكسّا لمال ن لابان نّا ئقّيمان.
37 داي ئكر يعقوب ياويد ئغريان ئزݣزاون زݣ ئسكلا ن صّفصاف د لّوز د لّبa، ئنقّش غيفسن شا ئشرّيضن b أر ئسّضهار تاملّي ن وولاون ن-ئغريان،
38 أها ئسرس ئغريان نّا ئنقش ݣ تفروين ن وامان، نّاݣ-ئسّا لمال. ئدّخ دا تّالين cئحوليين د-ئعتراس خف وولّي د تغطّن أدّاي ددّون أد سوين.
39 أها أر تݣّين أياد دات ن-ئغريان، أدّاي ددّون أد سوين. داي يارْون: ئمخططن، د-ئبرباشن، د-ئمنقطن.
40 أها ئعزل يعقوب ئعلّوشن د-تعلّوشين. داي ئݣ أينّا ئقيمن زݣ لمال ن لابان منيد ن-ئمخططّن د-ئحبشان. داي ئݣ يعقوب لمال نّس ئويل نّس أها ؤغا ت-ئتشار د لمال ن لابان.
41 داي أدّاي تّالين ئحوليين د-ئعتراس صحانين خف وولّي د تغطّن صحانين دا د-يتاوي يعقوب ئغريان ئݣتن ݣ تفروين منيد أسن.
42 ماشان أدّاي تّالين ئحوليين د-ئعتراس وحلنين خف وولّي د تغطّن وحلنين، ؤر دا ئسروسا يعقوب ئغريان منيد أسن، ئمشيد أس ݣانت تيسّ وحلنين تين لابان ئد تيس صحانين تين يعقوب.
43 أها ياغول ئدّجيون عنوݣا، ييلي غورس شايݣان ن لمال د-ئسمغان د تسمغين د-ئلغمان د-ئغيال.