29
يعقوب د راحيل
1 داي ئتامّا يعقوب ݣ-ؤبريد نّس أها ئدّو تانيلا ن تمازيرت ن-ؤنقّر ن تافوشت.
2 يوك ن واسّ، ئهزّا ألّن، يانّاي يوك ن وانو ݣ-ئݣر ئقّن س يون ئسلّي أخاتار د شراض ن تواليوين ن لمال طّرفاس. ئدّخ زݣ وانوياد أيدا سّوان ئمكساون لمال نّسن.
3 أدّاي دّمّون غر دينّا كول نّسن، دا تكسن ئمكساون ئسلّي زݣ ؤقمو ن وانو أم ؤينّا تݣّين كوياس، داي سّوين لمال أها رّينت خف ؤقمو ن وانو.
4 داي ئسقساتن يعقوب، ئنّاياسن: «أيايتما ما زݣ تݣام؟» نّاناس: «نكني زݣ حاران».
5 ئنّاياسن: «ئس تسنم لابان، ممّيس ن ممّيس ن ناحور؟» نّاناس: «يّيه، نسّنت!»
6 ئنّاياسن: «ئد لاباس غورس؟» نّاناس: «لاباس. هاش راحيل ئلّيس تنّهد لمال».
7 أها ئنّاياسن: «ئسول واسّ ئغزّيف، ؤريد لوقت نّاݣ-ئتمون لمال أياد. سّوات لمال تاويمت غر ماني ݣ غا ئهدو».
8 أها نّاناس: «ؤر نتّيغي أنݣ والو، ئدّخ لعات نّخ أل د-يمون لمال كول، عاد أغا نكّس ئسلّي زݣ ؤقمو ن-وانو حما أنسو لمال».
9 ئسول لا ئساوال أݣيدسن، تاوضد راحيل د لمال ن-ئبّاس، ئدّخ تݣا تامكساوت.
10 نتّا ئعلا يعقوب راحيل ئلّيس ن خارس لابان د لمال نّس، ئدو ئكس ئسلّي زݣ ؤقمو ن وانو أها ئسّو لمال نّس.
11 ئسلم يعقوب خف راحيل داي ئسغوي ئقيم أل ئترو س-ؤفراح،
12 داي ئنّاياس: «نكّين ؤلاهل ن-ئبّام، ممّيس ن عتّم رفقا». داي تازّل فيمرّا أت تقّيس يي ئبّاس.
13 لّيݣ ئسلا لابان ئس ديدّا يعقوب ممّيس ن-ؤلتماس يوزلاد حما أد-اس ئݣر عرّاض، نتّا ييوطّين ئݣراس ئغيل ئسلّم غيفس ياوتيد غر تادّارت نّس. داي ئقّيساس يعقوب أينّا ئجران كول.
14 أها ئنّاياس لابان: «ستيت زݣ ئغص ئنو أي تݣيت، تݣيد ؤلاهل ئنو». داي ئقّيم غورس أيور بوتاما.
ئول ن يعقوب س-ئسّيسّ ن لابان
15 يون واسّ، ئنّا لابان يي يعقوب: «واخّا ؤلاهل ئنو أي تݣيد ؤر ئݣي لحقّ أد غوري تخدمد باطل؟ ئنيي ماغ-اك وشخ ݣ تغراض نّش؟»
16 داي ئلين غر لابان سنات ن تشيرّاتين، تاكسوات ئسم نّس لايا، ئد تامزيانت ئسم نّس راحيل.
17 لايا ئناقساس ئژري، ئد راحيل ئژيل أس لقدّ أها تݣ زّين عنوݣّا.
18 أل-ئتيري يعقوب راحيل، داي ئنّاياس يي خارس: «أد غورش خدمخ سبعا ن-ئسݣّاسن أها توشدييي راحيل، ئلّيش تامزيانت أت تيليغ».
19 ئنّاياس لابان: «ييف مش أكت وشيغ كي ؤلا وشخت يي شا ورݣاز ضنين. ئوا قّيم غوري».
20 داي ئخدم يعقوب غر لابان سبعا ن-ئسݣّاسن حما أد ياول راحيل. ماشان ئسݣّاسن-اد ݣزولن ݣان غورس أم شا ن ووسان دروسنين، ئدّخ أل-ئتيري راحيل شايݣان.
21 داي ئنّا يعقوب يي لابان: «لاجال نّا خف نمساسا ئقضا، وشييي تامطّوطّ ئنو حما أت تيليغ».
22 داي ئݣ لابان تامغرا a يي ئلّيس أها ئغرد يي أيت حاران كول.
23 نتّا تيوض تادݣّات، ياسيد لابان ئلّيس لايا ئوشت يي يعقوب. أها ئكشم غيفس.
24 ئوش لابان تيسمغت نّس زلفا يي يلّيس لايا حما أد-اس تݣ تيسمغت.
25 داي تيفوت ئسّن يعقوب ئس ئلا لايا. أها ئنّا يي لابان: «متّا ؤياد يي تݣيد؟ ئس ؤر-ئد خف راحيل أخف مي خدمخ غورش؟ مّاخ ألّيݣ يي تغضرد؟»
26 ئنّاياس لابان: «ݣ تمازيرت نّخ ؤغا تّاول تمژيّانت دات ن تخاتارت.
27 شمل سبع يّام ن تمغرا د لايا، نوشاك ألّو راحيل، ماشان ئخصّاش أت تخدمت سبعا ن-ئسݣّاسن ضنين».
28 ئقبل يعقوب أها ئشمل سبع يام ن تمغرا نّس د لايا، داي ئوشاس لابان ألّو راحيل أت تݣ تامطّوطّ نّس.
29 ئوش لابان تيسمغت نّس بلها يي ئلّيس راحيل حما أد-اس تݣ تيسمغت.
30 داي ياكم يعقوب ألتو خف راحيل، أها أل ت-ئتّيري ؤݣار ن لايا. داي فّير ن-ؤينّا ئزايد ئخدم غرلابان سبعا ن-ئسݣّاسن ضنيني.
تاروا ن يعقوب
31 نتّا يانّاي مولانا لايا ئس ؤر تعزيز شا أها ئوشاس أراو، ئد راحيل تݣا تيݣّرت.
32 داي تاسي لايا أر تّارو، تورْو يون ؤربا أها تݣاس ئسم رأوبين، ئدّخ تنّا: «يانّاي مولانا تامارا نو، دغي، دّيخ أد عزيزخ س-أرݣاز-ئنو». لمعنا ن-ئسم-اد علي حال أم لمعنا ن واوال-اد: ئعلا مولانا تامارا نو. b
33 أها تاسي أل تّارو ألّو داي تورْو أربا داي تنّا: «ئسّن مولانا ئس ؤر عزّخ شا أها ئوشييي لعيل ياضن» تݣاس ئسم: شمعون. لمعنا ن-ئسم-اد علي حال أم لمعنا ن واوال-اد: لا ئتسلّا.
34 تاسي أل تّارو ديخ ألّو أها تورْو أربا داي تنّا: «ئروخاس شارض ن-يشران يي ورݣاز ئنو، لمرت-اد ئدّا أد ديݣي ئشبّر». خف ؤياد تݣاس ئسم لاوي. لمعنا ن-ئسم-اد علي حال أم لمعنا ن واوال-اد: ئشبّر.
35 تاسي أل تّارو ديخ ألّو، داي تورْو لعيل ضنيني أها تنّا: «تيكلّت-اد، أد حدمخ مولانا». خف ؤياد تݣاس ئسم: يهوذا. لمعنا ن-ئسم-اد علي حال أم لمعنا ن واوال-اد: حمد. فّير ن-ؤينّا تبدّ زݣ تاروا.