28
إسحاق دا ئتازن يعقوب غر لابان
1 ئغرد إسحاق يي يعقوب ئسبارشت. ئوصّات أها ئنّاياس: «أد-ؤر تّاول زݣ ئسّيسّ ن تمازيرت-اد ن كنعان.
2 كّر دّو غر تمازيرت ن أرام، غر تادّارت ن بتويل، ئبّاس ن مايش أها تاولد يوت ن تمطّوطّ زݣ ئسّيسّ ن خاليش لابان.
3 دا تترخ يي ربّي نّا ئغين يي كولشي أك ئسبارش، ئسعدّو أراو نّش، تݣد ئبّاس ن شايݣان ن لݣنوس
4 أها ئوشاك لبركا أم تين إبراهيم، شݣ د تاروا نّش حما أت تكّوست تامازيرت-اد نّاݣ تزدغد دغي د نّاݣ تݣيد أبرّاني، تامازيرت نّا ئوشا ربّي يي إبراهيم».
5 داي يازن إسحاق يعقوب أد-ئدّو غر تمازيرت ن أرام، غر لابان، ممّيس ن بتويل أرامي. لابان ئݣا ؤماس ن رفقا نّا ئݣان مايس ن يعقوب د عيسو.
عيسو دا ئتاول ئلّيس ن سماعيل
6 نتّا يانّاي عيسو إسحاق ئس ئرضا خف يعقوب، يازنت غر تمازيرت ن أرام حما أد ياول شان تمطّوطّ، داي لّيݣ تيبارك، ئوصّات أها ئنّاياس: «أد ؤر تّاول تامطّوطّ تاكنعانييت».
7 داي ئݣ يعقوب رّاي يي ئبّاس د مايس أها ئدّو غر تمازيرت ن أرام.
8 داي ئسّن عيسو ئس ؤر-ئحميل ئبّاس إسحاق ئسّيسّ ن تمازيرت ن كنعان.
9 ئدّو عيسو غر سماعيل عمّيس، ياول ألّو خف تعيّالين نّس محلا، ئلّيس ن سماعيل، ممّيس ن إبراهيم. محلا تݣا ؤلتماس ن نبايوت.
تاوارجييت ن يعقوب ݣ بيت إيل
10 ئفّغ يعقوب زݣ بئر سبع ئدّو غر تمدينت ن حاران.
11 نتّا ييوضن يوك ؤدغار ئقّيم أديكس ئنس، ئدّخ غيفس ثغلي تافوشت. ياسي يون ئسلّي ئݣيت دّاو ن-ئخف نّس أها ئݣن ݣ-ؤدغار نّا.
12 داي يانّاي ݣ يوت ن توارجت دّروج دّان زݣ واشال ألّيݣ ن-ئوضن ئݣنّا. لمالايكات ن ربّي لا ت تالين أر ت تسرّاحن.
13 داي ئبدّ مولانا نّيݣ ن دّروج أها ئنّاياس: «نكّ أيد ئݣان مولانا، ربّي نّا أر-ئتعباد ئبّاك حنيني إبراهيم د ونّا دا يتعباد ئبّاك إسحاق. أشال-اد خف تجنت، دّيخ أداكت وشخ شكين د وراو نّش.
14 دّان أد ؤعدّون وراو نّش أم تاتشا ن واشال أها أمژن زݣ ؤغلّوي ن تافوكت أل أنقّر ن تافوكت، د زݣ ئديس أژلماض أل ئديس أفاسي. د ݣ وودم نّك د وودم ن واراو نّش دّيخ أد سبارشخ تيقبيلين ن دّونيت كول.
15 ها نكّ لّيخ أݣّيتش، دّيخ أك حضوخ ما ني غر تدّيد كول أها رارخكيد غر تمازيرت-اد. ئدّخ ؤر دّيخ أݣّيك بضوخ أها ݣخاك أينّا ك قاولخ كول».
16 ئفافاد يعقوب زݣ ؤنودّم، أها ئنّا: «ستيت، ئلّا مولانا ݣ وانساياد أها نكّ ؤر سّينخ!»
17 داي ئݣّد أها ئنّا: «شحال أݣ ساݣّاد وانساياد! ئزيغ ستيت ئݣا وانساياد تادارت ن ربّي د لباب ن-ئݣنّا».
18 ئكر يعقوب تيفوت زيكّ، يامژ ئسلّي نّا ئݣا داو ن-ؤقرو نّس، ئسبدّيت أها ئفرّغ غيفس زّيت حما أد ئݣ وين ربّي.
19 داي ئݣاس يي وانساياد ئسم: بيت إيل، لمعنا ن-ئسم-اد، تادّارت ن ربّي. ماشان دات ن-ؤياد أراس ئتوينا تامدينت ن لوز.
أقاول ن يعقوب