27
إسحاق دا ئتباراك يعقوب ݣ وانسا ن عيسو
1 داي لّيݣ ئوسير إسحاق أها ؤر ئقّيم دا ئسّادا. يون واسّ، ئغراد يي عيسو ممّيس أمنزو أها ئنّاياس: «أممي!» داي ئنّاياس عيسو: «ها نكّ أيبّا».
2 داي ئنّاياس إسحاق: «ها نكّ دا وسّيرخ أها ؤر سّينخ ميلمي أغا مّتخ!
3 دغي، عافاش، أسي دّوزان ن تصيّاطّ د لقوس نّش د نّبل نّش، تدّوت غر برّا تصيّطيييد شا.
4 أها تحبّلدييي يي شا ن-ووتشي ئژيلن أم ؤينّا تّيريخ، تاويديتيد أت تشخ، حما أك سبارشخ قبل أد مّتخ».
تاخندالّاست ن رفقا
5 داي لّيݣ أل ئساوال إسحاق د عيسو ممّيس، تلّا رفقا أل غورسن تسغاد. نتّا ئدّا عيسو غر برّا حما أد-ئصيّد،
6 تكّر رفقا تنّا يي يعقوب، ممّيس: «هاتين سلاخ يي ئبّاش دا ئساوال د عيسو ؤماش، ئنّاياس:
7 "أوييييد أيين تصيّطّ أها تحبّلدييي يي شا ن-ووتشي ئژيلن حما أت تشخ، سباركخش دات ن مولانا a قبل أد مّتخ".
8 دغي، أممّي سّغد يي واوال ئنو أها تݣد أيين غا ش ئنيخ:
9 دّو غر لمال تاويد سين ن-ئمكّورتا ژيلنين، أد حبّلخ ؤتشي ئغودان يي يبّاش، أم ؤينّا ئتّيري.
10 توشتاست أت تين ئتّش، حما أك ئسبارك قبل أد-ئمّت».
11 داي ئنّا يعقوب يي مايس رفقا: «واخّا، والاينّي عيسو ئغمس س شّعرb، ئد نكّين ؤر غيري ئلّي شعر ݣ صّاحت ئنو.
12 يي مش يي ئقلّب ئبّا، داي ييسين ئس رّيخ أد غيفس لعبخ، داي ئراريد ؤياد سّخض ݣ وانسا ن رّضا».
13 أها تنّاياس مايس: «سّخض ن غا ش ياوضن أد يي ياغ. غاس ݣّ س واوال ئنو أها تدّوت تاويديييد ئمكّورتا».
14 داي ئدّو، ئختارتن أها ياويتنيد يي مايس. أها تحبّل يي ووتشي ئژيلن أم ؤينّا ئتّيري إسحاق.
15 داي تنزغد رفقا ئعبان نّا ئغودان ن عيسو، ممّيس أمزْوارو، نّا لّانين غيرس ݣ تادّارت، تسرسيتن يي يعقوب ممّيس ويسّين،
16 أها تتّلاس خف ئفاسّن د حنݣي ئسليخن ن ئمكورتا.
17 داي توش ؤتشي ئژيلن د-ؤغروم نّا مي تحبّل يي يعقوب.
يعقوب دا ئتاشر لباركا
18 داي ئكشم غر ئبّاس، ئنّاياس: «أيبّا»، أها ئنّاياس إسحاق: «ها نكّ، مان ديݣون أياد أممّي؟»
19 أها ئنّاياس يعقوب: «نكّ، عيسو أمنزو نّش، دا ݣيخ أينّا يي تنّيد. ݣّيور أت تشد زݣ ؤينّا د صيّدخ حما أد يي تباركد».
20 داي ئنّاياس إسحاق: «أممّي! ماكّاي تݣيد ألّيݣ توفيد تاصيّاطّ-اد دغيا؟» أها ئنّاياس يعقوب: «مولانا، ربّي نّش ئسّوهينت غيفي».
21 داي ئنّاياس إسحاق: «حادز أممّي أد-اك سّلفخ حما أد صّوحاخ ئد شݣّين أيد ئݣان ستيت ممّي عيسو».
22 ئحادز يعقوب غر ئبّاس، نتّا ئسّلفاس، داي ئنّا: «أوال-اد أم واوال ن يعقوب، ماشان ئفاسّن وين عيسو».
23 ؤر ت يوكيز، ئدّخ ئفاسّن نّس ديكسن شعر أم ئفاسّن ن عيسو ؤماس. قبل أت ت-ئبارك،
24 ئسقسات ألّو: «ئد شݣ أيد ئݣان عيسو ممّي؟» داي ئنّاياس يعقوب: «نكّ أي ت-ئݣان».
25 أها ئنّاياس إسحاق: «أويييد أت تشخ زݣ تصيّاطّ نّش أممّي، أها باركخش». داي ئوش يعقوب يي يبّاس أد-ئتش. ياوياسد شرّاب أت تيسو.
26 أها ئنّاياس إسحاق: «حادزد غيري أممّي، أها تسّودمدييي».
27 داي ئحادز أها ئسّودمت. ئكضو إسحاق ريحت ن-ئعبان ن ممّيس، ئباركت أها ئنّا: «علو، رّيحت ن ممّي أم ريحت ن شا ن-ئݣر نّا ئسبارش مولانا.
28 دا تتّرخ يي ربّي أد-اك ئوش نّدا ن-يݣنّا، ئوشاك زݣ لخير ن واشال: شايݣان ن-يمندي د شرّاب ؤجديد.
29 أد غيفش تصخّارن لݣنوس، بندقن دات-اش تقبلين، أت تݣد أنمغور ن-أيتماش أها بندقناش، أت تّونعلّ ويسّ-ئك ئتنعالن، ئد ويسّ-ئك ئتباركن أت تّوسباركن!»
عيسو ئسّن ئس ئتّوغضر
30 داي لّيݣ ئفضّا إسحاق زݣ ؤسبارش ن يعقوب. غاس ئفّغ يعقوب زݣ ئبّاس، ياوضد عيسو زݣ تصيّاطّ.
31 داي ئحبّل أود نتّا يي ووتشي ئژيلن، ئسّيكمت غر ئبّاس أها ئنّاياس: «ݣّيور أيبّا، أت تشد زݣ تصيّاطّ نّا ش ديويخ حما أد يي تباركد».
32 داي ئنّاياس إسحاق: «ماي تمسد؟» ئنّاياس: «نكّ عيسو، ممّيش أمنزو».
33 داي تامژ ييوت ن ترجاجايت تاموعارت إسحاق. داي ئنّاياس: «ماݣمس وادّخ د يومژن تاصيّاطّ ياوييتيد، تشخ زݣ كولشي دات ن ماني ݣ تدّيدد؟ أها باركخت، ستيت ئدا أد ئݣ أنبارك».
34 غاس ئسل عيسو يي ونّا ئنّا ئبّاس، داي ئسغوي يان ؤغويي ئحرّان عنوݣّا. داي ئنّاياس: «باركيي أود نكّ أيبّا».
35 أها ئنّاياس إسحاق: «ئداد ؤماش ئݣايي تاحرميات، داي ياوي لباراكا نّش».
36 داي ئنّاياس عيسو: «ئيس ؤر ئد ئسم نّس يعقوب، نّا ئݣان لمعنا نّس أغشّاش؟ ئداد فّيري ئݣايي تاحرميات سنات ن تيكال، أها ييوي أمور ئنو ن تمنزويت، دغي، يوكر لباراكا نو». أها ئنّاياس ألّو: «ئس ؤر-يي تزريد شا ن لباراكا؟»
37 داي ئنّاياس إسحاق: «هاتين دا ݣيخت د سيدي نّش، رارخ أيتماس كول أد ݣين ئخدّامن نّس أها وشخاس ئمندي د شّراب. ماغ-اش ݣخ واسا أممّي؟»
38 ئنّا عيسو يي يبّاس: «ئد غاس يوكت ن لبركا أي غورش ئلّان؟ باركيي أود نكّ أيبّا». ئطيقس عيسو أل ئترو س-يغويّان.
39 داي ئنّاياس إسحاق: «ئقانكين أت تزدغد ݣ واشال ݣ-ؤر ئلّي لخير، ݣ-ؤغا ئطّار نّدا ن-ئݣنّا.
40 ݣيرّا د توكرضا ݣ غا تزرّيد تودرت نّك، أها تخدمد غر ؤماش. بلحقّ أدّاي تاغولت تجهتّ أت تكّست أحلاس c نّس زݣ حنݣي نّش».
تارولا ن يعقوب زݣ عيسو
41 أها يامژ عيسو لحسيفت ݣ يعقوب خف نّيرت ن لباراكات نّا س-ئوشا ئبّاس، داي ئنّا ݣ-ئخف نّس: «ئدجاور أد ئمّت ئبّا، داي أدّاي زرين ئمعزّان، أد نقّ يعقوب ؤما».
42 نتّا ئتّونا يي رفقا أيين ئرا أد ئݣ عيسو، داي تازن غر يعقوب أها تنّاياس: «حضو ئخف نّش هان ؤماش ئعوّل d ئنقّيك.
43 دغي، أممّي، سغد يي واوال ئنو: دّو رول غر تمدينت ن حاران، غر لابان ؤما.
44 تقّيمدن غورس شا ووسّان، أل ياشك ؤطيّر يي وماش.
45 أدّاي ياشك ؤحراق يي وماش أها ئتّو أيدّخ أس تݣيد، دّيخ أنّازنخ غيرك أت تعّايت سّين. ؤر رّيخ أت تمّتم سّين نّون ݣّ-ئدج واسّ».
46 داي تنّا رفقا يي إسحاق: «عفّاخ دّونييت زݣ تنيلا ن تعيّالين ن عيسو تيحثيين. مش ئقّن يعقوب أد ياول تامطّوطّ زݣ ئسّيسّ ن تمازيرت-اد، تاحثييت أم تعيّالين ن عيسو، تيفيي لموت تودرت!»