26
أزدوغ ن إسحاق ݣ تمدينت ن جرار
1 يون واسّ، ئكّر يون بهيّوف ݣ تمازيرت، ؤر ئد أم ونّا ئزرين ݣ-ؤسّان ن سيدنا إبراهيم. ئدّو إسحاق غر أبيمالك، أݣلّيد ن-ئفيليسطينيين غر تمدينت ن جرار.
2 ئفّغد غيرس مولانا، ئنّاياس: «أد-ؤر تدّو غر تمازيرت ن مصر، زدغ ݣ تمازيرت ن غ-اك سنعتخ.
3 قّيم ݣ تمازيرت-اد، داي ئليخ أݣّيدش، سبارشخك، ئدّخ شݣ د وراونّش أمّي غا وشخ تيميزار-اد كول. أها قّيمخ ݣ لعاهد ئنو نّا وشيخ يي ئبّاش إبراهيم.
4 أها سعدّوخ أراو نّش أنيت ن-ئتران ن-ئݣنّا، وشخ تيميزار-اد قّاح يي وراو نّش أها ݣ وودم ن تاروا نّش دّيخ أد باركخ لݣنوس كول ن دّونيت،
5 ئدّخ ئسغد إبراهيم يي واوال ئنو ئݣييي س رّاي، ئݣ س لوصيات ئنو، ئݣ س لفرايض ئنو أها ئݣ س شّرع ئنو».
6 داي ئقّيم إسحاق ݣ تمدينت ن جرار.
7 أها سقسانت أيت جرار خف تمطّوطّ نّس. ئنّاياسن: «ؤلتما أي تݣا»، علا حقّ ئݣّد أد ييني: «تامطّوطّ ئنو أي تݣا»، أها نغينت، ئدّخ تݣا رفقا زّين عنوݣّا.
8 نتّا ئزّري شايݣان ن-ووسّان دينّا، يون واسّ، ئسّيݣ أبيمالك، أݣلّيد ن-يفليسطينيين زݣ شّرجم داي يانّاي إسحاق ئݣرا ئغيل يي رفقا.
9 داي ئغرد أبيمالك يي إسحاق أها ئنّاياس: «ئد ستيت تامطّوطّ نّش أي تݣا؟ مّاخ ألّيݣ تنيت ؤلتماش أي تݣا؟» داي ئنّاياس إسحاق: «ئدّخ ݣدخ أد يي تنغيم غيفس».
10 داي ئسغوي أبيمالك خف إسحاق، أها ئنّاياس: «ماتّا تعقّيت-اد أخ تݣيد؟ غاس شوي أيد ئݣن شا ݣ-ئرݣزن ئنو د تمطّوطّ نّش أها تسيسيتاخ دّنب أخاتار».
11 أها ئوصّا أبيمالك ميدّن كول، ئنّاياسن: «ونّا ييوضن أرݣاز-اد د تمطّوطّ نّس ئدّا أد-ئمّت».
12 ئكرز إسحاق ݣ تمازيرت-اد، أها ياسي أنبدو ݣ-ؤسݣّاس-اد ؤݣار ن-ؤينّا ئكرز س ميّا ن لمرت ئدّخ ئسبارشت مولانا.
13 داي ئمغور وادّور ن إسحاق أها ئزايد ݣ تايوانت ألّيݣ ياغول ئݣا شابع أخاتار.
14 أها ييلي غورس شايݣان ن لمال د-ئزيار د شايݣان ن-ئسمغان، داي حسدنت ئفليسطينيين.
15 كرن عمّرن س تاتشا كول ؤنا a نّا غزان ئسمغان ن سيدنا إبراهيم ݣ-ؤسّان نّس.
16 أها ئنّا أبيمالك يي إسحاق: «فّغ زݣ تمازيرت نّخ، ئدّخ تاغولد تدجيوند عنوݣّا ؤݣار نّخ».
17 داي ئݣّودجا إسحاق غر تالات ن جرار أها ئصك ئخامن نّس دينّا.
ئمنغي ن-ئمكساون ن إسحاق د-ئمكساون ن أبيمالك
18 ئكر إسحاق ئعاود ئغز ؤنا ن سيدنا إبراهيم، نّا مي ؤدرن ئفليسطينيين فّير ن لموت نّس، أها ئݣاسن ئسماون أم ئسماون نّا سن ئݣا سيدنا إبراهيم.
19 يون واسّ، كرن ئسمغان ن إسحاق غزين ݣ تالات أنو ياضن، أها ؤفان ديكس تيطّ ن وامان دّرنين.
20 أها نّاغن ئمكساون ن أيت جرار د-ئمكساون ن إسحاق، نّاناسن: «وينّخ أيد ݣان وامان-اد». داي ئݣ إسحاق ئسم يي وانو نّا "عسق"، لمعنا نّس أنو ن-ئمنغان، ئدّخ نّاغن غيفس.
21 أها غزين أنو ضنين، نّاغن ألّو غيفس. داي ئݣاس إسحاق ئسم "سطنا"، لمعنا ن-ئسم-اد لعداوت.
22 داي ئݣّادج سّيهس ئغز أنو ياضن أها ؤر غيفس نّاغن شا، أها ئݣاس ئسم: "رحوبوت"، لمعنا ن-ئسم-اد أدغار يوران، أها ئنّا: «دغي، ئسّوسعيت مولانا غيفنخ ندّا أنوعدو ݣ تمازيرت-اد».
23 فّير ن-وينّا ئݣادج زݣ سّيس، غر بئر سبع.
24 نتّا ييوضن، داي ݣّيض ئفّغد غيرس مولانا، أها ئنّاياس: «نكّ ربّي نّا ئعبد ئبّاش إبراهيم. أد-ؤر تݣّد شا، ئدّخ لّيخ أݣّيك، دّيخ أك سبارشخ سعدّوخ أراو نّش ئدّخ قاولخاست يي ئبّاش، ئسمغ ئنو».
25 أها ئبنو إسحاق يون ؤسغرص، ئشكر مولانا. ئصك ئخامن نّس دينّا. داي غزين ئسمغان نّس يوك وانو.
تاضا ن إسحاق د أبيمالك
26 ئدّو غورس أبيمالك زݣ تمدينت ن جرار نتّا د أحزات لموشتاشار نّس د فيكول، أخاتار ن لعسكر نّس.
27 داي ئنّاياسن إسحاق: «مّاخ ألّيݣ غوري تدّام، أها د كّني لا ؤر يي تحميلم تژّعميييد زݣ غورون؟»
28 أها نّاناس: «دا ننژا ئس ئلّا مولانا أݣّيك. ئخصّا أنمساسا أها نموشا لعاهد ئنݣراخ.
29 ݣّالّاخ ئس ؤر-اخ تّاوطّ س شا ؤر ئحلين، ئدّخ ؤر دجين أش نݣي لعار، نݣاش غاس لخير أها ندجاك تدّيت ݣ لمان. شݣ، ستيت، ئباركش مولانا».
30 داي ئݣاسن إسحاق زّرت، تشين سوين.
31 تيفوت، كرن زيكّ، مسݣالّان أد ݣين أينّا خف مساسان ئنݣراسن، داي ئمسافاض أݣّيدسن إسحاق. دّون ݣ لمان.
32 داي ݣ واسّ نّا، دّاند ئسمغان ن إسحاق أها نّاناس: «دا نوفا أمان!» ݣ وانو نّا نغزا.
33 أها ئݣاس إسحاق ئسم "شبعا"، لمعنا ن-ئسم-اد تاݣالّيت، خف ؤياد ئݣا ئسم ن تمدينت بئر سبع، أود أسّ-اد. لمعنا ن-ئسم-اد أنو ن تݣالّيت.
عيسو د تعيّالين نّس تيبرّانيّين