25
إبراهيم دا ئتّاول قطورة
1 داي ياول سيدنا إبراهيم يوت ن تمطّوطّ ئسم نّس قطورا.
2 أها تورْواس: زمران د يقشان د مدان د مديان د يشباق د شوحا.
3 داي يورْو يقشان: شبا د ددان. أها يورْو ددان: أشوريم د لطوشيم د لأميم.
4 ئد مديان يورْو: عيفا د عفر د حنوك د-أبيداع د-ألداع. ويدّ كول نّسن أيد ئݣان تاروا ن سيدنا إبراهيم سݣ قطورا.
5 سيدنا إبراهيم ئوشا لمال نّس كول يي إسحاق.
6 أها ئوش ݣ تودرت نّس يي واراو نّس نّا يورو د تعيالين ضنين تيموشيوين أها يازنتن غر ئديس ن-ؤنقّر ن-تافوكت حما أد بعدن يي إسحاق.
لموت ن سيدنا إبراهيم
7 داي تيلي غر سيدنا إبراهيم ميّا د خمسا ؤسبعين ن-ؤسݣّاس.
8 داي فّير ن مايد ئكّا سيدنا إبراهيم شايݣان ن-ئسݣّاسن ݣ دّونيت أها ئزّري توسر نّس ݣ-ؤطّرح، ئمّوت لا ئدجيون زݣ دّونيت، ييويت ربّي أم لجدود نّس.
9 داي نّلنث وراونّس إسحاق د سماعيل ݣ-ئفري ن مكفليا نّا ئلّان ݣ-ئݣر ن عفرون أحثي ممّيس ن صوحر ݣ-ئديس ن-ؤنقّر ن تافوكت يي ممرا،
10 ئݣر نّا ئسغا سيدنا إبراهيم زݣ أيت حث. هاتين دينّا أيد ئتّونضل سيدنا إبراهيم د تمطّوطّ نّس سارا.
11 داي ضارت ن لموت ن سيدنا إبراهيم، ئبارك ربّي إسحاق نّا ئزدغن تاما ن وانو ن لحي رائي (زعما أنو ن ونّا ئدّرن أل ديݣي ئتراعا).
تاروا ن سماعيل
12 تاد أيد ئݣان لقيست ن تاروا ن سماعيل ممّيس ن سيدنا إبراهيم نّا تورْو هاجر تاميصريت تيسمغت ن سارا يي سيدنا إبراهيم،
13 هان ئسماون ن-ئشيرّان ن سماعيل زݣ ؤخاتار نّسن أل أمژيان نّسن: نبايوت أمنزو د قيدار د-أدبيل د مبسام
14 د مشماع د دوما د مسا،
15 د حدار د تيما د يطور د نافيش د قدما.
16 ويدّ أيد ئݣان ئسماون ن-ئشيرّان ن سماعيل س طناعش د كويون ئݣا أنبّاض ن تقبليت نّس أها توسمّان ئغرمان a نّسن د وانسيون ݣ تعزابن س-ئسماون نّسن.
17 داي ئمّت سماعيل لّيݣ تلّا ݣ لعمر نّس ميّا د سبعا ؤتلاتين ن-ؤسݣّاس، أها ييويت ربّي أم لجدود نّس.
18 أها تامژ تمازيرت نّسن زݣ حولا أر شور نّا ئلّان دات ن مصر، أدّاي د تدّوت تانيلا ن-أشور. ئعزل ؤزدّوغ نّسن زݣ تاروا ن سيدنا إبراهيم.
تالاليت ن عيسو د يعقوب
19 هان لقيست ن إسحاق، ممّيس ن سيدنا إبراهيم.
20 تلّا ربعين ن-ؤسݣّاس غر إسحاق لّيݣ ييول رفقا، ئلّيس ن بتوييل أرامي. رفقا د لابان ݣان أوماتن. أها ݣين زݣ تمازيرت ن أرام.
21 داي ئتر إسحاق يي مولانا زݣ تنيلا ن تمطّوطّ نّس رفقا، ئدّخ ؤغا تّارْو. ئسلّا مولانا يي توترا نّس أها تاسي أر تّارْو.
22 تدّا أت تارْو ئكنيون، نّا أر ئسفوروضن ݣ-ؤديس نّس. أها تنّا: «مش ئݣا لحال أم واكيد، مّاخ ألّيݣ يي ئتجرو ؤياد؟» داي تكر تدّو أت تّر يي مولانا.
23 داي ئنّاياس مولانا: «ݣ-ؤعدّيس نّم سين ن لݣنوس، دّان أد لالن زّيݣم سين ن شعوب ؤر مساسان يوك ن شّعب أد ياݣر واياض، د-ؤمنزو أد ئݣ أمزيلّز b غر أمژيان».
24 نتّا تيوض لوقت نّاݣ غا تارْو، داي تورْو ئكنيون.
25 ئفغد ؤمزيارو تغمس صّاحت نّس س شّعر أزݣّاغ، أم ؤعتروس. أياد أخف مي ݣاناس ئسم: عيسو. لمعنا ن-ئسم-اد ئعمر س شّعر،
26 فّير-اس ئفّغد ؤماس د-ؤفوس نّس لا يومژ ݣ-ئنيرز c ن عيسو، داي ݣين-اس يعقوب، لمعنا نّس ئنيرز نغد أغشّاش. تيلي غر إسحاق ستّين ن-ؤسݣّاس لّيݣ تن تورْو رفقا.
عيسو دا ئزنوزا أمور نّا ئتّامژ خف تمنزويت نّس
27 مغورن ئفراخ، ئݣ عيسو أصياد ئوعرن، بو لخلا. ئد يعقوب ئݣا أرݣاز ئژّاين، ئتّغيمان ݣ-ئخامن.
28 ئعزيز عيسو غر إسحاق ئدّخ دا ئتّيري أينّا س د-ئتّاوي زݣ تصيّاطّ، ئد رفقا ئعزّ غورس يعقوب.
29 يون واسّ، ئعّايد عيسو زݣ ئݣر لا ئوحل عنوݣّا أها ئنغات لاژ، يافن يعقوب دا ئسّݣّاd شان ووتشي،
30 داي ئنّاياس عيسو: «وشيي أت تشخ زݣ تحريرت-اد تازݣّاغت، ئدّخ ئخلايي ﻻژّ». خف ؤياد ݣان يي عيسو ئسم ن أدوم، لمعنا نّس أزݣّاغ.
31 أها ئنّاياس يعقوب: «زّنزيي أبعدا ئمورن نّش سّين زݣ تاكّوست د لباراكا نّا ئدّا ئبّاتنخ أد-اش ئوش، ئدّخ تݣيد أمنزو».
32 داي ئنّاياس عيسو: «واخّا، نّك دّيخ أد مّتخ س لاژ، ماي تݣّاخ س-ئمورن ئنو زݣ تاكّوست د لباراكا واخّا ݣيخ أمنزو؟»
33 أها ئنّاياس يعقوب: «ݣّالّييي بعدا!» أها ئݣّالّاس. داي ئزنز عيسو أمور نّس يي يعقوب.
34 أها ئكر يعقوب ئوشاس أغروم د تحريرت ن لعدس. داي ئتش ئسو أها ئكر ئدّو، ئمشيد أس ئسمژي س e ئمورن نّس ن تمنزوت.