24
تيرزي ن تمطّوط ّ يي إسحاق
‏1 داي ياغول سيدنا إبراهيم ئوسّير عنوݣّا. أها ئݣاس مولانا لباركا ݣ-ؤينّا ئتݣّا كول.
‏2 يان واسّ، ئغراد سيدنا إبراهيم يي وخاتار ن-ئسمغان نّس، نّا ئݣان أنبداد خف لمال نّس كول أها ئنّاياس: «سرس أفوس نّك دّاو ن تازوكتa ئنو،
‏3 أها تݣّالدييي س مولانا، ربّي ن-ئݣنّا د واشال ئس ؤر تدّيد أت تاولد يي ممّي زݣ ئسّيس ن تمازيرت ن كنعان نّاݣ زدغخ.
‏4 ماشان أت تدّود غر تمازيرت ئنو أها تاويدّد يي ممّي إسحاق تامطّوطّ زݣ لاهل ئنو».
‏5 داي ئنّاياس ؤخاتار ن-ئسمغان: «ئ مش ؤر تّيري تمطّوطّ أد يي تتفار غر تمازيرت-اد، ئس ئخصّا أد رارخ ممّيش غر تمازيرت نّا زݣ تفّغد؟»
‏6 داي ئنّاياس سيدنا إبراهيم: «أراح! غيراك أت ترارد ممّي غر دينّا.
‏7 مولانا، ربّي ن-ئݣنا نّا يي ئسّوفغن زݣ تادّارت ن-ئبّا د تمازيرت-ئنو. ئسيولييي أها ئݣالّييي ئس ئدّا أد-ئوش تامازيرت-اد ݣ لّيخ يي تاروا نو. ئدّا أد يازن لملاك نّس دات-اش حما أت تاويد زّيكس تامطّوطّ يي ممّي.
‏8 داي مش ؤر تري تمطّوطّ أكي تتفار، هاتين ؤر غيفك ليخ والو واخّا يي تݣّوليد، والاينّي غيراك أت تاويد ممّي غر دينّا».
‏9 داي ئسرس ؤخاتار ن-ئسمغان أفوس نّس دّاو ن تازوكت ن سيدنا إبراهيم باب نّس أها ئݣّالّاس ئس ئدّا أد ئݣ أينّا س-ئنّا.
ئسمغ ن إبراهيم ݣ تمازيرت ن حاران
‏10 داي ئكر ؤخاتار ن ئسمغان ياوي عشرا ن-ئلغمان د-ؤينّا ئژيل كول زݣ ؤينّا ئلّان غرسيدنا إبراهيم. أها ئدّو غر أرام نّا ئلّان ئنݣر ن سين ن-ئسافّن غر تمدينت نّاݣ-ئزدغ ناحور.
‏11 نتّا ييوضن b تاما ن يان وانو برّا ن تمدينت، ئسغيم ئلغمان، أتاين ن تادݣّات، لوقت نّاݣ تفّغن تمغارين أد-أݣمنت أمان.
‏12 داي ئكر ئژّول يي ربّي أها ئنّا: «أمولانا، أربّي نّا ئتعباد سيدي إبراهيم، صّخرييي أينّا رّيخ أد ݣخ أساد أها تݣد أينّا تقاولد يي سيدي.
‏13 ها نكّين بدّيخ تاما ن وانو نّا زݣ تّاݣمن ئست ن تمدينت.
‏14 ئوا تارباتّ نّا مي نّيخ سمال أقلّال نّم أد سوخ، داي مش يي تنّا: "سو، أها دّيخ أد سّوخ أيد ئلغمان نّش"، تاد أي تستيد يي ؤمزيلّز نّك إسحاق. داي س-ؤياد أس دّيخ أد ئسينخ ئس تݣيد أينّا تقاولد يي سيدي».
رفقا د-ؤخاتار ن-ئسمغان ن إبراهيم
‏15 ئسول ؤر ئشمّيل أوال نّس ألّيݣ تدّا رفقا لا توسيد أقلّال خف ئغير نّس. رفقا تݣا ئلّيس ن بتوئيل ممّيس ن ملكا د ناحور ؤماس ن سيدنا إبراهيم.
‏16 تارباتّ تݣا تاعرّينت، ؤر دّجين تيول، تغودا عنوݣّا. تسرحد أت تاݣم زݣ أنو داي تعمّر أقلّال تالي.
‏17 يازل غورس ؤخاتار ن-ئسمغان أها ئنّاياس: «عفام، وشييي أد سوخ شوي وّامان زݣ ؤقلّام نّم».
‏18 داي تنّاياس: «واخا أسيدي، أخاش أت تسود!» داي تسضر أقلّال نّس س زّرب تنّالت س-ؤفوس نّس أها توشاس أد-ئسو.
‏19 نتّا ئسوا تنّاياس: «دّيخ أد-أݣمخ أمان يي ئلغمان نّش أل دجاون».
‏20 داي تفرّغ أقلّال نّس س زّرب ݣ تفراوت أها تازل ألّو أت تاݣم أمان، تسّو ئلغمان كول.
‏21 ئد أخاتار ن-ئسمغان ئسوسم أها ئقيم أل ديكس ئتراعا، حما أد ئعلو ئس-أس ئصّخر مولانا أينّا خف ديدّا ماد أراح.
‏22 داي نتّا سوان ئلغمان، ئكر ؤخاتار ن-ئسمغان ئوش يي ترباتّ تالخاتمت ن دّهب يي تنزرت دا تعبار ستّا ݣرام د سين ن-ئدبليجن لا ئتعبار كو يون ؤݣار ن ميّا ݣرام.
‏23 داي ئسقسات: «ئلّيس ن مي أيد تݣيد؟ ئنيي، ئس ئلّا ݣ تادّارت ن-ئبّام شا وانسا نّاݣ غا نسخ نكّين د-ئسمون-ئنو؟»
‏24 داي تنّاياس: «نكّين ئلّيس ن بتوئيل ممّيس ن ناحور د ملكا.
‏25 هاتين ئلّا غورنخ شايݣان ن واليم د لعلف د وانسا نّاݣ غا تنسيم».
‏26 داي ئسجدا ؤخاتار ن-ئسمغان يي مولانا أها ئحمديت،
‏27 داي ئنّا: «تانمّيرت أمولانا، ربّي نّا ئتعباد سيدي إبراهيم، تݣيد لخير يي سيدي أها ؤر تتّود أينّا س تقاولت! مولانا تنّهتيييد أل تادارت ن لاهل ن سيدي إبراهيم».
‏28 داي تازّل رفقا غر مايس تقّيساس أينّا ئجران كول.
ئسمغ ن إبراهيم ݣ تادارت ن لابان
‏29 نتّات ئلّا غورس يان ؤماس، ئسم نّس لابان، داي يازّل نتّا س-أرݣاز ئلّان طّرف ن وانو.
‏30 ئدّخ ئعلا تالخاتمت د-ئدبليجن ݣ-ؤفوس ن-ؤلتماس رفقا، أها ئسلّاس لا تغيسا أينّا س-ئنّا ؤرݣاز. داي ياف لابان أرݣاز لا ئسول ئبدّ نتّا د-ئلغمان طّرف ن وانو.
‏31 داي ئنّاياس لابان: «أورا غورنخ، أوون ئبارك مولانا! ماخ ألّيݣ تقيمد برّا؟ هاتين سّيخ تادارت أها سوجيدخ أنسا يي يلغمان».
‏32 داي ئسّكشم لابان أرݣاز غر تادارت، ئكّس أݣّاتن زݣ أفلّا ن-ئلغمان، ئوشاسن أليم د لعلف أها ئوش يي ورݣاز د-ئسمون نّس أمان أد سيردن ئضار نّسن.
‏33 أها سرسيناس ؤتشي، ماشان نتّا ئنّاياسن: «ؤر تتّاخ أل ئنيخ أيين خف د دّيخ». داي ئنّاياس لابان: «واخّا أسيدي، سيول».
‏34 داي ئنّاياسن: [نكّين ئسمغ ن إبراهيم أي ݣيخ،
‏35 مولانا ئسباركت شايݣان أها ياغول ئدجيون، ئدّخ أس ئوشا مولانا ؤلّي د تغطّن د-ئزّيار د نقّرت د دّهب د-ئسمغان د تسمغين د-ئلغمان د-ئغيال.
‏36 أها تورْو سارا، تامطّوطّ ن سيدي أربا واخّا توسّير، داي ئوش سيدي لمال نّس كول يي ممّيس.
‏37 داي ئنّايي سيدي: «ݣّالّيي ئس ؤر تّاولد يي ممّي تامطّوطّ زݣ ئسّيسّ ن تمازيرت ن كنعان نّاݣ زدغخ.
‏38 ماشان دّو غر تمازيرت ن لوالدين ئنو د لاهل ئنو أها تاويتد تامطّوطّ يي ممّي».
‏39 داي نّيخاس يي سيدي: «ئ مش ؤر تري تمطّوطّ أد يي تتّابع؟»
‏40 داي ئنّايي: «هان مولانا نّا تضاعخ، ئدّا أد يازن لملاك نّس أݣّيك أها ئسّوهين أبريد نّش، داي تاويداسد تامطّوطّ يي ممّي زݣ تمازيرت ن لوالدين ئنو د لاهل ئنو.
‏41 هاتين ؤر غيفك ليخ والو، مش تدّيت غر لاهل ئنو، أها ؤر رّين أد-اش وشين تارباتّ واخّا يي تݣّولّيد».
‏42 نتّا ئوضخد أسّ-اد طّرف ن وانو ژّولّخ، ترخاس يي مولانا أها نّيخ: «أمولانا، أربّي نّا ئتعباد سيدي إبراهيم، صخريي أينّا خف د دّيخ.
‏43 دغي، ها نكين بديخ تاما ن وانو، داي تارباتّ نّا ديدّان أت تاݣم أها ئنيخ أس: وشيي أد سوخ شوي ن وامان زݣ ؤقلّال نّم،
‏44 داي مش يي تنّا: "سو، أها دّيخ أد سّوخ أود ئلغمان نّش"، هاتين تاد أغا ئݣين تامطّوطّ نّا ئستي مولانا يي ممّيس ن سيدي إبراهيم.
‏45 أها سولخ لا تترخ يي مولانا ئنݣري د-ئخف ئنو داي هان رفقا تدّاد لا توسيد أقلّال خف ئغير نّس، تسرحد س-أنو أت تاݣم. داي نّيخاس: «عفام أيلّي، وشييي أد سوخ».
‏46 داي دغيا، تسضر أقلّال زݣ ئغير نّس أها تنّايي: "سو، أها دّيخ أد سّوخ أود ئلغمان نّش". داي سوخ أها تسّو أود ئلغمان.
‏47 داي سقساخت: "ئلّيس ن مي أي تݣيد؟" داي تنّايي ئلّيس ن بتوئيل ممّيس ن ملكا د ناحور. داي ݣيخ أس تالخاتمت ݣ تنزرت د-ئدبليجن ݣ-ئفاسّن،
‏48 داي قّيمخ خف ئفادّن ئنو أها بندقخ س وول ئنو يي مولانا أها حمدخاس يي ربّي نّا ئتعباد سيدي إبراهيم نّا ئسّوهين سّفرت ئنو حما أد أويخ ئلّيس ن ممّيس ن-ؤماس ن سيدي يي ممّيس.
‏49 دغي، مش ترام أت تݣيم أينّا ئرا سيدي أها تݣيم ديكس لخير ئنيات، مش ؤر تريم ئنيات، حما أد دّوخ غر أنسا ياضن].
لابان د بتوئيل قبلن أد وشين رفقا أت تاول
‏50 داي ئنّاياس لابان د بتوئيل: «أياد ئكّاد زݣ مولانا، ئد نكني ؤر غيرخ ماغ-اك نيني.
‏51 هان رفقا دات-اش، أويت حما أت تݣ تامطّوطّ يي ممّيس ن سيدي نّش، أم ؤينّا ئنّا مولانا».
‏52 نتّا ئسلا ؤخاتار ن-ئسمغان ن سيدنا إبراهيم يي واوال نّسن، ئسجد يي مولانا.
‏53 داي ئسوفغد شا ئسكّين ن نقّرت د دّهب د-ئعبان أها ئوشتن يي رفقا، أها ئوش ألّو أود يي وماس د مايس توكّيوين غلانين.
‏54 داي تّشين سوين نتّا د-ئرݣزن نّا أݣيدس د-ئمون، أها نسين أل تيفوت. داي لّيݣ كرن، ئنّا ؤخاتار ن-ئسمغان يي أيت ؤخام ن رفقا: «دجاتييي أد دّوخ غر سيدي».
‏55 داي ئنّاياس ؤماس د مايس: «دّجاخ تارباتّ أد غورنخ تقّيم واخّا غاس عشرا د-ؤسّان، داي فّير ن-ؤينّا تدّو».
‏56 ئد نتّا ئنّاياسن: «أد ؤر يي سمضلات، هان مولانا ئصخريي أينّا خف د دّيخ، غاس دّجاتييي أد-أغولخ غر سيدي».
‏57 داي نّاناس: «أنغر يي ترباتّ أها نسقسات حما أنعلو ماي تّيني».
‏58 داي غريند يي رفقا أها نّاناس: «ئس تريد أت تدّوت دغي د-ؤرݣاز-اد؟» داي تنّاسن: «واخّا».
‏59 داي صيفضن رفقا د تسمغت نّا ت-ئسّݣمين د-ؤخاتار ن-ئسمغان ن سيدنا إبراهيم د-ئرݣزن نّس.
‏60 داي سباركن رفقا أها نّاناس: «أولماتنخ، لا نتّيني أوا مي تݣيد مايس ن مليون ن لملاين ن ميدّن د تاروانّم أت تامژ تيمدنين ن ئنضليبن نّس!»
إسحاق دا ئتّاول رفقا
‏61 داي تني رفقا د تمزيلّزين نّس ئلغمان، تفارن أخاتار ن-ئسمغان ن سيدنا إبراهيم. أها دّون كول نّسن.
‏62 داي يغولد إسحاق زݣ أنو ن "لحي رائي" نّا مي تّينين: "أنو ن-ونّا ئدرن نّا ديݣي ئتراعان" غر صّحرا ن ألنقب نّاݣ-ئزدغ. c
‏63 نتّا تدجاور تادݣّات، ئفّغ إسحاق أد ئسّارا ݣ-ئݣران، داي شوي ئهزّا ألّن نّس يانّاي ئلغمان دّاند تانيلا نّس.
‏64 داي نتّا تانّايت رفقا، تضر زݣ ؤلغم
‏65 أها تسقسا أخاتار ن-ئسمغان ن سيدنا إبراهيم: «ماݣ مس ؤرݣازين ديدّان ݣ ألماس ن-ئݣر أد-اخ ئنّال؟» داي ئنّاياس ؤخاتار ن-ئسمغان: «هاتين سيدي أينّا». داي تكّر تݣ لّتام يي وودم نّس.
‏66 داي ئقّيس ؤخاتار ن-ئسمغان يي إسحاق كول أينّا ئݣا.
‏67 داي ئسّيكم إسحاق رفقا غر تخامت ن مايس سارا، داي ياولت، ييريت عنوݣّا أها ئتّو لموت ن مايس.