23
لموت ن سارا د مسيغت ن تنضلت
1 تكّا سارا ݣ دّونيت ميّا د سبعا ؤعشرين ن-ؤسݣّاس.
2 أها تمّت ݣ قرية أربع، نّا مي تّينين حبرون ݣ تمازيرت ن كنعان. داي ئرو a غيفس سيدنا إبراهيم شايݣان أها ئحزن غيفس.
3 داي ئفّغ زݣ ؤدغار نّاݣ تلّا لݣنازت ن سارا أها ئدّو أد ئسيول يي أيت حث:
4 ئنّاياسن: «نكّين غاس يون ؤبرّاني، ݣخ أنبجي غيرون. زّنزاتي شا ودغار حما أد يكس نضلخ أمتّين ئنو».
5 داي نّاناس أيت حث:
6 «سّغد غورنخ، عافاش أسيدي! هان ربّي ئسّمغور شّان نّك ݣ وامّاس نّخ، دّو نضل ئمتّين نّك ݣ-ؤدغار نّا ش-ئعجبن. أود يون ؤر ئدّي أد-اش ئكّس ئݣر نّس حما ؤر تنضلد أمتّين نّك».
7 داي ئكّر سيدنا إبراهيم ئسجد دات ن أيت حث نّا ئزدغن ݣ تمازيرت-اد،
8 أها ئنّاياسن: «هاتين مش ترام أد نضلخ أمتّين ئنو ݣ تمازيرت-اد، سّغدات يي ماغ-اون ئنيخ، دّويات سيولات غيفي يي عفرون ممّيس ن صوحر،
9 أد يي ئزّنز ئفري نّس ن مكفليا نّا ئلّان تاما ن-ئݣر نّس، س واتيݣ نّا ئواتا دات-اون، حما أد ديكس نضلخ أمتّين ئنو.
10 داي يافد لحال عفرون أحثي لا ئقّيم أݣيدسن ݣ تݣّورت ن تمدينت، داي ئنّاياس يي سيدنا إبراهيم دات ن ميدّن كول نّا ئلّان ديس:
11 «أسيدي، سّغد غوري عافاش! هاتين وشيخاك ئݣر د-ئفري باطل دات ن ميدّن-اد كول، ئوا دّو نضل أمتّين نّك».
12 داي ئسجد سيدنا إبراهيم ألّو يي أيت حث.
13 داي ئنّا سيدنا إبراهيم يي عفرون دات ن ميدّن كول: «سّغد غيري، عافاش! أد-اش وشخ أتيݣ ن-ئݣر. أمژت زّيݣي أها دّوخ أد نضلخ أمتّين ئنو».
14 داي ئنّا عفرون يي سيدنا إبراهيم:
15 «أسيدي سّغد غوري أد-اك ئنيخ، أتيݣ ن-ئݣر-اد ربع ميّا ن-ؤقلعي ن نقّرت، هاتين ؤر-ئواتا ؤياد والو ئنݣري أݣيك، دّو نضل أمتّين نّك».
16 داي ئمساسا سيدنا إبراهيم د عفرون أها ئخلّساس أتيݣ نّا ئنّا دات ن أيت حيث، ربع ميّا ن-ؤقلعي ن نقّرت أم ئقلعين-اد أس زّنوزان ئعطّارن أر تّاغن ݣ لوقت-اد.
17 داي يغول ئݣر ن عفرون، د-ئفري د-ئسكلا نّا لّانين ݣ مكفليا ݣ-ؤنقّر ن تافوكت يي ممرا،
18 وين سيدنا إبراهيم أيݣان دات ن أيت حث نّا لّانين ݣ تݣّورت ن تمدينت. 19 داي فّير ن-ؤينّا ئنضل سيدنا إبراهيم تامطّوطّ نّس سارا ݣ-ئفري نّا ئلّان ݣ-ئݣر ن مكفليا طّرف ن ممرا نّا مي تّينين حبرون ݣ تمازيرت ن كنعان.
20 س-واكا أس-ئسغا سيدنا إبراهيم ئݣر-اد د-ئفري، حما أد-ئنضل أمتّين نّس، واسا ؤر-ئقيم ئݣر د-ئفري أد ݣين وين أيت حث.