20
إبراهيم د سارا د أبيمالك
1 داي ئݣادج سيدنا إبراهيم غر صّحرا ن النقب، ئزدغ ئنݣر قاديش د شور أها ئموتّي غر تمدينت ن جرار ئكّ ديكس شان لوقت.
2 داي أر ئتّيني سيدنا إبراهيم خف تمطّوطّ نّس سارا: «هاتين ؤلتما أي تݣا». داي ئكّر أبيمالك، أݣلّيد ن جرار ئكساست.
3 داي ئفّغد ربّي غر أبيمالك ݣ توارجيت ݣّيض أها ئنّاياس: «تدّيد أت تمّت خف نّيرت ن تمطّوطّ نّا تيويد، هاتين تامطّوطّ م-ؤرݣاز أينّا».
4 يافد لحال أبيمالك ئسول ؤر غورس يوژيض، داي ئنّاياس: «أمولانا، نكّين د ميدّن ئنو شا ؤر تنݣي! ئد-ئس تدّيد أد-اخ تخلود؟
5 ئس ؤر ئد إبراهيم س-ئخف نّس أيد ئنّان: "هاتين ؤلتما أي تݣا"، داي تنّايي نتّات ألّو: "ؤما أيد ئݣا؟" نكّين ݣيخ أياد س وول ئصفان ؤر ݣيخ شا ؤر-ئحلين».
6 داي ئنّاياس ربّي ݣ توارجيت: «سّنخ ئد س وول ئصفان أس تݣيد أينّا، أياد أخف ؤر-اك ؤدجيخ أت ت تقّيسد حما ؤر-يي تعصود.
7 دغي، رار تامطّوطّ يي ورݣاز نّس هاتين نّبي أيد-ئݣا، ئدّا أد يي ئتّر زݣ تنيلا نّك حما ؤر تمتات. ماشان مش ؤر تريد، بلا شّكّ تدّيد أت تمّت شݣّين د أيت ؤخام نّك».
أمصالاح ن أبيمالك د إبراهيم
8 تيفوت زيكّ، ئغرد أبيمالك يي ئنبّاضن نّس كول أها ئعاوداسن أينّا ئجران. داي ݣّدن عنوݣا.
9 داي ئغرد أبيمالك يي سيدنا إبراهيم أها ئنّاياس: «ماتا ؤياد أخ تݣيد؟ غاس شوي أيد يي تودجيد أد ݣخ لمعصييت-اد تاخاتارت نكّين د تݣلّديت ئنو ئس-اك ݣيخ شان لعار؟ هاتين تݣيدييي أينّا ؤغا ئتّْواݣّان».
10 داي ئسقسا أبيمالك سيدنا إبراهيم ئنّاياس: «مّاخ ألّيݣ تݣيد أياد؟»
11 داي ئنّاياس سيدنا إبراهيم: «لا تّينيخ ئس ؤر ئلّي ماݣ تݣّدن ربّي ݣ تمازيرت-اد أها ݣّدخ أد يي نغين خف نّيرت ن تمطّوطّ ئنو.
12 هاتين ؤر-اون سحيللخ ؤلتما أي تݣا ئلّيس ن-ئبّا، والاينّي ؤر تݣي ئلّيس ن-ئما أها ئولخت.
13 داي لّيݣ يي يسّوفغ ربّي زݣ تادّارت ن-ئبّا، نّيخاس يي تمطّوطّ ئنو: «لخير ن غا يي تݣد ماني غر ندّا كول، ئني ؤمام أي ݣيخ».
14 داي ياويد أبيمالك ؤلّي د تغطّن د-ئزيار د-ئسمغان: ئوتمان د توتمين ئوشتن يي سيدنا إبراهيم أها ئراراس تامطّوطّ نّس سارا.
15 داي ئنّاياس أبيمالك: «ها تامازيرت ئنو دات-اش، زدغ ماني ݣ تريد».
16 أها ئنّا يي سارا: «ها نكّين دا ؤشيخ يي ومام ألف ن-ؤقلعي ن نقّرت خف نّيرت ن-ؤينّا م-ئجران أها ئݣ تاماتارت دات ن ميدّن نّم كول، ئس ؤر تݣيد شا».
17 داي خف نّيرت ن-ؤينّا ئجران يي سارا تامطّوطّ ن سيدنا إبراهيم، ئݣا مولانا تيوتمين كول ن تادّارت ن أبيمالك د تيݣّار ؤغا تّارْونت، داي ئتّر سيدنا إبراهيم يي ربّي، أد ئجّوجي أبيمالك د تمطّوطّ نّس د تمسخّرين نّس. داي ئجّوجيتن ربّي أغولن أل تّارْونت ألّو.