19
لوط دا ئترحاب س لمالايكا ن ربّي
1 أتّاين ن تادݣّات، ئوضن لملايكا سّين غر سدوم. أها يافد لحال لوط ئقّيما غر تݣّورت ن تمدينت. غاس نتّا ئعلاتن ئكّر ئنّالتن أها ئسجداسن.
2 داي ئنّاياسن: «عفاون أييدّ سيدي، زريات غر تادّارت ئنو حما أت تنسيم أها تسّيردم ئضار نّون، داي تيفوت زيك تدّوم». داي نّاناس: «أراح، ندّا أد نّس ئضاد ݣ-ؤرحبي a ن تمدينت».
3 داي ئݣاسن لوط دّرع ألّيݣ أݣّيدس مّونّ غر تادّارت نّس. أها ئݣاسن ئمنسي ئغودان د-ؤراخصاص، داي تّشين.
تيخّويت ن أيت سدوم
4 سول ؤر كّيرن أد جن ألّيݣ د ضورن ئرݣزن ن سدوم كول يي تادّارت ن لوط، زݣ ؤمژّان نّسن أل أوسار نّسن، ؤر ئقّيم أود يوك.
5 أها غريناس يي لوط نّاناس: «ماني ئرݣزن نّا غورش ئكشمن تادݣّات-اد؟ سّوفغاختنيد دغي، أݣّيدسن نݣن!»
6 داي ئفّغ لوط غورسن، أها ئقن تيفلوت فّير-اس.
7 داي ئنّاياسن: «عفاون أيايتما، أد ؤر تݣّات لمعصييت-اد!
8 هاتين غوري سنات ن تفراخ سولنت ݣانت تيعرّيمين، دّيخ أد-اون تنين سّوفغخ، أها تݣيم ئسّن أينّا ترام. غاس أد ؤر تݣّات شا ؤر-ئحلين يي ئرݣزن-اد، ئدّخ لّان ݣ-ؤمور ئنو».
9 داي نّاناس: «فّغ سّيسّ، غاس أمحارص أي غيرنخ تݣيد، دغي، ها شݣين تريد أد غيفنخ تنبطّ. هاتين ندّا أد-اش نݣ ؤݣار نّسن». دحين لوط داي تامّان أد رژين تيفلوت.
10 ئد لملايكا سّين ؤژضن ئفاسّن نّسن أها نزغن لوط غر أمّاس ن تادّارت داي قّن تيفلوت.
11 أها وتن ئرݣزن نّا بدّين دات ن تفلوت: زݣ ؤمژّان أل أوسّار س لعمى أها ؤر غين أد سيدّن تيفلوت.
أفوكا ن لوط د أيت ؤخام نّس
12 داي نّان لملايكا يي لوط: «ئس غورش شا ن لاهل داد: ئضولان نّك، ئشيرّان نّك نغد وينّا ش ئقرّبن؟ ئوا دّو سّوفغتن زݣ تمدينت.
13 هاتين يوزناخد مولانا أت تن نخلو، ئدّخ أينّا مي ئسلا خف ئمزداغ نّس ئخّا عنوݣّا.
14 داي ئدّو لوط غر ئرݣزن ن غا ياولن ئسّيسّ ئنّاياسن: «فّغات سّياد فّيمرا، ئدّخ ئدّا مولانا أد ئخلو تامدينت». والاينّي نيتني ؤر تّيوين ديكس أل تّينين غاس ئس أݣّيدسن ئتقباض.
15 داي تيفوت زيكّ كّرن لملايكا أر تّادر ݣ لوط أد-ئفّغ سيّاد، أر-اس تّينين: «كّر، سدرف ئخف نّش، أها تاويد تامطّوطّ نّك د تشيرّاتين نّش حما ؤر توخلّوم س لعداب ن ربّي نّا غا ئرسن خف تمدينت».
16 داي ئقّيم لوط أل ئتماضال. داي أمژنت لملايكا زݣ ؤفوس نتّا د تمطّوطّ نّس د تشيرّاتين نّس أها سّوفغنتن غر برّا ن تمدينت، ئدّخ مولانا ئحنّا ديكسن.
تارولا ن لوط د أيت ؤخام نّس غر تمدينت ن صوغر
17 نتّا سّوفغنت زݣ تمدينت. داي ئنّاياس يون ن لملاك زّيكسن: «رول مش تريد أت تروحد، أد-ؤر سمقّول فّير-اش، أد-ؤر تماضال ݣ لوطاياد، دّو خزن ݣ عاري مش تريد ؤر تمتات».
18 داي ئنّاياس لوط: «عفاك أسيدي، أراح.
19 هاتين ترضيد غيفي أها تݣيدييي شايݣان ن لخير ئدّخ يي تسروحد. والاينّي ؤر غيخ أد رولخ غر عاري، ئدّا أد يي ئجرو شا قبل أت تين أوضخ أها مّتخ.
20 ئس تانّايد تامدينتين تامژّانت؟ هاتين تمژّي ؤر تبعيد، دّيخ أد غورس رولخ، داي خزنخ ديكس أها راحخ زݣ لموت».
21 داي ئنّاياس لملاك: «واخا، دّيخ أد-اش ݣخ لموراض، ؤر دّيخ أد خلوخ تامدينت نّا يي تنّيد.
22 ئوا دّو س زرب أت تخزند ديكس، هاتين ؤر دّيخ أد ݣخ شا أل تاوطّ». أياد أخف مي ݣان ئسم يي تمدينت-اد صوغر.
تيخلي ن سدوم د عمورا
23 لّيݣ تنقّر تافوكت، ييوض لوط صوغر.
24 داي ئوّت مولانا تامدينت ن سدوم د عمورا زݣ ئݣنّا س-ؤنژار ن لكبريت د لعافيت.
25 داي ئخلو تيمدينين-اد د-ئمزداغ نّسن كول، د تمازيرت نّسن د-ؤينّا ئسّمغي واشال كول.
26 داي تبرّم تمطّوطّ ن لوط أت تسموقل غر فّير-اس، أها تعايد تݣ ئسلّي ن تيسنت.
27 نتّا ئكّر سيدنا إبراهيم تيفوت زيك، ئدّو غر أدغار نّاݣ-ئبدّا دات ن مولانا.
28 داي ئسموقل تانيلا ن سدوم د عمورا د تمازيرت نّا سن ئضور، أها يانّاي شايݣان ن واݣو لا زّيكسن ئتّالي أم واݣّو ن لكوشت.
29 داي لّيݣ ئخلا ربّي تامدينت ن عمورا د تمدينت ن سدوم نّاݣ-ئزدغ لوط، ؤر ئتّو ربّي توترا ن سيدنا إبراهيم. أها ئسروح لوط زݣ تخلي ن تيمدينين-اد.
لمعصييت ن-ئسّيسّ ن لوط
30 ئݣّود لوط أد ئقّيم ݣ تمدينت ن صوغر، داي ئݣّادج نتّا د تشيرّاتين نّس سّنات غر عاري أها زدغن ݣ يون ئفري.
31 يان واسّ، تنّاس تربات تامنزوت يي تمژيانت: «ئبّاتنخ ئوسّير أها ؤر ئلّي شا ورݣاز ݣ وانسايا نّا غا خ ياولن أم ؤينّا تݣّين ميدّن كول.
32 أورا أد-اس نسّو شّراب أها نݣن أݣّيدس حما أد غورنخ تيلي تاروا زّيكس».
33 داي سّواناس يي ئبّاتسن شّراب ييض نّا، داي تدّو تربات تاخاتارت تݣن د-ئبّاس. داي ؤر يوكي ئسّ لّيݣ أݣّيدس تݣن د لّيݣ تكّر زݣ تاما نّس.
34 داي سا أسكّا نّس تنّا تربات تاخاتارت يي تمژيانت: «هاتين ݣنخ ئضلّي د-ئبا. أورا أد-اس نسّو ئضاد ألّو شّراب أها تكشمد أت تݣند أݣّيدس، حما أد غيرخ تيلي تاروا زّيكس».
35 داي سّوين يي ئبّاتسن شّراب ئض نّا ألّو، داي تكّر تربات تامژيانت تݣن د-ئبّاس. داي ؤر يوكي ئسّ لّيݣ أݣّيدس تݣن د لّيݣ تكّر زݣ تاما نّس.
36 داي ؤسين تشيرّاتين سّنات أل تّارْونت زݣ ئبّاتسن لوط.
37 داي تورْو تخاتارت أربا تݣاس ئسم ن موآب، نتّا أيد ئݣان ئبّاس ن أيت موآب نّا ئسولن أل دغي. b c
38 أها تورْو تمژيانت أود نتّات أربا أها تݣاس ئسم بن عمي، نتّا أيد ئݣان ئبّاس ن أيت بن عمي نّا ئسولن أل دغي. d