18
سيدنا إبراهيم د-ئنبجيون نّس شارض
1 يون واسّ، لّيݣ ئقّيم سيدنا إبراهيم ݣ تݣّورت ن-ؤخام ݣ أمّاس ن واسّ، ئفغد غيرس مولانا غر ئسكلا نّا مي تّنين تيسوفا ن ممرا.
2 شوي ئهزا ألّن نّس، يانّاي شارض ن-ئرݣزن بدّين منيداس. نتّا غاس ئعلاتن ئكر دغيا زݣ دات ن-ؤخام ئنّالتن. أها ئسجداسن،
3 داي ئنّاياس يي يوك ديكسن: «عافاش أسيدي، مش غيفي ترضيد، زرياد غيري.
4 دّيخ أد-اون دّاويخ أمان حما أت تسّيردم ئضار نون، تسݣونفام دّاو ن-ؤسكلوياد.
5 أها أويخاوند ماغا تتّشيم حما أت تزليم لاژ داي تّامّام ݣ-ؤبريد نون، زكوس تكّام تاما نو. داي نّاناس: «وخا، ݣ أينّا تنّيد».
6 داي يازّل سيدنا إبراهيم غر سارا ݣ-ؤخام، داي ئنّاياس: «سربا ئخف نّم، أسي يون ن-ؤبياع ن واݣّور ئژيل ݣاخ ئسّ أراخصاصa».
7 داي يازّل ألّو غر ئزݣارن أها يومژ يون ن-ؤݣايز ئقوان ئژيل ئوشاست يي ؤمزيلز أت تيسّوجيد أها ئسݣّيت فيمرّا.
8 داي ياويد أتشيل د-ؤغي د-ؤݣايز نّا ئسنوا أها ئسرسيت دات-اسن. داي قّيمين أر تتّان، ئد نتّا ئقّيم ئبدّا دات-اسن دّاو ن-ؤسكلو.
أقاول ن مولانا يي سارا لمرت تيسنات
9 داي سقسانت نّاناس: «ماني تامطّوطّ نّك سارا؟» داي ئنّاياسن: «هاتّين ݣ-ؤخام».
10 داي ئنّاياس يون زّيكسن: «دّيخ أد أغولخ ئمال أم لوقت-اد أها يافخد تامطّوطّ نّك سارا تورْو أربا». ئد سارا تلّا ݣ تݣّورت ؤخام فّير ن-ؤسݣلف ضارت ن إبراهيم أل غيرسن تسّغاد.
11 سيدنا إبراهيم د سارا وسّيرن عنوݣا أها ؤر ن-ئقّن سارا أت تارْو.
12 داي تطّصا سارا ئنݣراس د-ئخف نّس، أها تنّا: «ألّيݣ تزري تيزي نو، وسّيرخ أها ئوسّير أود ؤرݣاز ئنو أغا ييعجيب أݣيدس جنخ؟»
13 داي ئنّا مولانا يي سيدنا إبراهيم: «مّاخ ألّيݣ تطّصا سارا؟ مّاخ ألّيݣ تنّا ݣ-ئخف نّس: "ؤر-يي ن-ئقّن أد أروخ، نكّين وسّيرخ عنوݣا؟"
14 ئد-ئس ئلّا شا ئوعرن خف مولانا؟ ئمال أم لوقت-اد أدّاي د-اغولخ غيرك، ئدّا أد ييلي يون ؤربا غر سارا».
15 داي تݣّد سارا أها تنكر، داي تنّا: «أراح، ؤر طّصيخ شا». داي ئنّاياس مولانا: «ئهي، تطّصيد!»
سيدنا إبراهيم دا ئتتّر مولانا حما ؤر يوخلّو تامدينت ن سدوم د عمورا
16 داي فّير ن-ؤياد كرن ئرݣزن-اد عيّن تامدينت ن سدوم. داي ئمّون أݣّيدسن سيدنا إبراهيم حما أݣّيدسن ئمصافاض.
17 داي ئنّا مولانا: «ؤر رّيخ أد فّرخ خف إبراهيم أينّا عوّلخ أد ݣخ؟
18 ئقّنتين أد-ئݣ لݣنس أخاتار ئجهدن أها ݣ وودم نّس دّيخ أد باركخ ميدّن ن واشال كول.
19 هاتين ختارخت أد ئوصّا لهل نّس د واراو نّس أد دّون ݣ-ؤبريد ئنو أها ݣين س واوال ئنو حما أد ݣخ أينّا س قاولخ».
20 داي ئنّا مولانا: «هاتين سليخ يي دعاوي ن ميدّن خف ئمزداغ ن سدوم د عمورا، أها خاترنت لمعصيات نّسن عنوݣّا.
21 دغي، دّيخ أد سرّحخ أد-انّايخ ئس صحان دعاوي-اد نّا يي د ييوضن غيفسن. داي مش تݣين لمعصيات-اد كول دّيخ أد ئسينخ».
22 داي كرن دون سين ن-ئرݣزن غر سدوم، ئد سيدنا إبراهيم ئقّيم د مولانا.
23 داي ئحادز سيدنا إبراهيم غر مولانا أها ئنّاياس: «ئد-ئس تريد أت تخلود ونّا ئصلحن د ونّا ئعصان؟
24 مش لّان خمسين زݣ وينّا ئصلحن ݣ تمدينت ن سدوم. ئد-ئس تدّيد أت تخلود تامدينت-اد؟ ئس ؤر-اس تسماحد خف نّيرت ن خمسين-اد نّا ئصلحن؟
25 حاشا، أت تݣد أياد أسيدي! أت تخلود وينّا ئصلحن د وينّا ئعصان، داي تسّمساساد وينّا ئصلحن د وينّا ئعصان. ؤر عيّينخ ئس ئدّا ؤنبّاض خف واشال كول ؤر ئتنباض س لحقّ؟»
26 داي ئنّاياس مولانا: «مش ؤفيخ ݣ سدوم خمسين صلحن، خف نّيرت نّسن دّيخ أد سامحخ يي ميدّن ن تمدينت كول».
27 داي ئنّاياس سيدنا إبراهيم ألّو: «سامحيي أمولانا، ؤر واتاخ أد-اك سيولخ ئدّخ ݣيخ زݣ أشال د-ئغد.
28 مش ؤر لّين خمسين صلحنين، أد ئلين غاس خمسا ؤربعين، ئد-ئس تدّيد أت تخلود تامدينت خف نّيرت ن خمسا نّا ئخسّين؟» داي ئنّاياس مولانا: «مش ؤفيخ خمسا ؤربعين ݣ سدوم صلحن، ؤر دّيخ أتخلوخ».
29 داي ئنّاياس سيدنا إبراهيم ديخ: «ئ مش لّان غاس ربعين». داي ئنّاياس مولانا: «ؤر دّيخ أت تخلوخ خف نّيرت ن ربعين».
30 داي ئنّاياس سيدنا إبراهيم: «عافاش أمولانا، ؤر-اك ئتطيّار مش سيولخ ألّو. يي مش تلّا غاس تلاتين». داي ئنّاياس مولانا: «ؤر دّيخ أت تخلوخ خف نّيرت ن تلاتين».
31 داي ئنّاياس سيدنا إبراهيم: «سامحيي أمولانا، ؤر واتاخ أد-اك سيولخ، يي مش توفيد غاس عشرين؟» داي ئنّاياس مولانا: «خف نّيرت ن عشرين-اد ؤر دّيخ أد خلوخ تامدينت».
32 داي ئنّاياس سيدنا إبراهيم: «عافاش أمولانا، ؤر-اك ئتطيار، أد سيولخ غاس سّفرت-اد. يي مش توفيد غاس عشرا!» داي ئنّاياس مولانا: «خف نّيرت ن عشراياد ؤر دّيخ أت تخلوخ».
33 داي لّيݣ ئكمّل مولانا أوال نّس د سيدنا إبراهيم، ئكر ئدّو ئبردان نّس، ئد سيدنا إبراهيم ئعّايد س-أخام نّس.