17
تاضا د-ؤزين
1 لّيݣ تلّا ݣ لعمر ن أبرام تسعا ؤتسعين ن-ؤسݣّاس ئضهراسد مولانا أها ئنّاياس: «نكّين أيد ئݣان ربّي نّا ئغين يي كول شي. دّو ݣ-ؤبريد ئنو أها ؤر تݣّاد شا ؤر-ئحلين.
2 هاتين دّيخ أد ݣخ تاضا نو ئنݣري د أݣيدش أها سّوݣوتخ تاروا نّك شايݣان».
3 داي ئسجد أبرام دات ن ربّي. أها ئنّاياس ربّي:
4 «هان تاضا نو نّا تݣّاخ أݣيدش: تدّيد أت تݣد ئبّاس ن شايݣان ن لݣنوس.
5 ؤسار-اك غرين أبرام، ماشان دّان أد-اك قّارن إبراهيم، ئدّخ دّيخ أش ݣخ د-ئبّاس ن شايݣان ن لݣنوس. a
6 تاروا نّش تدّا أت تيݣوت بزّاف، تݣ شايݣان ن لݣنوس أها ئلين زّيكس ئݣلّيدن.
7 دّيخ أد قّيمخ ݣ تاضا نو أݣيدش د تاروا نّش فّير-اش، زݣ تاروا غر تاروا أبدا أها ݣخ ربّي نّك كي د تاروا نّك فّير-اك.
8 داي وشخاش شݣّين د تاروا نّك فّير-اش تامازيرت نّاݣ تݣيد دغي أبرّاني، تامازيرت-اد ن كنعان كول أبدا أها ݣخ ربّي نّسن».
9 داي ئنّا ربّي ألّو يي سيدنا إبراهيم: «شݣين د تاروا نّش فّير-اك زݣ تاروا غر تاروا ئلازم أت تحضوم تاضا نو.
10 هان تاضا نّا غا تحضوم: ئخصّاويت أت تعديلم يي ئوتمان نّون كول.
11 أعدول نّون ئدّا أد ئݣ تاماتارت b ن تاضا نّا ݣيخ أݣيدون.
12 زݣ تاروا غر تاروا، ئوتمان كول ئخصّاصن أد عديلن أدّاي غورسن تيلي ݣ لعمر تمانيا ن ووسّان. أود ئحرضان نّا ئلالن غورش نغد وينّا تسغيد زݣ شا ؤبرّاني أها ؤر ݣين زݣ تاروا نّك.
13 كول ئوتمان أد عديلن: وينّا ئلالن ݣ تادارت نّك نغد وينّا تسغيت س لمال نّك، حما أت تيلي تاماتارت ن تاضا نو أبدا ݣ صّواحات نّون.
14 ئد أوتم نّا ؤر-ئعديل أد ئتواژّع زݣ ميدّن نّك، ئدّخ ؤر ئݣي س تاضا نو».
أقاول ن ربّي يي سارا
15 داي ئزايد ربّي ئنّا يي سيدنا إبراهيم: «ئد تامطّوطّ نّك زݣ سيا غر دات عمّرك أد-اس تغرد ساراي، ماشان قاراس سارا. c
16 دّيخ أت تباركخ أها وشخاك زّيكس يون ؤربا، تݣ مايس ن شايݣان ن لݣنوس، أها ئلين ئݣلّيدن ݣ تاروا نّس».
17 داي ئسجد سيدنا إبراهيم يي ربّي، ئطّص داي أل ئساوال د-ئخف نّس، ئنّا: «نكّين غر مي تلّا ميّا ن-ؤسݣّاس ئس يي ئقّن أد غيري ئلين ئشيرّان؟ د سارا ئلّيس ن تسعين ن-ؤسݣّاس ئس تدّا أت تارْو؟».
18 داي ئنّا سيدنا إبراهيم يي ربّي: «أوا ݣ-ؤفان أت تسباركد غاس سماعيل».
19 داي ئنّاياس ربّي: «يّيه! ماشان تامطّوطّ نّش سارا أغا ش يارْون يون ؤربا تݣداس إسحاق. أها ݣخ أݣيدس تاضا ن وبدا د تاروا نّس فّير-اس. d
20 ئد سماعيل سليخاش زݣ تنيلا نّس: دّيخ أت تباركخ، سعدوخ تاروا نّس عنوݣا، تݣ لݣنس أخاتار أها ئݣ ئبّاس ن تناعش ن-ؤنبّاض. e
21 ماشان تاضا نو دّيخ أت تݣخ د إسحاق أربا نّا غا ش تارْو سارا ئمال أم لوقت-اد».
22 نتّا ئكمّل ربّي أوال نّس د سيدنا إبراهيم ئدّو ئزريت.
أزيّن ن سيدنا إبراهيم د سماعيل د-ئوتمان كول ن-ؤسون
23 داي ياوي سيدنا إبراهيم سماعيل ممّيس د-ئحرضان نّا ئلالن ݣ-ؤسون نّس د وينّا ئسغا أها ئعديلاسن يي ئوتمان كول، أم ؤينّا ئنّا ربّي ݣ واسّ نّا.
24 داي ليݣ ئعديل سيدنا إبراهيم تلّا ݣ لعمر نّس تسعا ؤتسعين ن-ؤسݣّاس.
25 أها تيلي غر سماعيل تلطاعش ن-ؤسݣّاس.
26 ݣ واسّ نّا أيد-ئعديل سيدنا إبراهيم د ممّيس سماعيل
27 د-ئوتمان كول نّا ئلّان ݣ-ؤسون ن سيدنا إبراهيم د-ئحرضان نّا غيرس ئلالن د وينّا ئسغا زݣ شا ؤبرّاني.