21
تالاليت ن إسحاق
1 داي ئبارك مولانا سارا أها ئݣاس أينّا س ئقاول.
2 داي تاسي أل تّارو أها تورْو سارا يون ؤربا يي سيدنا إبراهيم ݣ توسر نّس. ݣ لوقت نّا ئنّا ربّي.
3 داي ئݣ سيدنا إبراهيم ئسم يي وربا نّا س تورْو سارا: إسحاق.
4 أها ئعديلاس لّيݣ تلّا ݣ لعمر نّس تمانيا ن ووسان أم ؤينّا ئنّا ربّي.
5 داي لّيݣ ئلال إسحاق تلّا غر سيدنا إبراهيم ميّا ن-ؤسݣّاس.
6 داي تنّا سارا: «ئسّفرحيي ربّي أها ئسّطصيي د كول وينّا ئسلان يي تلاليت ن إسحاق ئدّا أد ئطّص أݣيدي». a
7 داي تنّا ألّو: «مايد ئنّان ئس تدّا سارا أت تصّوطّض ئشيرّان يي إبراهيم؟ ئوا ها نكّين ئروخاس يون ؤربا ݣ توسر نّس!»
8 داي ئمغور ؤربا. أها تكساس مايس ئفّ. داي ئݣ سيدنا إبراهيم يوت ن زردا تاخاتارت ݣ واسّ نّا.
ؤژوع ن هاجر د سماعيل
9 داي تانّاي سارا أربا نّا تورْو هاجر تاميصريت يي سيدنا إبراهيم لا ئتحقّار إسحاق،
10 داي تنّا يي سيدنا إبراهيم: «ژّع تيسمغت-اد د ممّيس، ئدّخ ؤر ئخصّا يي ممّيس ن تسمغت أد ئورت د ممّي إسحاق».
11 داي ئطيراس يي سيدنا إبراهيم عنوݣّا زݣ واوال-اد، ئدّخ سماعيل ممّيس أيد ئݣا أود نتّا.
12 ماشان ربّي ئنّاياس: «أد ؤر-أك ئتطيّار خف ؤربا د تسمغت نّك. ݣ كول أينّا ش تنّا سارا ئدّخ زݣ إسحاق أس تدّا أد غورش تيلي تاروا نّا ش قولخ.
13 ئد ممّيس ن تسمغت نّك دّيخ أود نتّا أد ݣخ زيكس يون لݣنس، ئدّخ ئݣا ممّيش».
14 تيفوت زيك، ئكر سيدنا إبراهيم ياسي أغروم د-ؤݣّديد ن وامان، ئݣتن يي هاجر خف تاداوت أها ئژّعت نتّات د-ؤربا. داي تدّو تاشك ݣ صّحرا ن بئر سبع.
15 داي نتّا قضان وامان زݣ ؤݣدّيد، تادج أربا دّاو ن يان ؤسكلو،
16 داي تدّو زيكس س-أم ميّا ن-ؤسوريف، ئدّخ تنّا ݣ-ئخف نّس: «ؤر رّيخ أد أنّايخ ممّي لا ئتمتات». أها تقّيم بنيداس أل تسغويّو أل ترو.
لمالاك ن ربّي دا ئساوال يي هاجر
17 داي ئسلا ربّي يي يغويان ن-ؤربا. داي زݣ ئݣنّا ئغراد لملاك ن ربّي يي هاجر أها ئنّاياس: «ما شم يوغن أهاجر؟ أد ؤر تݣّد شا، هان ربّي ئسلا يي يغويان ن-ؤربا زݣ ماني ݣ توتجيت.
18 ئوا كّر سغيم أربا تامژداس أفوس أها تزّعيمت، ئدّخ دّيخ أد ݣخ زيكس يون ن لݣنس أخاتار».
19 داي ئرژم ربّي ألّن يي هاجر أها تانّاي يان ن وانو. داي تدّو تعمر أݣّديد أها توش يي ممّيس أد-ئسو.
20 داي ئحضو ربّي أربا لّيݣ أل-ئتمغور. داي ئزدغ ݣ صّحرا ن فاران، أها ئݣ أصيّاد أخاتار.
21 تاولاس مايس تامطّوطّ زݣ تمازيرت ن مصر.
إبراهيم دا يتݣّا تاضا د أبيمالك
22 داي ݣ لوقت نّا، ئمّون ؤݣلّيد أبيمالك د فيكول أخاتار ن لعسكر نّس غر سيدنا إبراهيم أها ئنّاياس: «هان ربّي ئصخّراش أينّا تݣّاد كول.
23 عفاك، دغي، ݣالّيي س ربّي ئس ؤر يي تغضّرد نكّين د-ئشيرّان ئنو د تاروا نو، والاينّي أد يي تݣد لخير أم ؤينّاش ݣيخ أها تݣت يي تمازيرت-اد نّاݣ تݣيد أغريب».
24 داي ئݣّالّاس سيدنا إبراهيم يي أبيماليك.
25 أها ئلامّات خف نّيرت ن وانو نّا س كسن ئسمغان نّس.
26 داي ئنّاياس أبيمالك: «ؤر سّينخ مايد ئݣان أياد. شݣّين شا ؤر يي تنّيد، ئد نكّين شا ؤر-اس سليخ أل أسّ-اد».
27 داي ئوش سيدنا إبراهيم يي أبيمالك ؤلّي د تغطّن د-ئزيار أها ݣين تاضا ئنݣراسن.
28 داي ئرار سيدنا إبراهيم سبعا ن تيخسيوين خف ئديس.
29 داي ئنّاياس أبيمالك: «مّاخ ألّيݣ ترّيد تيخسيوين-اد س سبعا خف ئديس؟»
30 داي ئنّاياس سيدنا إبراهيم: «تيخسيوين-اد س سبعا دا ش تن أكّاخ حما أد ݣين تاماتارت ئد نكّين أيد ئغزان أنوياد».
31 أياد أخف مي دا س تّينين يي ودغار نّا: «بئر سبع»، ئدّخ ئݣّول سيدنا إبراهيم د أبيمالك دينّا.