15
تاضا ن مولانا د أبرام
1 داي فّير ن-ؤينّا، ئفّغد مولانا غر أبرام ݣ توارجيت أها ئنّاياس: «أد ؤر تݣّود أيابرام! نكّين أغا ش-ئحضون أها وشخاك تموشي تاخاتارت».
2 ماشان أبرام ئنّاياس: «أمولانا، باب ئنو، ماتّا نّفع ئلّان ݣ-ؤينّا غا يي توشد؟ ؤر غوري ئشيرّان، أورّات ئنو أليعازر أدمشقي، ئسمغ ئنو»
3 داي ئزايد أبرام ئنّاياس ألّو: «ؤر يي توشيد تاروا د ونّا غا يي ئورتن يون زݣ ئسمغان ئنو نّا ئلالن غيري».
4 داي ئرار غيفس مولانا ئنّاياس: «أراح، ؤر-ئد أليعازر أدمشقي أغا ش-ئورتن، ماشان ونّا ئدّان أد ئلال زݣ ديسّت نّك أغا ش-ئورتن».
5 داي ئسّوفّغت مولانا غر برّا أها ئنّاياس: «سموقّل ݣ-ئݣنّا أها تحاسبد ئتران مش تغيد أت تن تحاسبد». داي ئنّاياس ألّو: «هاتين ئمشي أغا تݣ تاروا نّك».
6 داي يامّن أبرام ئسّ، أياد أخف ت-ئحاسب مولانا د أرݣاز ئصلحن.
7 داي ئنّاياس: «نكّين أيد-ئݣان مولانا نّا ك-ئسوفغن زݣ تمدينت ن أُورْ ن-ئكلدانيين حما أد-اش وشخ تامازيرت-اد نّاݣ تزدغد أها تݣ تينّش».
8 داي ئنّا أبرام: «أمولانا، باب ئنو، ماس غا ييسينخ ئس تدّا أت تݣ تينو؟»
9 داي ئرار غيفس مولانا ئنّاياس: «أويييد يوت ن تݣنوزت د يوت ن تاغاط د يون ؤحولي، أد ييلي ݣ لعمر ن كويون ديكسن شارض ن-ئسݣّاسن د يوت ن كورمن a د يوت ن تتبيرت».
10 داي ياويد أبرام لبهايم-اد كول، ئبّيتن منصّا أها ئݣ كو نّص بنيد ن-ؤماس، ئد ئجضاض ؤر تن ئبّي.
11 داي رسن طّيور نّا ئتتّان أكسوم خف لݣنازات، ماشان أبرام أر تن ئتژّع.
12 نتّا تدجاور تافوشت أت تغلي، ئݣن أبرام يان ؤندم ئژاين. داي ترس غيفس يوت ن تالست تابخانت أها ئݣّود عنوݣا.
13 داي ئفغد غيرس مولانا أها ئنّاياس: «هاتين ئخصاش أت تّيسيند ئس تدّا تاروا نّش أت تݣ تاغريبت ݣ يوت ن تمازيرت ياضن، ݣين ديكس ئسمغان أها تّوحقرن ربع ميّا ن-ؤسݣّاس.
14 والاينّي دّيخ أد حشمخ خف لقوم نّا تن ئݣان د-ئحرضان أها فّغن زيكسن فّير ن-ؤينّا س شايݣان ن لخير.
15 ئد شݣين تديد أت تمّت ݣ لهنا أها تّونضلد ضارت ن ماي تزّريد توسر نّك ݣ-ؤطرح.
16 داي ݣ لجيل ويسّ ربع تدّا أت تاغول تاروا نّك غر داد! ئدّخ دغي تسول لمعصيت ن-ئموريين ؤر تزري لحدّ نّس حما أت تن ژّعخ.
17 داي فّير ن ماي تغلي تافوشت، تقّن تالست تابخانت. شوي ئضهرد يون لمجمر ن واݣّو د يون ؤصفض ن لعافيت ئزريد ئنݣر لبهايم نّا ئتوابين منصّا.
أقاول ن ربّي يي أبرام