14
ئمنغي ن-ئݣليدن
1 داي ݣ-ؤسّان نّا، ئكر أمرافل أݣلّيد ن شنعار د أريوك أݣلّيد ن لاسار د كدرلعومر أݣلّيد ن عيلام د تدعال أݣلّيد ن ݣوييم،
2 داي ناغن د بارع أݣلّيد ن سدوم د برشاع أݣلّيد ن عمورة د شنآب أݣلّيد ن أدما د شمئيبر أݣلّيد ن صبوييم د-ؤݣلّيد ن بالع تامازيرت نّا مي تّينين صوغر.
3 ئݣلّيدن-اد س خمسا مساسان أها سمون لعسكر نّسن ݣ تمازيرت ن سَدِيم، أدغار نّاݣ-ئلّا أسّ-اد لبحر الميت.
4 يوفاتنيد لحال، تناعش ن-ؤسݣّاس أي لّان دّاو ن تنباط ن كدرلعومر، ماشان ݣ-ؤسݣّاس ويسّ تلطاعش سكرن تاغوّاغت.
5 داي ݣ-ؤسݣّاس ويسّ ربعطاعش، كدرلعومر د-ئݣلّيدن د مي ئمساسا ݣان دّاو ن تنباط نّسن ديخ ألتو ئرفايين ݣ عشتاروت قرنايم د-ئزوزيين ݣ هام د-ئميين ݣ شوى قريَتايم.
6 داي رنون أود ئحوريين ݣ عاري ن سعير أها تابعنتن ألّيݣ ن-ئوضن فاران نّا ئلّان تاما ن صّحرا.
7 داي أغولند غر عين مشفاط نّا مي تّينين قاديش أها ݣين تامازيرت ن-ئعملاقيين كول دّاو ن تنباط نّسن د-ئموريين نّا ئزدغن ݣ حصون تامار.
8 داي ئفغد ؤݣلّيد ن سدوم د-ؤݣلّيد ن عمورة د-ؤݣلّيد ن أدما د-ؤݣلّيد ن صبوئم د-ؤݣلّيد ن بالع نّا مي تّينين صوغرأها ݣين ݣيرّا ݣ تمازيرت ن سَدِيم،
9 د كدرلعومر أݣلّيد ن عيلام د تدعال أݣلّيد ن ݣوييم د أمرافل أݣلّيد ن شنعار د أريوك أݣلّيد ن لاسار. ربعا ن-ئݣلّيدن منيد ن خمسا.
10 داي ييلين ݣ تمازيرت ن سديم شايݣان ن-ئحفران ن لّاتوخ. داي ئرول ؤݣلّيد ن سدوم د-ؤݣلّيد ن عمورة أها تّوتين ديكسن، ئد وييّاض رولن غر عاري.
11 داي ياوي كدرلعومر د-ئݣلّيدن نّا أݣّيدس ئلّان أينّا ئلّان كول غر أيت سدوم د عمورة أها أسين-اسن أود تاماتشا، دّون ئبردان نّسن.
12 أها أوين أݣّيدسن أود لوط، ممّيس ن-ؤماس ن أبرام نّا ئزدغن ݣ سدوم د لمال نّس.
أبرام دا ئتفوكّا لوط
13 داي ئدّود يان ؤرݣاز ئرولن أها ئعلماس يي أبرام أعبراني نّا ئزدغن غر يّان ؤسكلو نّا مي تّينين تاسافت ن ممرا أموري. ممرا أموري ؤماس ن أشكول د عانر، شّارض نّسن موشان لعاهد د أبرام أد رّن لعدو.
14 داي نتّا ئسلا أبرام ئس ئتوامژ ممّيس ن-ؤماس، ئكّر ئسمون تلت ميّا د تمنطاعش ن-ؤرݣاز زݣ ئحرضان نّس زݣ وينّا ئدربن أم ئعسكريين نّا ئلالن ݣ-ئخامن نّس أها ئتفار ئعداون نّس أل تامدينت ن دان.
15 داي ݣ-ييض، ئبضو أبرام ئرݣزن نّس خف شايݣان ن تربّاع. داي ئهجم خف ئنضليبن نّس، ئرّوتن أها ئژّعتن أل تمدينت ن حوبا نّا ئلّان ݣ-ئديس أزلماض ن دمشق.
16 داي ئرارد لمال كول أها ئفوكّاد لوط ممّيس ن-ؤماس د-ؤينّا ئݣان وينّس كول د تعيالين د-ئحبّاسن ضنيني.
ملكي صادق دا ئتباراك أبرام
17 داي لّيݣ د ياغول أبرام فّير ن مايد ئرّا كدرلعومر د-ئݣلّيدن نّا أݣّيدس ئلّان، ئفّغد ؤݣلّيد ن سدوم أت تينّال ݣ تالات ن شوى نّا مي تّينين تالات ؤݣلّيد.
18 داي ياويد ملكي صادق نّا ئݣان أݣلّيد ن ساليم، ئݣ أخاتار ن دين ن ربّي أنافلّا، أغروم د شراب.
19 داي ئسبارك أبرام أها ئنّاياس: «ربّي أنافلّا نّا ئخلقن ئݣنّا د واشال أك ئبارك!
20 تانمّيرت يي ربّي أنافلّا نّا ك-ئوشان تانباطّ خف ئنضليبن نّش». داي ئوش أبرام لعشور زݣ ؤينّا د-ئرّا كول زݣ ئمنغي يي ملكي صادق.
21 ئد أݣلّيد ن سدوم ئنّا يي أبرام: «ؤشيي ئحبّاسن نّا تفوكّاد ماشان أينّا ترّيد زݣ ئمنغي أمژيت يي ئخف نّش».
22 داي ئنّاياس أبرام: «ݣولّيخ س مولانا، ربّي أنافلّا نّا ئخلقن ئݣنّا د واشال،
23 ئس-ؤر تّاويخ أود حاح زݣ ؤيدّا نّك أد ئݣ ئفيلي نغد ئزيكر ن واركاسن، حما ؤر-يي تينيد: "نكين أيد ئوشان لمال يي أبرام".
24 ؤر تّاويخ غاس أينّا تشان ئرݣزن ئنو، ئد عانر د أشكول د ممرا نّا أݣّيدي ئمّون وشاسن أمور نّسن».