13
أعايد ن أبرام زݣ مصر
1 داي ئعّايد أبرام زݣ تمازيرت ن مصر، نتّا د تمطّوطّ نّس د لمال نّس د لوط غر صّحرا ن النقب.
2 أها يغول أبرام ئدجيون عنوݣّا: ئلّا غيرس شايݣان ن لمال د نّقرت د دّهب.
3 داي ئݣّادج زݣ صّحرا ن النقب. أها ئقّيم أل ئتموتّوي زݣ وانسا غر وياض ألّيݣ ن ييوض ئنݣر بيت إيل د عاي، أدغار نّاݣ ئصكا أخام،
4 نّاݣ ئبنا تيزويري أسغرص. أها ئژّول ألّو س-ئسم ن مولانا.
بطّو ن أبرام د لوط
5 لوط نّا ئمون د أبرام، غيرس أيد نتّا لمال نّس: ؤلّي د تغطن د-ئزݣار أها غيرس أيد ئخامن.
6 داي ؤر تن توسي تمازيرت حما أد قّيمن ݣ يون ؤدغار، ئدّخ ئعدا لمال نّسن.
7 أها أرتناغن ئمكساون ن أبرام د-ئمكساون ن لوط. داي ؤݣار ن-ؤينّا، سولن ئكنعانيين د-ئفريزيين أود نيتني ݣ تمازيرت.
8 داي ئنّا أبرام يي لوط: «عفاك، ؤر تّيلين ئمنغان ئنݣري أݣّيك د-ئنݣر ئمكساون نّخ، ئدّخ أوماتن أي نݣا.
9 هان تامازيرت كول دات-اش! أورا أنبضو، مش تدّيد غر ئديس أژلماض، أد دّوخ غر ئديس أفاسي، نغد مش تدّيد غر ئديس أفاسي، أد دّوخ غر ئديس أژلماض».
لوط ئستي سدوم
10 داي ئهزّا لوط ألّن نّس أها يانّاي تامازيرت ن الأردن أل تامدينت ن صوغر، تلّا كول دّاو ن ترݣا، تݣا أم دّجنت، أم تمازيرت ن مصر، دات ن مايد ئخلا مولانا تامدينت ن سدوم د عمورا.
11 داي ئختار لوط تامازيرت ن الاردن أها ئݣّادج غر تنيلا ن-ؤنقّر ن تافوكت. ئمشيد أس ئبضا أبرام د لوط.
12 داي ئقّيم أبرام ݣ تمازيرت ن كنعان، ئد لوط ئزدغ ݣ تمازيرت ن الاردن أها ئسكا أخام نّس طرف ن تمدينت ن سدوم.
13 ئمزداغ ن تمدينت-اد ؤر حلين أها أل تعصون مولانا شايݣان.
14 ئسيول مولانا يي أبرام فّير ن مايد ئبضا د لوط، ئنّاياس: «راعا زݣ ؤدغار نّاݣ تلّيد غر ئديس أفاسي د-ئديس أژلماض أها تانايد ألّو غر ئديس ن-ؤنقّر د-ئديس ن-ؤغلّوي ن تافوكت،
15 هان تامازيرت-اد نّاݣ تراعاد دّيخ أد-اك توشخ شݣّين د تاروا نّك أبدا
16 أها سوعدّوخ تاروا نك أنشت ن تاتشا ن واشال، داي ئدّخ ؤر ئتّيغي أود يون أد ئحاسب تاتشا هاتين ؤرئدّي أد ئحاسب تاروا نّك.
17 دّو سّارا ݣ تمازيرت س تاغزي د تيروت، ئدّخ كي أمي غا توشخ».
18 داي ئݣّادج أبرام س-ئخامن نّس غر ئسكلا نّا مي تّنين تيسوفا ن ممرا تاما ن تمدينت ن حبرون، أها ئبنو دينّا يون ؤسغرص يي مولانا.