12
مولانا دا ئساوال يي أبرام
1 داي ئنّاياس مولانا يي أبرام: «ݣّادج زݣ تمازيرت نّش، زݣ تقبيلت نّك، زݣ أيت ؤخام نّش أها تدود غر تمازيرت نّا دّيخ أد-اش سنعتخ.
2 دّيخ أد ݣخ زّيك يون ن لݣنس أخاتار، ݣخ ديك لباركا، سّمغورخ أدّور نّش أها تݣد أنبارك خف وييّاض.
3 بارشخ وينّا ش-ئتباراكن، رݣمخ وينّا ش-ئترݣامن أها ݣ-ؤدم نّش، دّيخ أد ݣخ لباراكا ݣ لݣنوس ن دّونيت كول».
4 داي ئݣّادج أبرام أم ؤينّا س-ئنّا مولانا أها ئمّون أݣّيدس لوط. لّيݣ ئݣّودجا أبرام زݣ تمدينت ن حاران تلّا ݣ لعمر نّس خمسا ؤسبعين ن-ؤسݣّاس.
5 داي تمّون أݣّيدس ساراي تامطّوطّ نّس د لوط ممّيس ن-ؤماس. أها ياوين أݣّيدسن كول أينّا سمون. أوين أود ئحرضان نّا سغان ݣ تمدينت ن حاران. داي واعدن تامازيرت ن كنعان.
6 لّيݣ ن-ئوضن تامازيرت ن كنعان، شوقّانت ألّيݣ نفّغن غر يون ؤخليدج ئسم نّس تاسافت ن مورا نّا ئلّان ݣ تمدينت ن شكيم. لوقت نّا، سولن ئكنعانيين زدغن ݣ تمازيرت نّا.
7 داي ئفغد مولانا غر أبرام أها ئنّاياس: «تاروا نّش أمي غا وشخ تامازيرت-اد». داي ئكّر أبرام ئبنو يان ؤدغار يي تغراصا ن تمغراص يي مولانا نّا غيرس د-ئفغن.
8 داي ئݣّادج زݣ وانسا نّا غر عاري نّا ئلّان ݣ-ئديس ن-ؤنقّر ن تافوكت يي تمدينت ن بيت إيل. أها ئسك تاخانت نّس ئنݣر تامدينت ن بيت إيل نّا ئلّان ݣ-ئديس ن-ؤغلّوي ن تافوكت د تمدينت ن عاي نّا ئلّان ݣ-ئديس ن-ؤنقّر ن تافوكت. داي ئبنو ألّو يان ؤسغرص أها ئژال س-ئسم ن مولانا.
9 ئقيم أبرام أل ئتموتّوي زݣ ؤدغار غر واياض أها ئدّو تانيلا ن صّحرا ن النقب.
أبرام ݣ تمازيرت ن مصر
10 داي ئدّو أبرام غر تمازيرت ن مصر أد ديكس ئعزّب، ئدّخ ئكّر يون بوهيوف ئحرّان ݣ تمازيرت ن كنعان.
11 نتّا دجاورن تامازيرت ن مصر، ئنّا يي تمطّوطّ نّس ساراي: «هاتين سنخ ئس تݣيد زّين.
12 أدّاي شم أنّاين ئمصريين دّان أد ئنين: "تامطّوطّ نّس أياد". دّان أد يي نغين أها أدجينكم.
13 ئوا عفام، ئنياسن ؤلتما أي تݣيد، حما أد ديݣي نهلّان ݣ-ؤدم نّم أها ؤر يي نقّين».
14 لّيݣ ن ييوض أبرام تامازيرت ن مصر، أنّاين ئمصريين تامطّوطّ نّس ئس تݣا زّين شايݣان.
15 غاس علانت ئنمغورن ن فرعون، دّون سيولن-أس خف زّين ن تمطّوطّ أها أويناست غر تادّارت نّس.
16 داي ݣ-ؤدم ن ساراي ئنهلّا فرعون ݣ أبرام. ئوشاس ؤلّي د تغطن د-ئزݣار د-ئغيال د تغيال د-ئسمغان د تسمغين د-ئلغمان.
17 داي ئوّت مولانا فرعون د أيت ؤخام نّس س شايݣان ن-ئغنشاتن وعرنين خف نّيرت ن ساراي تامطّوطّ ن أبرام.
18 داي ئغرد فرعون يي أبرام، ئنّاياس: «مّاخ ألّيݣ يي تݣيد أياد! أها ؤر-يي تنيد ئد تامطّوطّ نّك أيد تݣا؟
19 مّاخ ألّيݣ تنّيد ؤلتماك أي تݣا ألّيݣ ئتيولخ؟ دغي، هان تامطّوطّ نّش أويت أها تدّود!»
20 داي ئوصا فرعون ئرݣزن نّس أد سّوفغن أبرام د تمطّوطّ نّس د لمال نّس يي تمازيرت.