11
لبرج ن بابل
1 ݣ لوقت-اد، ميدّن كول أل ساوالن س يون ئلس a د يون واوال.
2 داي لّيݣ أر تݣادجان زݣ تنيلا ن لقبلت، ؤفان يوك ن-ؤدغار ئݣا لوطا ݣ تمازيرت ن شنعار أها زدغن ديكس.
3 داي ميونان ئنݣراسن: «أوْريوات أنعديل أطّوب أها نسݣّيت عنوݣا». داي أر تݣين أطّوب ݣ وانسا ن-ئژرا د زفت ݣ وانسا ن تالاخت. b
4 داي نّان ألّو: «أوْريو أنبنو شان تمدينت د شان لبرج أها ياوض ئخف نّس ئݣنّا. نسّمغور أدّور نّخ حما ؤر نتمزلاع خف وودم ن واشال».
5 ئسرحد مولانا زݣ ئݣنا حما أد يانّاي تامدينت د لبرج نّا أل ؤبنون أراو ن-أدام.
6 أها ئنّا: «هاتنين دا تمّون أد ݣين غاس يان لݣنس، أد سيولن س يان ئلس. مش بدان أد ݣين أياد، ؤر-ئدّي أد ييلي ماغا تن ئحصر زݣ ؤينّا ران أد ݣين.
7 أوْريو أنضر غيرسن، نسّرْوي أوال نّسن حما ؤر ئتّيسين أود يوك مايدا ئتيني واياض».
8 داي ئسلّوزعتن مولانا خف وودم ن واشال. ؤر شمّيلن لبني ن تمدينت.
9 أياد أخف مي دا س تّينين يي تمدينت نّا "بابل" لمعنا ن-ئسم-اد "أسّرْوي"، ئدّخ ديس أݣ-ئسّرْوي مولانا أوال ن-ئمزداغ ن واشال أها ئسلّوزعتن خف وودم ن واشال.
تاروا ن سام
10 تاد أيد ئݣان لقيست ن تاروا ن سام. داي لّيݣ تزري عاماين فّير ن ماي تاقوم دّونيت س وامان، تلّا ݣ لعمر ن سام ميّا ن-ؤسݣّاس، يورْو أرفكشاد.
11 داي ييدير سام ألّو فّير ن تلاليت ن أرفكشاد خمس ميّا ن-ؤسݣّاس أها يورْو ئشيرّان د تشيرّاتين ضنيني.
12 داي لّيݣ تلّا ݣ لعمر ن-أرفكشاد خمسا ؤتلاتين ن-ؤسݣاس، يورْو شالح.
13 داي ييدير أرفكشاد ألّو فّير ن تلاليت ن شالح ربع ميّا د شراض ن-ؤسݣّاس أها يورْو ئشيرّان د تشيرّاتين ضنيني.
14 داي لّيݣ تلّا ݣ لعمر ن شالح تلاتين ن-ؤسݣّاس، يورْو عابر.
15 داي ييدير شالح ألّو فّير ن تلاليت ن عابر ربع ميّا د شراض ن-ؤسݣّاس أها يورْو ئشيرّان د تشيرّاتين ضنيني.
16 داي لّيݣ تلّا ݣ لعمر ن عابر ربعا ؤتلاتين ن-ؤسݣاس، يورْو فالج.
17 داي ييدير عابر ألّو فّير ن تلاليت ن فالج ربع ميّا د تلاتين ن-ؤسݣاس أها يورْو ئشيرّان د تشيرّاتين ضنيني.
18 داي لّيݣ تلّا ݣ لعمر ن فالج تلاتين ن-ؤسݣاس، يورْو رعو.
19 داي ييدير فالج ألّو فّير ن تلاليت ن رعو ميتاين د تسعا ن-ؤسݣّاس أها يورْو ئشيرّان د تشيرّاتين ضنيني.
20 داي لّيݣ تلّا ݣ لعمر ن رعو تناين ؤتلاتين ن-ؤسݣّاس، يورْو سروج.
21 داي ييدير رعو ألّو فّير ن تلاليت ن سروج ميتاين د سبعا ن-ؤسݣّاس أها يورْو ئشيرّان د تشيرّاتين ضنيني.
22 داي لّيݣ تلّا ݣ لعمر ن سروج تلاتين ن-ؤسݣّاس، يورْو ناحور.
23 داي ييدير سروج ألّو فّير ن تلاليت ن ناحور ميتاين ن-ؤسݣّاس أها يورْو ئشيرّان د تشيرّاتين ضنيني.
24 داي لّيݣ تلّا ݣ لعمر ن ناحور تسعا ؤعشرين ن-ؤسݣّاس، يورْو تارح.
25 داي ييدير ناحور ألّو ضارت ن تلاليت ن تارح ميّا د تسعطاعش ن-ؤسݣّاس أها يورْو ئشيرّان د تشيرّاتين ضنيني.
26 داي لّيݣ تلّا ݣ لعمر ن تارح سبعين ن-ؤسݣّاس، لّان غيرس شارض ن-ئشيرّان أبرام د ناحور د هاران.
تاروا ن تارح
27 تاد أيد ئݣان لقيست ن تاروا ن تارح: أبرام د ناحور د هاران. داي يارو هاران لوط.
28 داي ئمّت هاران دات ن-ئبّاس تارح ݣ تمدينت ن أُور ݣ تمازيرت ن-ئكلدانيين نّاݣ ئتوارْو.
29 ئد أبرام ئلا ساراي، ئد ناحور ئلا ملكا ؤلتماس ن-ئسكا، ئسّيس ن هاران.
30 ئد ساراي تݣا تيݣّرت، ؤغا تّارْو.