10
1 تاد أيد ئݣان لقيست ن تاروا ن سيدنا نوح: سام، حام، يافات د واراو نّسن نّا ئلالن فّير ن تاقومت ن دّونيت س وامان.
تاروا ن يافات
2 أراو ن يافات: جومر، ماجوج، ماداي، ياوان، توبال، ماشك د تيراس.
3 ئد أراو ن جومر: أشكناز، ريفات د توݣرما.
4 أراو ن ياوان: أليشا، ترشيش، كتيم د رودانيم.
5 زݣ ويدخ أيد فغن ئمزداغ ن تݣزيرين د تميزار نّا ئلّان تاما ن لبحر أها بضون خف تميزار خف لحساب ن واوال نّسن د تقبيلين نّسن د لݣنسّ نّسن.
تاروا ن حام
6 أراو ن حام: كوش، مصرايم، فوط د كنعان.
7 ئد أراو ن كوش: سبا، حويل، سبتا، رعما د سبتكا. أراو ن رعما: سبا د دَدان.
8 داي يورْو كوش ألّو نمرود. نتّا أيد ئݣان أنبّاض أمزْوارو ݣ دونيت.
9 ئݣ يون ؤصياد أخاتار غر مولانا. خف ؤياد دا تينين ميدّن خف ئصيّادن ئخاتارن: «أصياد أخاتار أم نمرود غر مولانا».
10 تيمدينين تيمزوورا نّا ئݣان تيخاتارين ݣ تݣلديت نّس: بابل، أرك، أكد د كلنا ݣ تمازيرت ن شنعار.
11 داي ئفّغ زݣ تمازيرت-اد غر أشور أها ئبنو نينوا، رحوبوت عير، كالح
12 د رَسَن تامدينت تاخاتارت نّا ئلّان ئنݣر نينوا د كالح.
13 داي ئݣ مصرايم ئبّاس ن أيت لود د أيت عنام د أيت لهاب د أيت نفتوح
14 د أيت فتروس د أيت كفتور د أيت كسلو، نّا زݣ دّفّغن أيت فلسطين.
15 أها يورْو كنعان صيدون أمنزو نّس د-حثّا.
16 كنعان أيد ئݣان ئبّاس ن أيت يبوس د أيت أمور د أيت جرجاش
17 د أيت حوّي د أيت عرقي د أيت سّينيّي
18 د أيت أرواد د أيت صمار د أيت حمات. داي فّير ن-ؤينّا لّوزعنت تقبلين ن كنعان.
19 أها تامژ تمازيرت ن كنعان زݣ صيدون أل غَزَّة أدّاي نيري أندّو غر جرار، د أل لاشع أدّاي نيري أندّو غر سدوم، عمورا، أدما د صبوييم.
20 ويدّ أيد ئݣان أراو ن حام خف لحساب ن تقبيلين نّسن د واوال نّسن د تميزار نّسن د لݣنوس نّسن.
تاروا ن سام
21 سام أمنزو ن نوح، ؤماس ن يافات، نتّا أيد ئݣان ئبّاس ن أيت عابر كول أها لالناس ديخ ألتو ئشيرّان ياضن.
22 أراو ن سام: عيلام، أشور، أرفكشاد، لود د-أرام.
23 داي أراو ن أرام: عوص، حول، جاثر د ماش.
24 داي يورْو أرفكشاد: شالح ئبّاس ن عابر.
25 أها لالن يي عابر سين ن-ئفراخ: ئسم ن-ؤمزوارو فالج، لمعنا نّس: بطّو، ئدّخ ݣ-ؤسّان نّس أيد ئبضا واشال، ئد ؤماس ئسم نّس يقطان.
26 أها يورْو يقطان ألموداد، شالف، حضرموت، يارح،
27 هدورام، أوزال، ديقلا،
28 عوبال، أبيمايل، شبا،
29 أَوْفير، حويلا د يوباب. ويدخ قاح نّسن أراو ن يقطان
30 أها زدغن ئنݣر ميشا د عاري ن سفار ݣ لقبلت.
31 ويد أيد ئݣان أراو ن سام خف لحساب ن تقبيلين نّسن د واوال نّسن د تميزار نّسن د لݣنوس نّسن.
32 تادّ أيد ئݣان لقيست ن تيقبيلين ن واراو ن سيدنا نوح، خف لحساب ن طّاصيلا نّسن د لݣنوس نّسن. أها زيكسن أيد فغن لݣنوس كول نّا ئلّوزعن خف واشال فّير ن تاقومت ن دّونيت س وامان.