9
ربّي دا ئتباراك سيدنا نوح د واراو نّس
1 داي ئبارش ربّي سيدنا نوح د واراو نّس أها ئنّاياسن: «مساراوات توعدّوم تعمرم أشال
2 أها أر زيݣون تݣّدن، أر زيݣون تخلاعن كول لبهايم د لوحوش ن واشال د-ئجضاض ن-ئݣنّا كول د كول مايد ئتمرورودن خف واشال د-ئسلمان ن لبحر كول. ݣيخاونتن دّاو ن-ئفاسّن نّون.
3 د مايد ئدّرن أر ئتمرورود أد-اون ئݣ ؤتشي، أم توݣا د لخوضرت، كولشي داون تاكّاخ.
4 ماشان غوراون أت تتّيم أكسوم س-ئدامّن نّس، ئدّخ تودرت تلّا ݣ-ئدامّن.
5 ئد ئدامّن نّون كونّي نّا ئݣان تودرت نّون، هاتين دّيخ نكّين أد غيفسن ترخ س تّحقيق دّييت زݣ مايد ئݣان لبهيمت كول د لوحوش كول نغد بنادم نّا تن ئنغلن. دّيخ أت تّرخ دّييت زݣ ونّا ئنغلن ئدامّن ن مايد ئݣان بنادم كول.
6 ئدّخ ربّي ئعديل بنادم خف صّورت نّس، هان ونّا ئنغان بنادم ئدّا أد ئتّونغ.
7 ئد كونّي، تّارويات خف واشال توعدّوم، أر تمساراوم أها تعدّوم ديكس».
ربّي دا ئتّݣ تاضا د سيدنا نوح
8 ئسيول ربّي يي سيدنا نوح د واراو نّس أݣّيدس ئناياسن:
9 «ها نكّين دّيخ أد ݣخ تاضا نو أݣّيدون د-ئرْو نّون ضاراون
10 د ويسّ ݣ-ئلّا ؤنفوس ئدّرن كول نّا ئلّان أݣّيدون: ئجضاض د لبهايم د مايد ئݣان لوحوش ن واشال، زݣ ويسّ كول نّا ديفّغن زݣ ؤغرّابو د وينّا ئدّان أد زدغن ݣ واشال كول.
11 دغي، دا ݣيخ تاضا نو أݣّيدون: ؤسار ؤخلّوخ ونّا ئدّرن كول س وامان ن تاقومت ديخ ألتو د-ؤسار تّيلين وامان ن تاقومت ديخ ألّو حما أد خلون أشال».
12 داي ئنّاياس ربّي: «تاد أيد ئݣان تاماتارت ن تاضا نّا ݣيخ ئنݣري د-اݣّيدون أل تينݣيرا ن دّونيت د-ئنݣر كول ماݣ ئلّا ؤنفوس ئدّرن نّا ئلّان أݣّيدون.
13 ها نكّين ݣيخ تيسليت ن-ؤنژار ݣ-ؤسݣنيو، أت تݣ تاماتارت ن تاضا ئنݣري د-ئنݣر ن واشال.
14 داي أدّاي ݣخ أسݣنيو نّيݣ واشال أها تيلي تسليت ن-ؤنژار ݣ-ؤسݣنيو،
15 دّيخ أد شتيخ تاضا نو نّا ئلّان ئنݣري د-أݣّيدون د-ئنݣر ن مايد ئدّرن. د-ؤسار دّين وامان أد ݣين وين تاقومت ديخ ألتو حما ؤر يوخلّو مايد ئدّرن كول.
16 أدّاي تيلي تسليت ن-ؤنژار ݣ ؤسݣنيو، دّيخ أت تانّايخ حما أد شتيخ تاضا ن وابدا نّا ئلّان ئنݣري د-ئنݣر مايد ئدّرن كول خف واشال».
17 أها ئنّاياس ربّي يي سيدنا نوح: «تاد أيد ئݣان تاماتارت ن تاضا نّا ݣيخ نكّين ئنݣري د-ئنݣر ن مايد ئدّرن كول خف واشال».
تاروا ن سيدنا نوح
18 داي واراو ن سيدنا نوح ويدّخ د-ئفّغن زݣ ؤغرّابو: سام د حام د يافات. أها ئݣ حام ئبّاس ن كنعان.
19 ويدّخ س شراض أݣّان أراو ن سيدنا نوح. داي زݣ ويدّخ أزݣ لالن ميدّن نّا ئلّان ݣ واشال كول.
أرݣام ن كنعان د-ؤبارك ن سام
20 ئبدو سيدنا نوح أد-ئݣ أفلّاح أها ئژّو شا ن دّيليت. a
21 داي ئسو زݣ شراب أها ئدوّخ. داي ئقّيم حژّوضي جاج ن-ؤخام نّس.
22 أها ئعلو حام، ئبّاس ن كنعان لعورت ن-ئبّاس، ئكّر يينيت يي أيتماس سّين نّسن ݣ برّا.
23 ياسي سام د يافات ييتس ن-ئعبان أها ݣينتن خف ئغيرن نّسن، أر تدون س تاندفّرت ألّيݣ غمسن يي ئبّاتسن، رّين ؤدماون نّسن غر ضارسن حما ؤر تّانّاين ئبّاتسن حژّوضي.
24 داي لّيݣ د-ئفافا سيدنا نوح أها ياشكاس ؤدوّخ، ئسّن أينّا س-ئݣا ممّيس أمژيان.
25 أها ئنّا سيدنا نوح:
«ئتونعل كنعان! b
ئسمغ ن-ئسمغان
أغا ئݣ وين أيتماس!»
26 أها ئنّا ألّو:
«أد حمدن ميدّن كول مولانا،
ربّي نّا ئتعباد سام،
أها ئݣ كنعان ئسمغ ن سام.
27 دا تتّرخ ألّو: أد ئسّوسع ربّي خف يافات،
أد ئزدغ ݣ-ئخامن ن سام.
داي ئݣاسن كنعان ئسمغ».