8
تينݣيرا ن تاقومت ن دونيت
1 ماشان ربّي ؤر ئتّو سيدنا نوح د لوحوش كول د لبهايم كول نّا أݣّيدس ئلّان ݣ-ؤغرّابو. يازند ربّي يون ن-ؤزݣو خف واشال، داي أر تدروسن وامان،
2 ئقنّ ئغبولا ن وامان ئنادّاتن د-ئخبا ن-ئݣنّا أها ئسبد أنژار زݣ ئݣنّا.
3 أغولن وامان أر تعايادن شوي شوي زݣ واشال أها أر تدروسن ضارت ن ميّا د خمسين ن واسّ.
4 ݣ وايور ويسّ سبعا، ݣ واسّ ويسّ سبعطاعش زݣ وايور، أيد ئبدّا ؤغرّابو خف لعواري ن أراراط.
5 قيمن وامان كوتوال أر تدروسن أل أيور ويسّ عشرا. داي ݣ واسّ أمزْوارو ن وايور ويسّ عشرا سيݣّند واشيون ن لعواري.
أزان ن-ؤهاقار د تتبيرت
6 داي ضارت ن ربعين ن واسّ، سيدنا نوح ئرژم تارياحت نّا ئݣا يي وغرّابو
7 أها يازن أهقّار. ئقيم ؤهاقّار أر ئتدّو، ياغولد، شايݣان ن تيكّال ألّيݣ ئزوا واشال زݣ وامان.
8 أها ياغول يازن ديخ ألتو تاتبيرت زݣ غورس حما أد يانّاي ئس دروسن وامان زݣ وودم ن واشال،
9 ماشان ؤر توفي تتبيرت أدغار ݣ تسروسا ئضارن نّس، تاغولد غورس غر س-أغرّابو. ئدّخ سولن وامان خف وودم ن واشال كول. ياژض أفوس نّس يامژت ئسّكشمتيد غورس س-أغرّابو.
10 أها ياݣ ئخف سبعا د-ؤسّان ياضن، ياغول يازن تاتبيرت زݣ ؤغرّابو،
11 داي تاغولد غورس تتبيرت غر تادوݣّات توسيد ݣ-ؤغنبو نّس أفر أزيݣزا ن-زّيتون نّا بحرا ئمغيد. داي ييسين سيدنا نوح ئس أغولن دروسن وامان زݣ واشال.
12 داي ياݣ ئخف ديخ ألتو سبعا د-ؤسان ياضن، يازن تاتبيرت أها ؤر ياد غورس تاغول سّفرت-اد.
13 داي ݣ واسّ أمزْوارو، ݣ-ؤيور أمزْوارو ن-ؤسݣّاس ويسّ ستّ ميّا د يون ن-ؤسݣّاس زݣ لعمر ن سيدنا نوح، زوان وامان زݣ واشال. أها ئكّس سيدنا نوح أغاميس يي ؤغرّابو يانّاي ؤدم ن واشال دا ئتغارا.
14 داي ݣ واسّ ويسّ سبعا ؤعشرين، ݣ وايور ويسّ سّين، ئزوا واشال كول.
ؤفوغ زݣ ؤغرّابو
15 ئسيول ربّي يي سيدنا نوح ئنّاياس:
16 «فغ زݣ ؤغرّابو، شݣّ د تمطّوطّ نّش د واراو نّش د توتمين ن وارو نّش أݣّيدش،
17 تسّوفغت كول أينّا ئدّرن نّا ئلّان أݣّيدش: ئجضاض د لبهايم د لوحوش د كول مايد ئتمرورودن خف ؤديس ݣ واشال، حما أت تعمّرن، ݣين ئفسان أها ؤعدّون.
18 ئكّر سيدنا نوح ئفغ د واراو نّس د تمطّوطّ نّس د توتمين ن واراو نّس أݣّيدس
19 د مايد ئدّرن كول خف واشال: لبهايم د لوحوش د مايد ئتمرورودن خف ؤديس د-ئجضاض. فغند س لارهيض نّسن زݣ ؤغرّابو.
سيدنا نوح دا ئتݣ تامغروصت يي مولانا
20 ئبنو سيدنا نوح يون ؤدغار ن تغرصا يي مولانا، أها يامژ زݣ كول مايد ئݣان لبهايم نّا ئحلّين د زݣ كول مايد ئݣان ئجضاض ئحلّين، داي ئݣّتن د تمغراص، ئسغوستن ݣ-ؤدغار ن تغرصا.
21 أها ئشضو مولانا رّيحت ن-ؤسغوس ن تمغراص أها تعجباس، داي ئنّا مولانا ݣ-ئخف نّس: «ؤسار تعاوادخ أد نعلخ أشال ديخ ألتو خف نّيرت ن بنادم، واخا ئخّا ؤخمّم ن وول ن بنادم زݣّوس ئمژّي. د-ؤسار تعاوادخ ديخ ألتو أد خلوخ وينّا ئدّرن كول نّسن أم ؤينّا ݣيخ.
22 داي ماحد ئسول واشال تدّا أت تيلي دّيما لوقت ن-ئفسان د-ؤمجر د-ؤسميض د لحما د-ؤنبدو د تݣرست د واسّ د-ييض».