7
أكشوم ن سيدنا نوح س-أغرابو
1 داي ئنّا مولانا يي سيدنا نوح: «كشم شݣّين د أيت ؤخام نّش كول س-أغرابو، ئدّخ غاس شݣ أيد أنّايخ تصلحت دات-يي ݣ ميدّن ن زّمان-اد،
2 أوي أݣّيدش زݣ مايد ئݣان كول لبهايم نّا ئحلّين، سبعا ن-ئوتمان د سبعا ن توتمين، د-يوت ن تيوݣا زݣ لبهايم نّا ئحرمن، أوتم د توتمت،
3 د زݣ ئجضاض ن-ئݣنّا ديخ ألتو سبعا ن-ئوتمان د سبعا ن توتمين حما أد قيمن ئفسان خف وودم ن واشال كول.
4 ئدّخ ضارت ن سبعا د-ؤسّان، دّيخ أنّازنخ أنژار خف واشال ربعين ن واسّ د ربعين ن ييض أها خلوخ كول أينّا ئدّرن نّا ݣيخ خف وودم ن واشال».
5 ئݣ سيدنا نوح كول أينّا س-ئنّا مولانا.
6 داي ألّيݣ تاقوم دّونيت س وامان تلّا غر سيدنا نوح ݣ لعمر نّس ستميا ن-ؤسݣّاس.
7 أها ئكشم سيدنا نوح د واراو نّس د تمطّوطّ نّس أݣّيدس د توتمين ن واراو نّس غر س-أغرابو حما أد أفن أد راحن زݣ وامان ن تاقومت.
8 ئمشيس أود لبهايم نّا ئحلّين د لبهايم نّا ئحرمن د ئجضاض د كول مايد ئتمرورودن خف واشال
9 دّاند غر سيدنا نوح أها كشمن سين سين ݣ-ؤغرّابو، أوتم د توتمت، أم ؤينّا ئنّا ربّي يي سيدنا نوح.
تاقومت ن دّونيت س وامان
10 داي ضارت ن سبعا د-ؤسّان، بدون وامان ن تاقومت أر غمّسن يي واشال.
11 أها ݣ-ؤسݣّاس ويسّ ستميا زݣ تودرت ن سيدنا نوح، ݣ وايور ويسّ سّين، ݣ واسّ ويسّ سبعطاعش زݣ وايور، ݣ واسّ نّا أيد طّيقسن ئغبولا ن وامان ئجهدن زݣ دّاو ن واشال، أها رژمن ئخبا ن-ئݣنّا.
12 داي ئزدي ؤنژار أر ئكّات خف واشال ربعين ن واسّ د ربعين ن ييض.
13 ݣ واسّ نّا س-ئخف نّس، ئكشم سيدنا نوح س-أغرابو، نتّا د تمطّوطّ نّس د واراو نّس، سام د حام د يافات د توتمين نّسن شراط أكيدسن،
14 نيتني د لوحوش خف لانواع نّسن د لبهايم خف لانواع نّسن د-ئمرارادن ن واشال خف لانواع نّسن د-ئجضاض د-ئبوخّا نّا غر لّان وافريون خف لانواع نّسن.
15 ويد أيد ئكشمن د سيدنا نوح غر س-أغرابو، سين سين زݣ مايد ئݣان دّات نّاݣ-ئلّا ؤنفوس ن تودرت.
16 ئد وينّا ئكشمن، كشمن أوتم د توتمت زݣ مايد ئدّر كول، أم ؤينّا س-ئنّا ربّي. أها ئقّن مولانا خف سيدنا نوح تاݣّورت ن-ؤغرّابو.
17 داي أمژن وامان ن تاقومت خف واشال ربعين ن واسّ. أل توعدون وامان أها أسين أغرّابو زݣ واشال.
18 ݣّوتن وامان أها عدّون شايݣان خف واشال، ئقّيم ؤغرّابو أر ئتدو خف وودم ن وامان.
19 داي عدّون وامان ئݣّوتن شايݣان خف واشال أها تّوغمسن لعواري كول ئخاتارن نّا ئلّان داو ن-ئݣنّا.
20 أليند وامان س-ام خمسطاعش ن تݣويمت نّيݣ ن لعواري.
21 داي ئمّت مايد ئدّرن كول د-وينّا ئتحرّاكن خف واشال، زݣ ئجضاض د لبهايم د لوحوش د كول مايد ئتدّون خف ؤديس ݣ واشال د ميدّن كول.
22 كول ونّا ݣ-ئلّا ؤنفوس ن تودرتa زݣ ؤينّا ئلّان خف واشال أقورار ئمّوث كول.
23 داي ئخلو مولانا مايد ئلّان خف وودم ن واشال مايد ئدّرن كول، زݣ ميدّن د لبهايم د لوحوش د مايد ئتمرورودن خف ؤديس د-ئجضاض ن-ئݣنّا. خلان زݣ واشال أها ئقيم غاس سيدنا نوح هيلّي د-وينّا أݣّيدس لّانين ݣ-ؤغرّابو.
24 داي قّيمن وامان ݣّوتن خف واشال ميّا د خمسين ن واسّ.