4
قايين د هابيل
1 ئݣن آدم د تمطّوطّ نّس حوّاء. داي تاسي أعدّيس أها تورْو أربا. داي تنّا: «س لعوين ن مولانا ؤروخ أربا»a. تݣاس قايينb.
2 داي تورْو ديخ ؤماس ن قايين، تݣاس هابيل.
ئݣ هابيل أكسّاب، ئد قايين ئݣا أفلّاح.
3 يان واسّ، ياويد قايين شا زݣ ؤنبدو نّس ئݣيت د توكي يي مولانا،
4 ئد هابيل ييوياسد ئمنزا ن وولّي أها ئوشاس تاقطّيطّ نّا ئژلن. ئرضو مولانا خف هابيل د توكّي نّس،
5 ماشان ؤر ئرضي خف تين قايين. ئطيراس يي قايين أها ئبخّين غيفس وودم.
6 داي ئسقسات مولانا ئنّاياس: «أقايين، ماش يوغن ئطيراش أها ئبدّل غيفش وودم؟
7 مشد-ئس تݣيد أينّا ئژيلن، أد ييلي ؤفراح خف ؤدم نّشc. مش ؤر تݣيد أينّا ئژيلن، ئوا غوراش هان لمعصييت لا ش تاݣّا ئخف غر لباب. ترا أد غيفش تنبض، ماشان ئلازم أت ترّود».
8 يون واسّ، ئنّا قايين يي وماس هابيل: «أورا أندو غر ئݣر». داي نتّا ئوضن ئݣر، ئكّر قايين ئنهم خف ؤماس هابيل أها ئنغيت.
9 داي ئنّا مولانا يي قايين: «ماني ؤماش هابيل؟» ئنّاياس قايين: «ؤر سّينخ، ماخ، ئس ݣيخ أعسّاس ن-ؤما؟»
10 أها ئنّاياس ألّو: «ماتّا ؤياد تݣيد؟ هاتين دا سلاخ يي ئدّامن ن-ؤماش دا غوري سغويون زݣ واشال.
11 زݣ دغي، تدّيد أت تݣد أنعيمال أها تتواژّعد زݣ واشال نّا ئرژمن أقمو نّس حما أد يامژ ئدامّن ن-ؤماش زݣ ؤفوس نّش.
12 أها أدّاي تخدمت أشال ؤر تين ئقان أد-اك ئوش زݣ لغلت نّس. أمحوف د-أمرول أغا تݣد ݣ واشال».
13 داي ئنّاياس قايين: «أيدخ ن-ؤموتّل ئوعر غيفي عنوݣّا.
14 تژعديي أسا زݣ ؤدم ن واشال، ئخصّا أد فّرخ زݣ ؤدم نّش، أمحوف د-أمرول أغا ييخ ݣ دّونيت، ونّا يييوفان أد يي ئنغ!»
15 ئنّاياس مولانا: «ؤهو، ونّا ك-ئنغان أت تمرّتخ سبعا ن تيكّال خف ؤينّا ش-ئݣا».
أها ئݣ مولانا يي قايين يوكت ن تماتارت حما ونّا تيوفان ؤر ت-ئنقّا.
16 داي ئفّغ قايين زݣ غر مولانا أها ئدّو ئزدغ ݣ تمازيرت ن نود d تانيلا ن لقبلت ن عدن.
أراو ن قايين
17 داي ئجن قايين د تمطّوطّ نّس. أها تاسي أعدّيس. داي تورْو حنوك. ئكّر قايين ئبنو يوكث ن تمدينت ئݣاس ئسم أم ييسم ن ممّيس حنوك.
18 ئلال يي حنوك عيراد. أها يورْو عيراد محويل. داي يورْو محويل متوشيل. يورْو متوشيل لامك.
19 ياول لامك سنات ن تعيّالين: ئسم ن يوكت عادة، تيس سنات ئسم نّس صيلا.
20 تورْو عادة يابال، نتّا أيد ئݣان ئبّاس ن وينّا ئزدغن ݣ-ئخامن أها ݣين ئكسّابن ن لمال.
21 ئسم ن-ؤماس يوبال، نتّا أيد ئݣان ئبّاس ن وينّا ئكّاتن لوطار د تغانيمت.
22 تورْو صيلا أود نتّات توبال قايين، ونّا أيد ئعديلن ماݣّان أسكّين زݣ نّحاس د ووزّال. تݣ ؤلتماس ن توبال قايين نعما.
23 يون وّاسّ، ئنّا لامك يي تعيّالين نّس: «أعادة د صيلا، سغدات غوري، كونّي أتيوتمين ن لامك، سلات يي واوال ئنو: نغيخ يون ؤرݣاز ئدّخ ئستّورسييي د يون ؤعريم ئدّخ ئبرشييي.
24 مش ئنغا شان يون قايين ئدّا أد ئتّومرّت سبعا ن تالمرت. ئد مش ئنغا شان يون لامك ئدّا أد ئتّومرّت سبعا وسبعين ن تالمرت خف ؤينّا ش-ئݣا».
تالاليت ن شيت
25 ئݣن آدم ألّو د تمطّوطّ نّس حوّاء، أها تورْو أربا داي تݣاس ئسم شيت. ئدّخ تنّا: «ئوشايي ربّي أربا ضنيني ݣ وانسا ن هابيل نّا ئنغا قايين». لمعنا ن-ئسم ن شيت علي حال أم لمعنا ن واوال-اد: ئوشايي ربّي.
26 داي ئلال يي شيت يوك ن-ؤربا ئݣاس ئسم أنوش. زݣ لوقت نّا أيد بدان ميدّن أر تتّرن س ئسم ن مولانا.