3
أسخضو ن بنادم
1 ئفيغر، نّا يوݣر لوحوش كول نّا ئخلق مولانا، ربّي نّخ ݣ شّوايتa د لوخيت، ئنّا يي تمطّوطّ: «ئد ستيتّ ئنّاياون ربّي أد-ؤر تتّات زݣ أود يان ؤسكلو ن-ؤرتو؟»
2 داي تنّاس تمطّوطّ: «ئهي، أنتشّ زݣ ئسكلا ن-ؤرتو،
3 ئد أسكلو نّا ئلّان ݣ واماس ن-ؤرتو، ربّي ئنّاياخ: «ؤر-أون ئخصّا أد زّيكس تتّام ؤلا تحادامت، حما ؤر تمتاتم».
4 داي ئنّا ئفيغر يي تمطّوطّ: «ؤر تمتاتم والو!
5 ماشان ربّي ئسّن مش زّيكس تتشام، دّانت والّن نّون أد رژمنت. أها تاغولم أت تݣيم أم نتّا، أت تيسينم أينّا ئژيلن د-ؤينّا ئخان».
6 لّيݣ تانّاي تمطّوطّ لغلت ن-ؤسكلو تژيل ݣ-ؤراعا، تغودا يي ووتشي أها أر تاكّا تانژّي. تكّس زّيكس أها تتّش، توشا يي ؤرݣاز نّس نّا ئلّان أݣّيدس. أها ئتّش أود نتّا.
7 دغيا رژمنت والّن نّسن أها ئسين ئس لّان حژّوضي. داي ݣنون أفريون ن تازارت حما أد غمسن.
8 لّيݣ ئسلا ؤرݣاز د تمطّوطّ نّس لحسّ ن مولانا، ربّي نّخ لا ئتدو ݣ-ؤرتو أتّاين ن تادݣّات، لّيݣ أر ئتصوض ؤزوو، داي فّرن زّيكس ئنݣر ن-ئسكلا ن-ؤرتو.
9 داي ئغرد مولانا، ربّي نّخ يي ؤرݣاز ئنّاياس: «مانيش؟»
10 داي ئنّاياس ؤرݣاز: «سلّاخ يي لحسّ نّش ݣ-ؤرتو أها ݣّدخ. داي فّرخ، ئدّخ لّيخ حژّوضي».
11 داي ئنّاياس مولانا، ربّي نّخ: «مايداش ئنّان هاتين تلّيد حژّوضي؟ ئس تتشيد زݣ ؤسكلو نّا خف ئش وصّاخ أد ؤر زّيكس تتّا؟»
12 ئرار غيفس ؤرݣاز، ئنّاياس: «تامطّوطّ نّا يي توشيد حما أت تيلي أݣيدي هاتين نتّات أيدي ئوشان زّيكس أها تّشخ».
13 داي ئنّا مولانا، ربّي نّخ يي تمطّوطّ: «ماتّا ؤياد تݣيد؟» تراراس، تنّاياس: «هاتين ئفيغر أيد-يي ئغرّان، داي تّشخ».
14 ئنّا مولانا، ربّي نّخ يي ئفيغر: «ئدّخ تݣيد أياد، غاس شݣ أغا ئݣين ؤنعيل ئنݣر ن لبهايم د لوحوش كول، تدّيد أت تمروروتّ خف ؤديس نّش أها أر تتّاد أشال ؤسّان ن تودرت نّش كول.
15 ديخ أد ݣخ لعداوت ئنݣراش د تمطّوطّ د-ئنݣر تاروا نّش د-ئرو نّس، نتّا أد ئبرش ئخف نّش، شݣ أد-اس تقّست يي ييورز نّسb».
أموتّل ن بنادم
16 ئد تامطّوطّ، ئنّاياس: «ديخ أد غيفم سيكخ شايݣان ن تمارا س-ئژبارن أدّاي تيريد أت تارْوت، أها أر شم ئنقّا فاد ن-ؤرݣاز نّم، c والاينّي نتّا ئدّا أد غيفم ئتنباض».
17 ئد أرݣاز ئنّاياس مولانا، ربّي نّخ: «ئدّخ تݣيد رّاي يي تمطّوطّ نّش أها تتشيد زݣ ؤسكلو نّا خف ئش نهيخ، ئدا واشال أد-ئݣ ؤنعيل خف نّيرت نّش، س تامارا أس غا زيكس تسّوفوغد مايد تتّاد ؤسّان ن تودرت نّش كول.
18 داي أر-اش د-ئسّمغاي ئسنّان د-ئحشلافن خّانين، أر تتّاد أينّا ئتّمغين ݣ-ئݣران.
19 أها أر دا تسرّيد تيدي أغا تصوّرد أغروم أر-أسّ ݣ تعايت س أشال نّا زݣ تفّغد. ئدّخ ݣيخش زݣ تاتشا، تاتشا أغر تّاغولد».
ؤژوع ن-أدام د حوّاء زݣ-ؤرتو ن عدن
20 داي ئݣ آدم يي تمطّوطّ نّس ئسم حوّاء، لمعنا نّس «تودرت»، ئدّخ نتّات أيد ئݣان مايس ن مايد ئݣان بنادم كول نّا ئدّرن.
21 أها ئعديل مولانا، ربّي نّخ ئعبان زݣ ئهيضار ئسلستن يي آدم د تمطّوطّ نّس.
22 داي ئنّا مولانا، ربّي نّخ: «هان بنادم ياغول ئݣا أم يون زيݣنخ، ئسّن مايد ئژيلن د مايد ؤر-ئحلين. ئخصّا دغي ؤر ئتّاژّاض أفوس نّس ألّو أد-ئكّس شا زݣ ؤسكلو ن تودرت. مش-ئتشا زيكس ئدّا أد ييدير أبدا».
23 داي ئسّوفغت مولانا، ربّي نّخ زݣ ؤرتو ن عدن حما أد-ئكرز أشال نّا زݣ ئتواݣ.
24 نتّا ئژّعتن، ئسبدّ ييتس ن لمالايكات نّا مي تّينين كروبيم زݣ تنيلا ن-ؤنقّر ن-ؤرتو ن عدن، د يوت ن تفروت نّاݣ توغ لعافييت، أر تبرام غر مايد ئݣان تانيلا حما أت تحضو أبريد ن-ؤسكلو ن تودرت.