Patudu i pokata sampepepotuuta
5
1 Ane nupatudu sadua tomoane anu matinuwu lako si iko, inee iko mangkasara. Aginamo nupaakalusu pololitamu mokambaroka sira; nuimba mpuu ewa tuamamu. Anantomoane, nuimba sira pokamu. 2 Towawine anu matinuwu lako si iko, nuimba sira ewa tinamu, ai towawine anu baria mani sira matinuwu lako si iko, nuimba sira ewa toimu; nupakalompe mpuu ope-ope babeiamu si sira.Patudu kono mokadipuraka topepotuu si Kerisitu anu bemba
3 Ane ria sira towawine anu bemba, anu mesiasi mpuu katuwura, sangangaa tabila ai takadipuraka kowo sira. 4 Agaiana ane tobemba anu ria anana ba tumpuna, anana ai tumpuna etu sangangaa napatudu sira adiwa dalana mokadipuraka tinara, bona mosurungi sira kalompe nu tomanara. Lawi etu anu mopakatono rara ni Pue Ala. 5 Ane ria tobemba anu mesiasi mpuu katuwuna, lempona tuwu sadudua, baria ria anu mokadipuraka ia. Batena mepotuu ngkida si Pue Ala, mabaa kawengi mekakae si Pue Ala. 6 Agaiana tobemba anu mangkadelo ngkida sira katono-tono, sira mamatemo i rara pepotuura, nauda sira tuwu mani. 7 Nupadongkaka sira patuduku ei i pokata sampepepotuuta, bona manoto babeiara. 8 Lawi ane ria sadua tau anu manguli malompe pepotuuna si Pue Ala, agaiana baria mokadipuraka poka-pokana pelumbunamo santombiana, babeiana etu mosapuaka pepotuuna. Melumbu kadaana lako i tau anu baria mepotuu si Pue Ala.
9 Tobemba anu pensani rapopesua sangara i rara sura nu tobemba bona ratulungi nu sampepepotuura, batena ngkida tau anu ewa ei: sangangaa tinuwura baria makura lako i aono mpulu mpae ai anu sambela ngkida motombi.a 10 Sangangaa anu manoto babeiara, pandirina: mokadipuraka lompe sira anara, matono sira modoko torare i tombira, motulungi sira pokara sampepepotuura, mokadipuraka sira tau anu i rara nu kapari, ai mobabei sira sinangka bago anu malompe.
11-12 Ane tobemba anu mangura, inee rauki sangara i rara sura nu tobemba. Lawi ane ria mani peundea nu rarara motombi, batera ina motombi. Kasopoana masala sira lawi moliungi sira dandira si Kerisitu kabariaramo ina motombi. 13 Mewali, ane mangura mani sira, inee rauki sangara i rara sura nu tobemba. Lawi paka malose sira mampopolumako bagora anu sintoto i lio ni Pue, ai mensonda-nsonda liliu ngkida sira i tombi nu rangara. Ai baria etu ngkida, agaiana mangkeni-ngkeni mbui sira lolita i rangara. Raundera ngkimo mampesuaki urusia nu rangara, ai mopadongka liliu sira lolita anu baria totona rapololita. 14 Etumo mpane kuuli, tobemba anu mangura mani, aginamo motombi mpesola sira, moana sira, ai mokadipuraka lompe sira tau anu i rara nu tombira, bona ntena ria dala nu iwalita mokaisii lolita, mopakadaa sangata anu meula si Kerisitu. 15 Lawi ria sira tobemba anu bariamo mampeulai peundea ni Kerisitu, mampeulaida sira peundea Datu nu Seta.
16 Ane ria sira topepotuu si Kerisitu anu ria tinara anu bemba, aginamo sira anu mokadipuraka. Baria malompe ane ope-ope pokata sampepepotuuta sangangaa mokadipuraka tobemba aretu. Lawi pokata sampepepotuuta sangangaa mokadipuraka tobemba anu mesiasi mpuu katuwura, anu bariamo ria mokadipuraka sira.
Patudu ntanina
17 Tadulako nu topepotuu si Kerisitu anu malompe petadulakoira, sintoto mpuu ane mansumba sira kirara ai melumbu karaadaira mpane lako i tau ntanina, pelumbunamo tadulako anu mepatudu ai anu mopadongka Ngkora ni Pue. 18 Lawi i rara nu Sura Ngkora Magali teuki ewa ei:
“Inee rasamaaku ngudu nu japi ane tongora rapopobago.”b (Pepopainga 25:4)
Ai teuki mbui, “Topobago sangangaa rakiraka sarora.”
19 Ane ria sadua tadulako topepotuu si Kerisitu anu rasalai nu tau, inee kasaliu nudoko pesalaira. Ane ria rodua ba tolu dua tau anu mosabiki kamonsona kamasalana, lako pensanida nupotuu. 20 Ane ria mpuu salana, nukambaroka i lio nu ope-ope pokata sampepepotuuta, bona maeka sira mampeulai babeiana. 21 Kukiraka mpuu iko lolita ei Timotiu, bona nupeulai ope-ope parentaku ei, ai inee iko mampopontani tau. I Pue Ala ai Yesu Kerisitu ai malaekaNa anu tepelisi mampetiro kita.
22 Inee iko maliga moongko tau mewali tadulako nu topepotuu si Kerisitu, bona ntena iko anu mosuru ane mobabei sira dosa. Mainga-inga iko bona manoto liliu babeiamu.
23 Inee wule ue nuinu, agaiana nuinu mbui saudi anggoro, lawi kuinsani paka madua taimu.
24 Ria sira tau, nauda baria mani rapomeso-mesoka kara-karara, tongawamo kamadosara. Ria mbui sira tau anu baria mani tainsani dosara. Ane roo rapomeso-mesoka kara-karara, lako tainsanida. 25 Awetu mbui, ria sira tau anu manoto mpuu kalompena babeiara. Ai ria mbui sira tau anu baria rainsani nu rangara babeiara anu malompe, agaiana i eo anu ina mai, babeiara anu malompe etu ina rainsani nu tau, lawi babeiara anu malompe, baria pensani tewunikai.