Mawori tau mampeulai patudu anu mepakanawu
4
1 Inosa Magali manguli i kanoto-notona: i eo anu ina mai, ria sira tau anu mosapuaka i Pue Yesu. Ina mengkoru sira i kuasa anu mepakanawu, ai ina mampeulai sira patudu anu lako i seta. 2 Patudu etu rapadongka nu tau anu mengkalompe. Pololitara baria simbela ai babeiara. Rarara madaa; bariamo rainsanira maea ane mobabei sira babeia anu madaa. 3 Mopatudu sira tau bona inee sira motombi, ai inee mangkoni apa anu rapalia. Kamonsona ope-ope pangkoni etu napopewali ni Pue Ala bona rakoni nu tau anu mepotuu si Kerisitu, ai anu manginsani sira patudu anu mamonso. Pensani takoni ai tauli maisi kalompena si Pue Ala. 4 Lawi malompemo ope-ope anu napopewali ni Pue Ala, baria ria anu rapalia ane tadoko ai tauli maisi kalompena si Pue Ala. 5 Mangula Ngkora ni Pue Ala, ope-ope pensani takoni, ai tapekakaeka mbui bona pangkoni etu Nawati.I Paulu mokiraka lolita si Timotiu bona moewa patudu anu mepakanawu
6 Ane nupatuduka ope-ope ei i pokata sampepepotuuta, ina mewali iko topobago ni Yesu Kerisitu anu malompe. Ai ina maroso mpuu raramu lawi Ngkora ni Pue Ala anu tapotuu ai patudu anu malompe anu masaemo nupeulai. 7 Inee nutende tempomu moparesa lolita anu baria mamonso, ai anu wule mangkeni kita mangula peundea nu rarata anu madaa. Aginamo nupakaroso raramu mengkoru si Pue Ala. 8 Lawi ane tapakaroso wotota, saudi ngkida pobunduana. Agaiana ane tapakaroso rarata mengkoru si Pue Ala, maisi pobunduana, lawi pengkoruta si Pue Ala mangkeni pewati i katuwuta, malompe ei-ei awetu mbui i eo anu ina mai. 9 Mamonso mpuu lolita ei, ai sangangaa tapotuu mpuu. 10 Etumo mpane mobago mantimi kita, lawi mepotuu kita si Pue Ala anu tuwu duduuna i kasae-saeana, ai anu mosorema ope-ope tau lako i suku dosara, pelumbunamo tau anu mepotuu.
11 Ope-ope anu kuulika iko ei, nupatuduka sira ai nuparentaka sira bona rapeulaira. 12 Nauda mangura mani iko, sintoto iko rabila nu tau. Sangangaa mewali iko pandiri i pokata sampepepotuuta i rara mpololitamu, babeiamu, kamaasimu i singka rangamu, pepotuumu si Pue, ai katuwumu anu magali. 13 Lako baria mani aku dongka, sangangaa nubasa liliu Sura Ngkora Magali i pokata sampepepotuuta. Sangangaa nupakaroso liliu rarara ai nupatudu sira. 14 Inee nupawia bagomu anu sangangaa nupopolumako, mangula kapande anu nakiraka iko nu Inosa Magali. Rakiraka iko kapande etu i tempona tadulako nu topepotuu si Kerisitu moona palera i tanuanamu mopadongka lolita lako si Pue Ala kono si iko. 15 Ope-ope bagomu, sangangaa nupopolumako lako i raramu mpuu, bona tongawa i ope-ope tau kamalompena pobagomu si Pue.
16 Nukampai babeiamu, ai nukampai mbui patudumu. Ope-ope ei nupobago liliu, bona mansumba iko katesorema, awetu mbui sira tau anu mampetingai patudumu.