Babeia anu sintoto nababei nu penatua
3
1 Monso mpuu lolita ei, “Tau anu mampenoka sira mewali penatua, naunde mampobago bago anu meawa.” 2 Etumo mpane sadua penatua sangangaa baria ria kamasalana. Sangangaa sadua ngkida towawinena, ai sangangaa nabuku morempeki peundea nu rarana anu madaa. Sangangaa matopa ia ai malompe babeiana. Sangangaa matono ia ane motorare. Sangangaa nainsani mepatudu. 3 Baria pensani anu malangu-langu ba anu paka mobungka. Sangangaa anu maalusu pangkeniakana, anu mosintuwu ai rangana, ai anu baria wule mangkadelo doi ngkida. 4 Sangangaa nainsani mokadipuraka lompe tau anu meari i rara nu tombina, ai mopatudu anana, sangangaa mengkoru sira i tomanara ai mebila sira. 5 Lawi ane ria sadua tau anu baria nainsani mokadipuraka tau i rara nu tombina, baria mpuu nabuku mokadipuraka pokana sampepepotuuna. 6 Ane ria sadua tau anu lako mepotuu si Pue Yesu, baria ia pensani raongko mewali penatua, ntena ia mampemabose, duduuna mansumba ia pesuku ewa anu rasukuka Datu nu Seta 7 Kaliliuana, sadua penatua, sangangaa baria ria kamasalana i petotoki nu tau anu baria sira mepotuu si Kerisitu. Lawi ane nakelo ia Datu nu Seta duduuna manawu, kasopoana ina nakaisii basa nu tau ia.8 Pangkeniaka nu tau anu rapelisi sira mewali diaken, sangangaa awetu mbui. Sangangaa manoto babeiara ai anu sintoto rabila. Anu mopenga rarana baria pensani, ba anu malangu-langu sira, ba anu wule mangkadelo doi ngkida. 9 Sangangaa modoko mpuu sira patudu anu napadongkaka kita ni Pue Ala, ai mampeulai sira patudu etu lako i kamagali nu rarara. 10 Ane ria sadua tau anu mampenoka mewali diaken, niparesa sala babeiana. Ane baria ria kamasalana, lako pensanida ia raongko mewali diaken.
11 Awetu mbui towawinera,a sangangaa manoto babeiara ai anu sintoto rabila. Baria sintoto ane mangkeni-ngkeni sira lolita. Sangangaa rabukura morempeki peundea nu rarara anu madaa, ai sangangaa rapotuu sira i pangka-pangkana.
12 Sadua diaken sangangaa sadua ngkida towawinena, ai sangangaa rainsanira mokadipuraka lompe anara, ai tau anu meari i rara nu tombira. 13 Ane malompe pampopolumakora bago ni Pue, ina rabila sira nu tau, ai ina tetambai kapebaira mopadongka pepotuura si Yesu Kerisitu.
Tunggaia ni Paulu mouki sura ei si Timotiu
14 Timotiu, pesarumakaku bariamo masae ina lau aku mosondaki iko, nauda awetu kuukika iko sura ei, 15 bona ane rapana masae mani aku lako dongka, nuinsani babeia anu sintoto i ope-ope tau ni Pue Ala. Lawi ope-ope kita tau ni Pue Ala anu mewali arii anu mopakatogo kanotona patudu lako si Pue Ala. Ai takampai patudu etu bona ntena ria anu mobaliki. 16 Malompe mpuu patudu anu tapeulai nakenimpengkoruta si Pue Ala. Banimpia patudu etu baria rainsani nu tau, agaiana ei-ei natudokamo kita ni Pue Ala. Lawi eimo anu tapotuu:
I Kerisitu iamo
anu mewali manusia,b
anu napakanotomo nu Inosa Magali,
ai anu raita nu malaeka.
BambariNa rapadongka i tau anu baria mani sira manginsani i Pue Ala,
ai Ia rapotuu nu tau i sumalele dunia,
ai naore ni Pue Ala lau i suruga i rara mpeawaNa.