Sangangaa mampekakaeka kita topoparenta ai ope-ope tau
2
1 Mpolinguruna, kuperade mpuu bona ope-ope tau anu mepotuu si Pue Yesu mampopengkaore pekakaera, pamperadera ai pangulira maisi kalompena si Pue Ala. Sangangaa tapekakaeka sira ope-ope tau, 2 ope-ope datu ai ope-ope topoparenta. Sangangaa tapekakaeka sira, bona malompe katuwuta ai malene katuwuta, bona pensani kita menomba si Pue Ala ai mobabei liliu kita babeia anu sintoto rabila nu rangata. 3 Malompe ane mekakae kita ewa etu, lawi etu anu naunde ni Pue Ala anu mosorema kita lako i suku dosata. 4 PeundeaNa bona ope-ope tau tesore lako i suku dosara, ai manginsani patudu anu mamonso. 5 Lawi sadua ngkida i Pue Ala, ai sadua ngkida mbui Topetongo-tongoi anu mopasintuwu i Pue Ala ai manusia. I Yesu Kerisitu iamo Topetongo-tongoi etu, manusia mbui Ia. 6 Mosusu Ia wotoNa rapopate mosuru dosa nu ope-ope tau. Etu Nababei i tempo anu napakanotomo ni Pue Ala, bona tongawa si kita peundea ni Pue Ala mosore ope-ope tau lako i suku dosara. 7 Etumo mpane naongkomo aku ni Pue Ala mewali suroNa. Natudu aku mopadongka bambari etu i tau anu baria sira toYahudi. Natudu aku mopaguruka sira patudu anu mamonso, bona mepotuu sira si Yesu. Monso mpuu anu kuuli ei, baria aku modongko.I Paulu mopatudu i Timotiu kono i babeia anu sintoto i tomoane ai i towawine i paminggua
8 Peundeaku bona ane menomba kita ba imba ngkida, tomoane sangangaa mekakae. Ai ane mekakae sira, sangangaa magali rarara, ai baria sira pensani mosisala ba masodo. 9 Ewa etu mbui towawine. Towawine sangangaa mopake sampi anu sintoto, mangula ada anu malompe. Inee sira mampoperae pesampira bona ratoia sira nu rangara, inee sira mampopengaa-ngaa wuluara, inee sira mopake bulawa ba mutiara, ba pesampi-pesampi anu masuli. 10 Aginamo towawine ratoia nakeni nu babeiara anu malompe, ewa anu sintoto i towawine anu mengkoru si Pue Ala.
11 Towawine sangangaa mengkaiwoi ai lako i rarara mampetingai patudu. 12 Baria kupaliu towawine mopatudu ba motadulakoi tomoane. Sangangaa mandii-ndii ngkida sira mampetingai. 13 Lawi anu mpolinguruna napopewali ni Pue Ala iamo i Adama, mpane lako i Hewada. 14 Baria i Adama anu naakalangi Datu nu Seta, agaiana i Hewada anu naakalangi, duduuna moliungi parenta ni Pue Ala. 15 Nauda sira towawine mantodisa kapari i tempora moana,* agaiana mansumba mbui sira katesorema, asala tetida liliu pepotuura si Pue, mampokaasi liliu sira rangara, ai tuwu sira i rara nu kamagali ai matopa.