Sura ni Suro Paulu anu mpolinguruna napakatu si
Timotiu
1
1 Sura ei lako si aku i Paulu, tudua ni Yesu Kerisitu. Mewali aku suroNa mangula parenta ni Pue Ala anu mosorema kita lako i suku dosata, ai mangula parenta ni Yesu Kerisitu anu mewali pesarumakaata. 2 Sura ei kupakatuka iko Timotiu anu kupoana nakenimpepotuumu si Yesu Kerisitu. Mekakae aku si Pue Ala Tuamata ai si Yesu Kerisitu Pueta, bona Nawati iko, ai Natudoka iko asiNa, ai Nakiraka iko kalompe nu katuwu.Nusombo sira guru agama anu mepakanawu
3 Kuperade bona meari liliu iko i Epesu ewa anu kuuli ni banimpia i tempoku mangoka lau i Makedonia. Lawi i se etu ria sira basangkia tau anu mangkeni patudu anu baria makono, ai sangangaa nusombo sira bona inee sira mangkeni liliu patudu anu mepakanawu. 4 Nusombo sira bona inee sira mopairara liliu lolita anu baria mamonso, ai tunturaka nu pemuleara anu baria ria kasopoana. Lawi tau anu mopairara liliu sira lolita ai tunturakana etu, mombesese ngkida sira, baria sira mampeulai tunggaia ni Pue Ala anu tainsani lako i pepotuuta si Ia. 5 Tunggaia nu patuduku ei, bona ope-ope kita mombepokaasi. Sangangaa mombepokaasi kita lako i rarata anu magali, lako i kabula nu rarata ai lako i karoso nu pepotuuta si Pue Ala. 6 Ria sira basangkia tau anu bariamo mampeulai dala ei. Baria sira mangula dala anu manoto, ai mampombesonoingi liliu sira lolita anu baria mobundu. 7 Rapenokara mewali guru Atura ni Musa, agaiana baria rainsanira lempona apa anu rapatudura. Raulira, mapande sira mopakanoto lempona Atura ni Musa, agaiana kamonsona baria rainsanira tunggaiana.
8 Tainsani mpuu kalompena Atura ni Musa, asala tapopolumako sintoto ai tunggaia nu Atura etu. 9 Sangangaa takaendo tunggaia Atura ni Musa bona mamonso ka tapopobunduna. Atura ni Musa baria mokambaroka tau anu manoto babeiara. Tunggaiana, bona moombo tau anu moliungi Atura etu, tau anu meewa, tau anu baria sira mengkoru si Pue Ala, tau anu madosa, tau anu baria sira mopairara agama, tau anu mangkadelo ngkida peundea nu rarara i dunia ei, tau anu mampopate tinara ba tuamara, ai topepopate anu ntanina. 10 Tunggaia nu Atura ni Musa bona moombo tau anu mebualosi ai tau anu mobabei babeia anu merikati, tau anu motawani rangana bona rapobatua, tau anu modongko, tau anu mewali sabi dongko, ai ope-ope tau anu mobabei apa anu baria sintoto ai patudu anu mamonso. 11 Patudu anu mamonso tasumba i rara Bambari Malompe anu lako si Pue Ala, anu meawa katuwuNa, ai anu sintoto ratoia. Bambari Malompe etu napotuuka ni Pue Ala si aku bona kubambari i ope-ope tau.
I Paulu manguli maisi kalompena nakeningkamaasi ni Pue i rara nu katuwuna
12 Kuuli maisi kalompena si Pueta i Yesu Kerisitu, lawi Nakiraka aku karoso, Napotuu aku mampopolumako bagoNa, ai Naongko aku mewali topobagoNa. 13 Banimpia kupapakoi i Yesu ai kupopesiasi mpuu tau anu mepotuu si Ia. Agaiana nauda awetu, Napokaasi mpuu aku, lawi ni tempo etu, baria mani aku mepotuu si Ia, ai baria mani kuinsani lempona apa anu kubabei. 14 Agaiana nauda mabose mpii dosaku, melumbu mani kabosena asi ni Pue Ala. Natulungi aku i sukana kabula nu raraNa, duduuna kupotuu ai kupokaasi i Yesu Kerisitu.
15 Manoto mpuu lolita anu manguli, “I Yesu Kerisitu mai i dunia bona mosore tau lako i suku dosara.” Monso mpuu lolita etu ai sintoto tapotuu. Ai lako i ope-ope tau anu madosa, aku eimo anu melumbu dosaku. 16 Nauda awetu, mia-mia asi ni Pue Ala si aku, bona i rara nu katuwuku anu melumbu kamadosaku ei, tongawa kabariana mokasopoa kamaasi ni Yesu Kerisitu. Mewali, i rara nu katuwuku ei, tongawa mpuumo asi ni Pue, duduuna mewali aku pandiri i ope-ope tau bona mepotuu mbui sira si Yesu ai mansumba sira katuwu malompe anu baria mokasopoa.
17 Sintoto mpuu tabila ai tatoia i Pue Ala duduuna kasae-saeana, lawi Iamo Datuta anu meparenta duduuna kasae-saeana, anu baria ria kamateNa, anu baria raita, ai anu baria ria kasimbelaana.
Sawaa ni Paulu si Timotiu
18 Timotiu, anaku! Bago ei kupotuuka iko bona nupobago. Sangangaa nukaendo apa anu tepakanoto kono si iko ni banimpia kono i bago ni Pue Ala. Nupairara patudura etu, bona maroso pampopolumakomu bago anu nupatoro, ewa sadua surudado anu keate mombeala. 19 Tetida iko i rara pepotuumu, ai nubabei liliu babeia anu malompe lako i kabula nu raramu. Ria basangkia tau anu naoaka moewa peundea nu rarara anu malompe, duduuna marugi pepotuura. 20 Tepesua i Himeneus ai i Aleksander. Anu rodua etu kususu sira i Datu nu Seta bona mansumba sira pesuku, ntena sira mopakoi kuasa ni Pue Ala.