Babeia anu sintoto i batua anu mepotuu si Kerisitu
6
1 Ane pokata anu sampepepotuu anu tuwu sira rapobatua, nupatudu sira bona mobila ai mampeulai sira tuara i sinangkana, bona nakenimpengkorura baria ria sadua tau anu mopakoi sanga ni Pue Ala ba mosapuaka patuduta. 2 Ane topepotuu si Kerisitu tuara, baria sintoto ane sadua batua manguli awei, “Baria paraluu kupeulai parentana, lawi iamo pokaku i rara sanga ni Pue.” Aginamo napakalompeda ka napopolumakona bago nu tuana, lawi tuana anu napobagoka etu iamo pokana sampepepotuuna anu napokaasi.Kono patudu anu mepakanawu ai kono mangkadelo doi
Nupatudu sira tau, ai nupakaroso rarara ai ope-ope anu kuuli ei. 3 Ane ria sira anu mangkeni patudu anu mosisala ai patuduta. Baria sira mampotuu patudu anu mamonso lako si Pueta, i Pue Yesu Kerisitu. Baria sira mampotuu lolita anu mopatudu kita bona mengkoru kita si Pue Ala. 4 Tau aretu mengkapande ngkida sira, baria sira manginsani apa-apa. Peundeara, bona mombesese liliu sira, ai mangkadelo ngkida sira posisisala ai pololitara. Nakenimpepatudura etu, moparia pombesese, pobungka, pombekasinai, mampopogaa-gaa tau, pombesasalai, ai pomberairai, 5 mpane mobungka-bungka liliu ngkida sira. Pekiri nu tau aretu bariamo malompe, baria sira manginsani patudu anu mamonso. Raulira, pensani sira mansumba rasi lako i pangulara atura agama.
6 Kamonsona, poagamata mangkeni rasi anu mabose, asala taposondoka apa anu ria si kita. 7 Lawi i kadongkata i dunia ei, baria ria anu takeni mai. Awetu mbui i pesolata luwu, baria ria anu ina takeni mesola. 8 Mewali, ane riamo pangkonita ai pesampita, sondomo. 9 Agaiana tau anu mampenoka sira mewali pebuku, paka tekelo sira mobabei dosa, tetaka sira i mampopengaa peundea nu rarara anu madaa. Peundea nu rarara etu baria mobundu, wule mangkeni sira i karugi. Kasopoana, tau sira anu mampenoka mewali tau pebuku manawu sira i rara dosa, duduuna mansumba rugi mpuu sira. 10 Lawi puu nu sinangka kamadaa iamo mampenombai doi, etumo anu moparia maisi mpangkana babeia anu madaa. Ria mpuu tau anu mangkadelo liliu sira doi, duduuna mensopi sira lako i pepotuura, ai narumpa sira mampopengaa kapari.
11 Agaiana iko Timotiu, batua ni Pue Ala iko. Nupakakarao katuwumu lako i ope-ope babeia anu ewa etu. Nupari-pari mampeulai babeia anu manoto. Mengkoru iko si Pue Ala. Nupakaroso pepotuumu si Kerisitu ai kamaasimu i singka rangamu. Sangangaa tetida iko ane narumpa nu kapari. Nupakaalusu pangkeniakamu i singka rangamu. 12 Inee nupawia pepotuumu si Yesu Kerisitu, ai nupakaroso pepotuumu mangula dala nu katuwu anu malompe duduuna kasae-saeana. Lawi etumo tunggaia ni Pue Ala moronde iko mewali topeguruNa, bona mansumba iko katuwu malompe anu baria mokasopoa. Naronde iko mewali topeguruNa, ai i lio nu tau wori nupatongawa pepotuumu si Pue Yesu.
13 Mewali, eimo patuduku si iko Timotiu. Kukiraka iko lolita i lio ni Pue Ala anu mopatuwu sinangkana, ai i lio ni Yesu Kerisitu anu mopadongka notoNa si Pontiu Pilatu. 14 Kukiraka iko lolita bona nupeulai ope-ope parenta ei ntena ria kamasalamu, duduuna dongka mpesola Pueta i Yesu Kerisitu, 15 i tempona anu napakanotomo ni Pue Ala, mangula peundeaNa. Batena Ia ngkida anu makuasa anu sintoto ratoia. Iamo Datu lako i ope-ope datu, Pue lako i ope-ope pue. 16 Batena Ia ngkida anu baria ria kamateNa. Meari Ia i rara kamabaa anu meawa mpii. Baria ria sadua anu pensani mogompilisi ba mampeita Ia, lawi baria Ia raita. Batena ngkida Ia anu sintoto rabila ai anu sintoto meparenta duduuna kasae-saeana. Amin.
Patudu i tau anu pebuku
17 I tau anu pebuku i rara dunia ei, nupatudu bona inee sira mampemabose, ai inee sira mesarumaka i anu-anu dunia, lawi anu-anu dunia pensani marugi. Aginamo mepotuu sira si Pue Ala anu mokiraka kita ope-ope pewati anu baria ria sokana. 18 Nukiraka sira lolita bona manoto liliu babeiara motulungi sira singka rangara, matono sira mokiraka ba apa-apa i rangara, ai malompe rarara. 19 Lawi ane awetu babeiara, pensani tauli: morompu sira anu-anura anu malompe i rara nu suruga, bona mansumba sira katuwu anu baria mokasopoa.
Patudu kasopoana ai tabea
20 Timotiu, i Pue Ala mampotuu iko mangkeni patudu anu manoto. Mewali, nupatoro lompe patudu etu bona ntena ria anu mobaliki. Nukaraosi sira tau anu mangkeni lolita anu baria ria tunggaiana, ai tau anu moewa iko ai patudura anu baria manoto. Raulira, ria kapandera, agaiana baria mamonso. 21 Kamonsona tau anu mangkeni patudu etu, mensopimo sira lako i pepotuura si Yesu Kerisitu.
I Pue mowati komi ope-ope.