Pewati ni Yako anu lako si PUE natibo-tiboka sira anana
49
1-2 Roo awetu, narondemo ni Yako anana sira, mpane mololita ia, nauli,“Pogulu ai pengkagompimode komi mai si aku,
bona niepe pololita nu tuamami i Saraeli,a
apa anu ina mewali si komi i saeona.
3 Iko Rube anaku anu torapowutu,
rosoku tongawamo i wotomu.
Ikomo anaku anu torapowutu, anu kupoana tongona mani karoso-rosoaku.
Nakeningka torapowutumu, iko anu teadai ai anu makuasa i olo nu poka-pokamu sira,
4 agaiana pangkeniakamu, ewa ue anu moili kaimba-imbaana,
baria nubuku morempeki peundea nu raramu.
Etumo mpane bariamo iko raimba anu teadai i olo nu pokamu sira,
lawi nuperou sadua towawineku anu kutenda kusamboko.
Mepakaea mpuu adamu.
5 I Simeo ai i Lewi, topopoka sira
ai maseke sira.
6 Baria ina kuula apa anu rabotusira,
ai baria mbui sira ina kuporangai i rara mpogulu-gulura,
lawi nakeningkamasekera, mepopate sira,
ai nakeningkamasilakara, motimpo sira japi.
7 Mangkasalaramo sira,
lawi maruminsi gaga kasodora.
Mangkasalaramo sira,
lawi maruminsi kamasekera.
Ina kugaa-gaa sira i sumalele tana Saraeli,
ai ina kusawu-sawu sira i olo nu tina ni Yako.
8 Iko Yehuda, ina monangi iko iwalimu,
pokamu sira ina motoia iko,
ai ina motumpa sira i liomu mengkoru si iko.
9 Iko ewa sambaa singa anu mangura mani:
roo ia mangkoni anu nasoko,
mesola mpesola ia lau i peariana,
ane maturu ia, ewa sambaa singa tinana,
baria ria anu pebai molike ia.
10 Ina mopatoro iko lai kadatua,
mpane pemuleamu ina meparenta liliu,
duduuna dongka sadua anu sintoto meparenta dongka kasae-saeana.
Tau sira anu lako i ope-ope kadatua, ina mangkeni sira popenombara si ia,
mpane mengkoru sira molingkudu i liona.
11 Malompe mpuu katuwu ni Yehuda, rasina mobonde maisi,
mpane melumbu kaisina powua nu anggorona,
duduuna puu nu kau anggorona, napotakai kalidena,
ai pesampina nabakosi ai ue anggoro.
12 Nakeningkamaisi nu anggorona,
matana mewali mawaa.
Nakeningkamaisina susu nu japina,
ngisina mewali mabula.
13 I Sebulo ina meari i wiwi nu tasi,
ai ina mewali sondaka kapala nu tasi.
Tompo nu tanana dongka i kota Sidon.
14 I Isakar, ewa sambaa kalide anu maroso,
anu moluku ante keniana.
15 Ane naita pearia etu malompe mpii, ai tanana marudu,
nataa bengona raposawirakai keniana,
mpane mobago mantimi ia, ewa sadua batua.
16 I Dan, ina mewali tau anu mobotusi kara-kara i kadatuana,
mpane pemuleamu ina mewali tau santina, anu ewa tina anu ntanina i Saraeli.
17 Ai ewa sambaa ule,
anu mangawu i wiwi nu dala,
anu moipo petilona,
anu motilo gasi nu dara,
mewali tau anu modara manawu tebolengkara.”
18 Ni se etu, mekakae i Yako, nauli, “O PUE, kupegia mani petulungiMu.” Mpane napapulo nauli,
19 “Iko Gad ina rabungka iko nu toperampaki,
agaiana ina nurampaki mpesola sira.
20 I Aser, melumbu mpii kaisina pangkonina anu malompe,
pangkoni anu sintoto rapoporora nu datu sira.
21 I Naftali ewa lagiwa lundara anu tepawia,
anana sira merae asa.
22 I Yusupu ewa sampuu kau anu maisi powuana,
anu tuwu i wiwi nu ue,
daana sira mendai moliungi rindi watu.
23 Nauda topepana moewa ia,
mewulai mpane mepana ngkalako,
24 agaiana melumbu mani karoso nu palena mepana,
lawi naporangai ia nu kuasa ni Pue Ala,
ai i Pue Ala anu makuasa anu kupenombai,
ewa sadua toporewu, Iamo anu mokadipuraka iko.
25 I Pue Ala anu napenombai nu tuamamu, Iamo anu motulungi iko,
i Pue Ala anu makuasa ina mowati iko,
mpane napariaka iko uda lako i langi,
mpane ue lako i lapi nu tana mai,
maisi pemuleamu ai pinatuwumu.
26 Pewati ni Pue Ala anu nadokomo nu tuamamu,
melumbu lako i perae nu bulu,
anu ria amimo, mepuu lako i pewali nu dunia,
kuperade bona ope-ope pewati etu, dongka mbui si iko,
ikomo anu teadai i olo nu ope-ope pokamu sira.
27 I Benyami ewa sambaa serigala anu maseke,
ane madondo mosoko ia pangkonina,
awetu sindulau eo, natibo-tibo apa anu nasoko.”
28 Ewa etumo i Yako mowati anana sira anu sampulu rodua, anu mewali ulububu nu toSaraeli sampulu rontina. Nawati sira, mangula apa anu sintoto si sira sadua ai sadua.
Peawili ni Yako lako baria mani ia mamate
29-30 Roo ia mowati anana sira, meawili ia i anana sira, nauli, “Bariamo masae ina mamatemo aku, mewali sangangaa nipaiwu wotowataku i talumbaa nu ulububuku sira, i rara balamba watu anu ria i bonde Makpela, mbai mataeo boea Mamre i tana Kanaan. Ni banimpia nibalukimo ni Burahima bonde etu, lako si Efron toHet, bona rapopewali talumba.* 31-32 Ni se etu i Burahima ai Sara rapaiwu, awetu mbui i Isaki ai i Ribka.* Ai ni se etu mbui i Lea nipaiwuku.” 33 Awetu i Yako roomo meawili i anana sira, maturumo ia i paturuana, mpane opemo inosana.