Wotowata ni Yako rapaiwu
50
1 Awetu naita ni Yusupu mamatemo tuamana, napolumbai tuamana natumangisi mpane naiki liona. 2 Roo awetu, naposawaaka ni Yusupu nu batuana sira anu mapande morampai tomate, bona morampai wotowata nu tuamana, ntena polo magoro. 3 Bago etu, mangkoni tempo iba mpulu eo, mangula adiwa saweweina tempo anu rapake morampai wotowata. Tempo ni Yako mamate, natumangisi ia nu toMasiri, pitu mpulu eo kasaena.4 Awetu liumo tempona metumangisi, mololita i Yusupu i tau anu mobago i kadatua, nauli, “Nipadongka tewaiku ei si datu, niuli, 5 ‘Lako baria mani mamate tuamaku, natudu aku modandi bona wotowatana kupaiwu i talumba anu rapatimamamo i tana Kanaan’, mewali etumo mpane kuperade bona napaliu aku ni datu lau mopaiwu wotowata nu tuamaku, roo awetu mesola mpesola aku mai.”
6 Mesono i datu nauli, “Niulika i Yusupu, bona laumo ia mopaiwu tuamana, mangula dandina i tuamana.”
7 Mewali lau mpuumo i Yusupu mopaiwu tuamana. Ope-ope topobago ni datu, tomana-tomana anu teadai, anu ria i tombi kadatuana, awetu mbui tomana-tomana anu teadai anu ria i tana Masiri, lau mbui sira mamporangai i Yusupu. 8 Ope-ope tau anu ria i tombi ni Yusupu, pokana sira ope-ope, lau mbui sira. Agaiana anakoi sira, ai pinatuwura rapalengira i Gosen. 9 Surudado anu mokareta ai anu modara, lau mbui sira. Etumo mpane maisi mpuu tau anu meula si Yusupu.
10 Awetu sira dongka i pearia nu tau mosepeka gandu, anu rasanga Goren-Haatad, mbai mataeo ue Yarade, maruminsi kawiorara, ai potumangisira wotowata ni Yako. Mewali ni tempo etu, nakira mani ni Yusupu tempo motumangisi wotowata ni Yako, pitu eo pitu mbengi kasaena. 11 Awetu raita nu toKanaan adiwa kawiorana rarara toMasiri ni tempo etu, mololita sira, raulira, “Mewiwiorai mpuu petumangisi nu toMasiri dou.” Etumo mpane pearia etu rasanga Abel-Misraim.a 12 Aweimo rababei nu ana ni Yako sira, mampeulai peawili nu tuamara si sira. 13 Wotowata ni Yako rakenira mpuumo lau i Kanaan, mpane rapaiwura i rara balamba watu i Makpela mbai mataeo boea Mamre, tana anu nibalukimo ni Burahima ni banimpia si Efron toHet, bona rapopewalira talumba. 14 Awetu i Yusupu roomo mopaiwu tuamana, mesolamo ia lau i Masiri simbela-mbela ai pokana sira, ai ope-ope toMasiri anu mangula ia lau mopaiwu tuamana etu.
I Yusupu mopakalene rara nu powutuna sira
15 Awetu mepalengimo tuamara, powutuna sira mololita, raulira, “Adiwa ane napairara kita ni Yusupu, mpane nasurungi babeiata anu madaa si ia ni banimpia?” 16 Etumo mpane motewai sira i Yusupu, raulira, “Lako baria mani mamate tuamamu, 17 natewai amimo ewa ei, ‘Sangangaa nuampuni kamasala nu powutumu sira ni banimpia.’ Kami ei tudua ni Pue Ala, anu napenombai nu tuamata, kiperade tulungi, nuampuni kowo kamasalaki si iko ni banimpia.”
Mewali awetu naepe ni Yusupu tewai nu powutuna sira etu, motumangimo ia. 18 Roo awetu, lau sira poka-pokana si ia, ai awetu sira dongka, molingkudu sira i liona, mpane raulira, “Timama kami mewali batuamu.”
19 Agaiana nauli ni Yusupu si sira, “Inee komi maeka. Baria aku i Pue Ala anu makuasa mosuku komi. 20 Naudapae nitunggai mobabei babeia anu baria malompe si aku, babeiami anu madaa ni banimpia etu, nabalikimo ni Pue Ala mewali kalompe i rara nu katuwu nu tau wori. 21 Inee komi maeka si aku, lawi ina kupatimamaka komi sinangka anu nipotuwu, duduuna dongka i anami sira i luwuna.” Awetumo i Yusupu mopakalene rara ai pekiri nu powutuna sira.
Kamate ni Yusupu
22 I Yusupu ai pokana simbela-mbela sira meari i tana Masiri. Tinuwu ni Yusupu sangatu sampulu mpae, mpane ia mamate. 23 Lako baria mani ia mamate, naita mani sira ana ni Efraim ai tumpu ni Efraim, ai mampaka mani mbui ia mokadipuraka ana ni Makir tumpu ni Manase. 24 Mololita ia i pokana sira, nauli, “Bariamo masae, ina dongkamo tempoku naronde ni Pue Ala, agaiana inee maeka rarami. I Pue Ala sangangaa monini komi ai mangkeni komi mensuwu lako i tana Masiri ei, lau i tana anu nidandika ni Pue Ala si Burahima, i Isaki ai i Yako. 25 Mewali modandi komi si aku, ane nanini komi ni Pue Ala mensuwu lako i tana ei, sangangaa nikeni wukuku mesola lau i tana Kanaan.” 26 Mewali tinuwu ni Yusupu sangatu sampulu mpae, mpane mepalengimo ia i tana Masiri. Wotowatana rarampai mpane raboli i rara nu lumu.