I Yako mowati i Efraim ai i Manase
48
1 Baria masae lako ni se etu, rabambarika i Yusupu, tuamana maruminsi kaduana, mewali lau ia mampeita tuamana, simbela-mbela ai anana anu rodua iamo i Manase ai i Efraim. 2 Awetu naepe ni Yako kadongka ni Yusupu sampoanakara, napari-pari mengkawangu mpane momeso i paturuana. 3 Mololita i Yako si Yusupu, nauli, “I Pue Ala anu makuasa, mampatongawamo wotoNa si aku i Lusa ai i se etumo Ia mowati aku.” 4 Mongkora Ia si aku, Nauli, “Ina Kupopemule-mule iko, bona pemuleamu sira ina Kupopewali maisi kadatua, ai tana ei ina Kukiraka pemuleamu sira ratumpuira, duduuna kasae-saeana.” 5 Napapulo mani ni Yako mololita, nauli, “Yusupu, anamu anu rodua i Efraim ai i Manase, anu rapoanaka sira i tana Masiri ei, lako baria mani aku dongka ni se ei, sira etu kupasimbela ngkida ai ana wotoku, simbela ewa i Rube ai i Simeo. 6 Ane ria mani pemuleamu i raoa lako si sira, bariamo kupasimbela ai ana wotoku, sira etu ngkida luwu kupoana woto. Sosorara luwu ina radokora lako si Efraim ai i Manase. 7 Mpane kubabei ewa ei, kukaendo liliu tinamu i Raheli. Tempoku mesola mai lako i Mesopotamia. Tinamu mepalengi i tana Kanaan, baria karao lako i Efrata, ai maruminsi kawioraku ni tempo etu. Mpane nipaiwukumo wotowatana i wiwi nu dala lau i Efrata.” Anu ei-ei rauli, Beteleme.8 Awetu naita ni Yako ana ni Yusupu aretu, napekune ni Yako si Yusupu, nauli, “Ima anakoi arei?”
9 Mesono i Yusupu, nauli, “Sira eimo anaku anu nakiraka aku ni Pue Ala i tana Masiri ei.” Mewali mololita i Yako, nauli, “Pakagompi sira mai si aku, bona kuwati sira.”
10 Nakeningkamatuanamo tinuwu ni Yako, etumo mpane bariamo ia gaga meita. Mewali napakagompimo ni Yusupu anakoi aretu si ia, nakalupui sira ni Yako mpane naiki. 11 Mpane mololita i Yako si Yusupu, nauli, “Mogalo saudi ka naduuna mani nu pekiriku ina momberumpa mani ai iko, bariamo, agaiana ei-ei nakenimpenini ni Pue Ala si aku, momberumpa mani kita, ai kuita mani mbui anamu sira.”
12 Roo awetu nadoa ni Yusupu anakoi aretu lako i tamboka nu tuamana, mpane ia molingkudu motumpa i lio nu tuamana. 13-14 Roo awetu, napakagompi ni Yusupu anana aretu i tuamana, i Efraim anu torapotoi mbai i kabeo ni Yako, mpane i Manase anu torapowutu, mbai kuana ni Yako. Agaiana, palena ni Yako napopombesapeda, pale kuanana naboli i wongko woo ni Efraim, mpane pale kabeona, naboli i wongko woo ni Manase.
15 Mpane, nawati i Yusupu sampoanakara, nauli,
“I Pue Ala anu napenombai ni Burahima tutuaku ai i Isaki tuamaku,
Iamo anu monini aku duduuna ei-ei.
16 Ia ewa malaeka anu mampatongawa wotoNa si aku,
anu mopawia aku lako i sinangka kapari.
Kuperade si Pue Ala
bona Nawati sira anakoi arei.
Kuperade si Pue Ala, bona anakoi arei,
anu mopaliliu kabosena sangaku, kabosena sanga ni Burahima, ai kabosena sanga ni Isaki.
Kuperade si Pue Ala, bona memule-mule sira,
ai maisi pemuleara i dunia.”
17 Baria malompe rara ni Yusupu mangita pale kuana nu tuamana, naboli i wongko woo ni Efraim, mewali napatoro pale kuana nu tuamana, ina napalimba lako i wongko woo ni Efraim, lau i wongko woo ni Manase. 18 Mpane mololita ia i tuamana, nauli, “Inee ewa etu, Uma. Eida anaku anu torapowutu, dampamode pale kuanamu i wongko woona.”
19 Agaiana baria naunde nu tuamana, mewali mololita tuamana, nauli, “Kuinsani mboto Yusupu, kuinsani mboto i Manase ina mabose kuasana, ai pemuleana mbui ina mewali sambua kadatua anu mabose, agaiana mabose mani kamakuasa nu toina mpane lako ia, ai awetu mbui pemulea nu toina etu, ina mewali sira luwu maisi kadatua anu mabose.” 20 Roo awetu, lako nawatida anakoi aretu, nauli,
“ToSaraeli ina mokabelai sangami
ane mowati sira tau,
ina raulira luwu:
‘Taperade si Pue Ala,
bona nawati iko ni Pue Ala,
adiwa ka Nawatina i Efraim ai i Manase.’”
Mewali ewa etumo i Yako mowati i Efraim ai i Manase. Ngkalina ngkida napopelumbu ni Yako pewatina si Efraim, mpane lako si Manase.