I Yako mampomberumpaka datu i Masiri
47
1-2 Mpane nakeni ni Yusupu lima dua pokana mampomberumpaka i datu, nauli, “Tuamaku ai pokaku sira lako i tana Kanaan mai, dongkamo, mangkeni sira dimba, towau, japi, ai sinangka anu-anura, ei-ei ria sira i tana Gosen.” Mpane napopainsanika i datu sanga nu pokana sira anu lima dua aretu.3 Napekune ni datu si sira, nauli, “Apa bagomi?”
Mesono sira, raulira, “Kami ei toporewu ewa ulububuki mai ni banimpia. 4 Mai kami meari i tana ei, lawi maruminsi kaoro i tana Kanaan, ai bariamo ria owo nakoni nu pinatuwuki. Ane pensani, ba nipaliu mbotoda kami meari i tana Gosen.”
5 Mewali mololitamo i datu si Yusupu, nauli, “Ei-ei tuamamu ai pokamu sira, riamo i se ei. 6 Nupasimbela ngkimo tana Masiri ei, ai tanami saduduami. Pogeaka sira meari i tana Gosen, pearia anu marudu mpii tanana. Ane ria tau anu matopa mokadipuraka pinatuwu, nitudu ia mokadipuraka pinatuwuku.”
7 I Yusupu mangkeni tuamana si datu. Mpane naperade ni Yako si Pue bona i datu nawati ni Pue. 8 Mpane napekune ni datu tinuwuna, nauli, “Sangkia tinuwumu?”
9 Mesono i Yako, nauli, “Tuaku komi, tuwumo aku sangatu tolu mpulu mpae i poliloa. Katuwuku buke kapari, ai ane kupasimbela ai tinuwu nu ulububuku sira, karao posisalana. Tinuwuku marede mpane lako tinuwura.” 10 Roo awetu i Yako mekakae si Pue, naperade bona i Pue mowati katuwu ni datu. Mpane ia metompa mopalengi i datu. 11 Lako ni se etu, natulungi ni Yusupu tuamana, pokana sira, napopeari i tana Masiri. Nakiraka sira ni Yusupu tana anu marudu mpii anu ria i tana Masiri etu, gompi i kota Rameses, anu rauli mbui tana Gosen, sintoto ai sawaa ni datu si ia mewali ratumpuira. 12 Mpane napariaka sira ni Yusupu pangkoni, mepuu lako i tuamana, powutuna sira ai poka-pokana.
Tempo oro
13 Ni tempo etu maruminsi kaoro, etumo mpane i sumalele tana baria ria tesumba pangkoni, mewali tau anu meari i tana Masiri ai i tana Kanaan maledemo sira nakeningkaorora. 14 Bela-belara mobaluki gandu, doi anu rapopobalukira gandu etu, nagulu ni Yusupu, mpane naboli i tombi kadatua. 15 Awetu opemo doi i tana Masiri, ai i tana Kanaan, toMasiri lau sira si Yusupu, mpane raulira, “Tua, kiraka kami pangkoni! Inee kami nupogeaka mamate malaluara. Lawi doiki opemo.”
16 Nasonoi sira ni Yusupu, nauli, “Ane opemo doimi, nikiraka aku binatami nipopontolosi pangkonimi.”
17 Mewali rakirakara i Yusupu binatara, mpane nakiraka sira ni Yusupu pangkoni. Binata anu rakenira rapopontolosira pangkoni ewa: dara, dimba, towau, japi, ai kalide. I rarana sampae etu, nakiraka sira ni Yusupu pangkoni rantolosira ai binatara.
18 Karompaena, dongka mbuimo sira si Yusupu, mpane raulira, “Tua, baria ria anu kiwunikai si komi, doiki opemo. Ope-ope binataki opemo nitumpui. Apa manipae anu ina kikiraka komi, kipake montolosi pangkoni, anu ria batena ngkidamo wotoki ai tanaki. 19 Inee kami nupogeaka mamate! Inee nupogeaka bondeki baria tetudai. Wotoki ai tanaki baiarimode ai gandu. Tanaki kisusu si datu, mpane wotoki kisusu napopewali ni datu batuana. Kiraka kami gandu bona mangkoni ngkia kami ai tinuda bona kisawu i bondeki!”
20 Nakeningkamaruminsina tempo oro ni tempo etu, ope-ope toMasiri mampobalu sira tanara si datu, etumo mpane ope-ope tana i Masiri i datumo tumpuna. 21 Ope-ope toMasiri napopewali ni Yusupu batua i sumalele tana Masiri. 22 Batena tana nu tadulako menomba sira, baria nabaluki ni Yusupu, lawi baria rapobalura, lawi sinangka anu rapotuwu-tuwura, napatimama amimo ni datu. 23 Nauli ni Yusupu i tau wori etu, “Bona niinsani, wotomi ai tanami, kubalukikamo i datu, mewali eimo tinuda anu ina nituda i bondemi. 24 Tempomi mepae, sangangaa nikiraka i datu lima parasee wua nu tuda-tudami. Labina lako i se etu, pensani niala, bona nipotinuda mpesola ai nikoni sampoanakami.”
25 Mesono tau wori, raulira, “Ope-ope anu niuli, kiuli maisi kalompena, lawi nutulungimo kami lako i kamaoroki ai mabula raraki mewali batua ni datu.”
26 Mewali nababeimo ni Yusupu sambua atura i tana Masiri, iamo lima parasee wua nu tuda-tuda, sangangaa rakirakara i datu. Atura anu nababei ni Yusupu etu, duduuna ei-ei rapopolumako mani nu toMasiri. Wule tana nu tadulako menomba ngkida sira, anu baria natumpui ni datu.
Peawili ni Yako
27 Ewa etumo toSaraeli meari i tana Masiri, i sambua tana anu rasanga, “Gosen.” Ni pearia etu, mewalimo sira pebuku ai kalalaua maisimo pemule-muleara. 28 I Yako tuwu mani i tana Masiri sampulu pitu mpae kasaena, mewali tinuwu ni Yako ni tempo etu, sangatu iba mpulu pitu mpae. 29 Awetu ina opemo inosana, narondemo i Yusupu mpane napololitaka, nauli, “Ane nupokaasi aku, boli mai palemu i patua nu timpuku mbai i lio, mpane mosumpa iko si aku, ane mamate aku luwu, baria aku ina nupaiwu i tana Masiri ei. 30 Lawi kuunde rapaiwu i talumba nu ulububuku sira, etumo mpane sangangaa nukeni wotowataku mensuwu lako i tana Masiri ei, mpane nupaiwu aku i talumba nu ulububuku sira.”
Mesono i Yusupu, nauli, “Ina kupeulai apa anu nasawaaka aku ni uma.”
31 Mololita i Yako, nauli, “Posumpamode si aku.” Mewali mosumpa mpuumo i Yusupu i tuamana. Roo awetu, motumpa i Yako i paturuana mbai woo, mpane ia mekakae menomba si Pue Ala.