I Yako sampoanakara melimba lau i tana Masiri
46
1 Nakadipuraka ni Yako ope-ope anu-anuna, mpane sira mangoka. Awetu sira dongka i boea Berseba, nasusu popenombana si Pue Ala anu napenombai nu tuamana i Isaki. 2 Awetu kawengimo, mampatongawamo i Pue Ala si ia mpane meronde, Nauli, “Yako, Yako!”Mesono ia, nauli, “Ei mboto aku, Pue.”
3 Mololita i Pue Ala si ia, Nauli, “Aku i Pue Ala anu napenombai nu tuamamu. Inee iko maeka lau i tana Masiri. Ina Kupakaisi pemuleamu sira, duduuna mewali santina tau anu mawori si dou. 4 Baria iko ina Kukalambasi lau i tana Masiri, duduuna Kukeni mpesola sira pemuleamu mai i tana ei, ai baria iko ina napalengi ni Yusupu duduumu mamate.”
5 Roo awetu, rapopemponeramo tuamara, towawinera ai anara i kareta anu nipakatuka sira ni datu, lako i tana Masiri, mpane mangokamo sira lako i boea Berseba. 6 Rakenira mbui pinatuwura ai sinangka anu-anura anu nisumbara ni tana Kanaan, mpane mangokamo sira ope-ope pemulea ni Yako lau i tana Masiri, 7 iamo anana, tumpuna sira, malompe tomoane, awetu mbui tumpuna sira towawine.
8 Pemulea ni Yako anu mangoka lau i tana Masiri iamo:
9 I Rube anana anu torapowutu, ai ana ni Rube sira iamo:
I Heno, i Palu, i Hesron, ai i Karmi.
10 I Simeo ai anana sira iamo:
I Yemuel, i Yamin, i Ohad, i Yakhin, i Sohar, ai i Saul, anana anu i sambokona toKanaan.
11 I Lewi ai anana sira iamo:
I Gerson, i Kehat, ai i Merari.
12 I Yehuda ai anana sira iamo:
I Sela, i Peres, ai i Sera. Agaiana ana ni Yehuda anu rodua i Er ai i Onan, mepalengimo sira tempora mani i tana Kanaan. Ana ni Peres sira iamo: i Hesron ai i Hamul.
13 I Isakar ai anana sira iamo:
I Tola, i Pua, i Ayubi, ai i Simron.
14 I Sebulo ai anana sira iamo:
I Sered, i Elo, ai i Yahleel.
15 Ope-ope sira etu, ana ni Yako si Lea anu rapoanaka i Mesopotamia, ai i Dina anana anu towawine. Kaworira tolu mpulu tolu dua.
16 I Gad ai anana sira iamo:
I Sifyon, i Hagi, i Syuni, i Esbon, i Eri, i Arodi, ai i Areli.
17 I Aser ai anana sira iamo:
I Yimna, i Yiswa, i Yiswi, ai i Beria, mpane pokara towawine i Sera. Ana ni Beria i Heber ai i Malkiel.
18 Ope-ope sira aretu, pemulea ni Yako si Silpa, towawine anu nikiraka ni Laban si Lea napobatua, kaworira sampulu aono dua.
19 I Raheli ai anana sira iamo:
I Yusupu ai i Benyami.
20 Ana ni Yusupu i tana Masiri, rodua sira iamo:
I Manase ai i Efraim anana si Asnat. I Asnat ana ni Potifera anu motadulakoi tombi penombaa nu toMasiri i kota On.
21 I Benyami ai anana sira iamo:
I Bela, i Beker, i Asibel, i Gera, i Naama, i Ehi, i Rosi, i Mupim, i Hupim, ai i Ared.
22 Etumo pemulea ni Yako si Raheli, kaworira sampulu iba dua.
23 Mpane i Dan ai anana iamo:
i Husim.
24 I Naftali ai anana sira iamo:
I Yaseel, i Guni, i Yeser, ai i Syilem.
25 Pitu dua aretu, ana ni Yako si Bilha, towawine anu nikiraka ni Laban i Raheli napobatua.
26 Pemulea ni Yako anu lau i Masiri, kaworira aono mpulu aono dua baria mani tepesua maniana sira. 27 Ana ni Yusupu anu rapoanaka i Masiri rodua sira, mewali i Yako ai pemuleana anu dongka i tana Masiri, pitu mpulu dua tau.
I Yako sampoanaka i tana Masiri
28 Awetu ina dongkamo sira i tana Gosen, natudu ni Yako i Yehuda, bona moilodo lau moronde i Yusupu, bona mai ia mampomberumpaka tuamana i tana Gosen. 29 Mewali memponemo i Yusupu i kareta, mpane laumo ia mampomberumpaka tuamana i tana Gosen. Awetu sira momberumpa, nakalupui ni Yusupu tuamana, mpane masae ia motumpa i golopi nu tuamana, motumangisi tuamana. 30 Mololita tuamana si ia, nauli, “Ei-ei bariamo aku menonso mamate, lawi kuitamo iko ai kuinsanimo katuwumu mani.”
31 Mololita i Yusupu i ope-ope poka-pokana anu ria i se etu, nauli, “Sangangaa lau aku si datu, kupopainsanika ia, ope-ope poka-pokaku anu meari i tana Kanaan, dongkamo sira i Masiri. 32 Ai ina kuulika ia, komi ei bagomi toporewu dimba ai japi, ai nikenimimo mai pinatuwumi ai sinangka anu-anumi. 33 Ane naronde komi ni datu, mpane napekune apa bagomi, 34 mesono komi ai niuli, ‘Kami ei topokadipuraka pinatuwu, mepuu lako kokoi mani kami, simbela ai ulububuki mai.’ Mewali ane ewa etu pesonomi, ina natudu komi meari i tana Gosen, lawi toMasiri rapokarikara mampoguluka toporewu.”