Napololita ni Yusupu ima kamonsona wotona
45
1 Ni tempo etu, bariamo nabuku ni Yusupu morusuka rarana, mewali natudu sira tauna anu ria i se etu, bona mensuwu sira lau i raoa, bona pensani ia mampololitaka pokana sira ima kamonsona wotona. 2 Awetu opemo sira mensuwu lau i raoa, motumangimo ia masisimbuku, ai nakeningkamasimbukuna potumangina, mewali toMasiri anu i raoa sira raepera potumangina etu, etumo mpane apa anu mewali etu, tebambari dongkamo i tombi kadatua. 3 Mololita i Yusupu i pokana sira, nauli, “Aku ei i Yusupu. Tuwu manipae i uma?” Raepe nu pokana pololitana ewa etu, mewali maruminsi kaekara, ai baria rainsanira kaapana anu ina rapoposonoira i Yusupu. 4 Mpane nauli mbui ni Yusupu, “Pengkagompimode komi mai.” Mengkagompi sira, mpane napololitaka sira, nauli, “Aku i Yusupu, anu nipobalumimo i toMasiri. 5 Inee komi maeka ba mampenonsoi babeiami nakenimpampobalumi aku. Kamonsona i Pue Alada anu mangkeni aku mai i se ei, mampeilodongi komi, bona tetulungi ngkia tau wori. 6 Ei-ei lako karompaena tempo oro, lima mpae mani kasaena tau baria pensani mantuda-ntuda ai mampepae wua anu ratuda. 7 Nakenimo mai aku ni Pue Ala mampeilodongi komi, bona mokadipuraka komi, ai babeia ni Pue Ala anu baria mesua i pekirita, bona tuwu ngkia komi ai pemuleami i luwuna. 8 Mewali kamonsona, baria komi mpane aku ria i se ei, agaiana i Pue Ala saduduaNa. Napopewalimo aku, motadulakoi ope-ope nu topoparenta ni datu i tana Masiri ei, mpane makuasa aku mokadipuraka tombi kadatua ni datu ai i sumalele tana Masiri ei. 9 Ei-ei pesolamode komi maliga lau mampomberumpaka i uma, mpane nipadongka si ia, aku i Yusupu anana anu mololita ewa ei, ‘Napopewalimo aku ni Pue Ala mewali tau anu makuasa i sumalele tana Masiri, maligamo mai i uma.’ 10 I uma pensani meari i tana Gosen gompi si aku, malompe ana ni uma sira, awetu mbui tumpuna, dimba, towau, japi, ai ope-ope anu-anu ni uma. 11 Ane i uma meari i tana Gosen, pensani i uma kukadipuraka. Lima mpae mani tapolumakoi tempo oro, ai i rarana lima mpae etu, kupari-pari bona i uma sampoanakara ai pinatuwuna, baria ria kaparira. 12 Ei-ei komi saduduami anu mangita, awetu mbui ewa iko Benyami, aku ei i Yusupu baria ba ima. 13 Nipadongka i tuamata, aku ei tau anu makuasa i Masiri ei, mpane nupololita sinangka anu niitamimo. Mpane nikenimode ia mai maliga.”14 Roo awetu, nakalupui toina i Benyami, mpane motumangi ia, awetu mbui i Benyami motumangi ia mokalupui i Yusupu. 15 Tongo ni Yusupu motumangi, nakalupui sira ope-ope pokana mpane naiki. Roo awetu, lako mepuuda sira pokana mololita ai ia.
16 Awetu raepe i tombi kadatua, bambari kono i kadongkana sira poka ni Yusupu, datu ai topobagona sira i tombi kadatua etu, matono sira. 17 Mewali mololita i datu si Yusupu, nauli, “Tudu sira pokamu aretu, mobua gandu i kalidera mpane mesola sira lau i tana Kanaan, 18 bona lau mai radoara tuamamu, sambokora ai anara, mpane sira melimbamo mai i se ei. Ina kukiraka sira tana anu marudu mpii anu ria i tana Masiri, bona malompe pansumba-sumbara lako i tana etu. 19 Nutudu mbui sira mangkeni lau kareta, bona rapemponei mai nu towawinera ai anara anu kokoi mani, ai mangkeni mai tuamamu. 20 Ineemo rapekirira ane ria anu-anura anu baria pensani rakenira mai, lawi apa anu malompe mpii anu tesumba i tana Masiri ina ratumpuira.”
21 Apa anu nauli nu datu etu rapeulaira. Nakiraka sira ni Yusupu basangkia kareta, ai bokura i dala mesola. 22 Nakiraka mbui sira ni Yusupu sadua-sadua santau pesampi anu mabou mani, agaiana i Benyami, nakiraka ia ni Yusupu tolu atu doi pera mpane lima ntau pesampi anu mabou mani. 23 Napakatuka tuamana rompulu mbaa kalide: sampulu mbaa, rapopangkenira anu-anu anu malompe mpii anu ria i tana Masiri, mpane sampulu mbaa rapopangkenira gandu, roti, ai pangkoni anu ntanina anu rakonira i dala tempora melimba mai i tana Masiri. 24 Lako baria mani sira mangoka, napololitaka sira ni Yusupu, nauli, “Inee komi mombekarumpui i dala.” Roo awetu, napopangokamo sira ni Yusupu.
25 Mewali mangokamo sira lako i tana Masiri, mesola sira lau i tana Kanaan i tuamara. 26 Awetu sira dongka i tuamara, rapololitakara tuamara, raulira, “Tuwu mani i Yusupu. Makuasa ia i sumalele tana Masiri.” Naepe ni Yako pololita nu anana aretu, mawuli rarana, lawi baria napotuu apa anu nauli nu anana sira.
27 Awetu rapololitara i tuamara ope-ope anu nipololita ni Yusupu si sira, ai awetu naita nu tuamara kareta anu nipakatu mai ni Yusupu, bona mangkeni ia lau i Masiri, lako napotuuda apa anu rauli nu anana sira. 28 Mpane mololita ia, nauli, “Anaku i Yusupu tuwu mani! Wule etuda peundeaku! Sangangaa lau aku i tana Masiri mampomberumpaka ia, lako baria mani aku mamate.”