Panginua ni Yusupu i rara nu karu ni Benyami
44
1 Tongora i rara nu tombi ni Yusupu mani, naposawaakamo ni Yusupu tadulako topokadipuraka nu tombina, nauli, “Isiimode karu nu tau aridou ai gandu sadiwa pebukuara mangkeni, mpane nuunsa doira sadua-sadua i rara nu karura, i wongko nu gandura. 2 Mpane nuunsa mbui panginua peraku i rara nu karu nu toira anu torapotoi, simbela-mbela ai doi anu napake mobaiari ganduna.” Sawaana etu naula nu toperora i tombina etu. 3 Ewa neilena madondo-dondo mpii, i Yusupu mogaa ai pokana sira, mpane mangokamo pokana sira mangkeni kalidera. 4 Agaiana lako baria mani sira karao lako i kota etu, naparentaimo ni Yusupu tadulako nu topokampai tombina, nauli, “Wulai maliga tau aridulau, ane nusumbamo sira, nuulika sira, mangkiada mpane lompe anu rakiraka komi, nisurungi ai babeia anu madaa? 5 Mangkiada mpane nipanangka panginua pera nu tuaku? Panginua etu napake manginu, ai napake mbui mampebara.a Maruminsi babeiami anu madaa!” 6 Awetu nasumbamo sira poka ni Yusupu aretu, napololitamo apa anu naposawaaka ni Yusupu si ia. 7 Mewali mesono sira, raulira, “Tua apa tunggaiamu? Baria kami pebai mobabei ewa etu! 8 Tua nuiinsani mboto, mogaloda doi anu nisumbaki ni wongko nu karuki, nipopesolakimo si komi, mewali baria mesua i akala, ane mopanangka mani kami pera ba bulawa lako i tombi ni gubernur! 9 Ane ria sadua lako si kami nipansumbai parewa etu, pogeakamode ia rasuku duduuna mamate, ai kami mewali batuamu.” 10 Nauli nu tadulako nu toperora i tombi ni Yusupu etu, “Baria mboto mangkia, agaiana ima anu kupansumbai panginua pera etu, ia ngkida anu mewali batuaku, anu ntanina pensani pulo.” 11 Mewali sadua-sadua sira, rapopendolura maliga karura, mpane rabungkasira. 12 Naparesa nu topokampai tombi ni Yusupu etu karura sadua-sadua, mepuu lako i karu nu powutuna anu torapowutu mpii, duduuna dongka i karu nu toira anu torapotoi mpii. Mewali panginua pera etu, nisumbana ni rara nu karu ni Benyami. 13 Powutuna sira maruminsi kawiorara, etumo mpane rasepa-separa badura. Mewali sadua-sadua sira rabuara keniara i kalidera, mpane sira mesola mpesola i kota. 14 Awetu i Yehuda ai pokana sira dongka i tombi ni Yusupu, rasumbara mani i Yusupu i tombina, mewali molingkudu sira mpane motumpa moadai ia. 15 Mololita i Yusupu si sira, nauli, “Mangkiada mpane ewa etu babeiami? Bariapae niinsani, tau anu ewa aku ei, kuinsani mampebara babeia anu baria malompe?” 16 Mesono i Yehuda, nauli, “Baria kiinsani kaapana anu ina kiuli, baria pensani kami mebesoi, ba kiuli makono si kami. Nabungkasimo ni Pue Ala babeiaki anu baria malompe. Mewali ope-ope kami ei mewalimo batuamu, baria wule anu rapansumbai panginua pera etu ngkida.” 17 Nauli ni Yusupu, “Baria! Baria kuunde mobabei babeia anu ewa etu! Anu rapansumbai panginua pera etu ngkida anu ina mewali batuaku, anu ntanina pensani mesola i tuamami.”I Yehuda mamperurui i Benyami
18 Roo awetu, mengkagompi i Yehuda si Yusupu mpane ia mololita, nauli, “Komi anu kupeampui inee aku nukarumpui, ane pensani, mololita mani aku. Lawi i tua simbela ai datu. 19 Kami ei nipekunemimo niuli, ‘Ba, ria mani tuamaki ba pokaki anu ntanina?’ 20 Mesono kami kiuli, ‘Tuamaki matuamo, mpane toiki rapoanaka i katuaanamo tinuwu nu tuamaki. Powutu nu toiki anu santawuni ai ia, mepalengimo. Mewali ei-ei ia saduduanadamo anu tuwu, etumo mpane maruminsi ka napokakaiana nu tuamaki ia.’ 21 Naperade ni tua si kami, bona kikeni mai toiki, bona nuita toiki etu. 22 Mewali ni tempo etu mesono kami, kiuli, ‘Baria ia pensani kikeni mai, lawi baria ia pensani mampogaaki tuamaki, lawi ane mampogaaki ia tuamaki, tuamaki ina mamate.’ 23 Agaiana nuulikada kami, ‘Baria komi pensani mampomberumpaka aku, ane baria mai nikeni toimi etu.’ 24 Awetu kami mesola i tuamaki, kipololita apa anu nuulika kami.”
25 Roo awetu, natudu mpesola mbuimo kami nu tuamaki, mai mobaluki pangkoni. 26 Mesono kami, kiuli, “Baria kami pensani lau sidulau, lawi baria kami pensani mampomberumpaka gubernur i Masiri, ane baria kikeni toiki anu torapotoi mpii. Pensani kami lau ane lau mbui ia. 27 Mewali mesono tuamaki, nauli, ‘Niinsani mboto anaku si Raheli rodua ngkida sira. 28 Anu torapowutu napalengimo aku. Manotomo ka nasokonamo nu binata anu maseke, lawi duduuna ei-ei bariamo ia kuita. 29 Mewali ane toimi anu torapotoi ei mbuimo niperade si aku nikeni, mpane ba adiwa mbotoda luwu ia, kawiora rara anu nipariaka aku etu, ina kupomate, lawi aku ei matuamo.’ 30-31 Etumo mpane, ane mesola luwu kami i tuamaki, mpane baria kami mangkeni toiki etu, manotomo kamatena tuamaki. Lawi maruminsi ka napokakaiana, ai anu morosongi katuwuna, toiki etu ngkida. Tuamaki matua mpiimo, mewali ane kiparia kawiora nu rarana, kawiorana etumo anu mangkeni ia duduuna mamate. 32 Apa mani ni tempo etu, pangkeniki mai nu toiki etu, modandi aku i tuamaki, niuliku ane baria ia kukeni mpesola i tuamaki ai kalompe-lompe, aku anu mamposurunga rasuku duduuku mamate. 33 Mewali merade tulungi aku si tua, ane pensani akumo anu meari i se ei mewali batuami, mopasuru aku toiki ei, pogeaka kowo ia mesola simbela-mbela ai powutuna sira. 34 Adiwapae kapensanina aku mesola i tuamaki, ane toiki etu baria ante ia mesola? Baria luwu kubuku mangita tuamaki mamate nakeningkawiorana rarana.”