Powutu ni Yusupu karombelana lau i Masiri simbela-mbela ai Benyami toira
43
1-2 Tetambaimo karuminsina tempo oro i tana Kanaan, mewali awetu opemo gandu anu nikenira lako i tana Masiri mai, mololitamo i Yako i anana, nauli, “Lau mbuimo komi mobaluki gandu i tana Masiri.”3 Agaiana, nauli ni Yehuda i tuamana, “Napopaingaaka mpii kami nu gubernur i tana Masiri, nauli, ‘Baria komi pensani mampomberumpaka aku, ane toimi etu, baria nikeni mai.’ 4 Ane napaliu ni uma toiki, kikeni lau i tana Masiri, lako madotada kami lau mobaluki pangkonita. 5 Agaiana ane baria napaliu ni uma i Benyami kikeni, baria kami madota lau, lawi naulimo nu gubernur i tana Masiri, baria kami pensani mampomberumpaka ia, ane baria kikeni toiki.”
6 Niuli ni Yako, “Mangkiada mpane nipakapari mpii aku? Niulikamida tau etu, kariana mani toimi.”
7 Mesono sira, “ToMasiri etu mampepumpu liliu kono si kami ai kono si kita santina, niulina, ‘Tuwu manipae tuamami? Babila ria mani toimi tomoane anu ntanina?’ Etumo mpane tepaso kami mosonoi ope-ope pampekunena. Baria naduu nu pekiriki ina natudu kami nu gubernur i tana Masiri dou, bona mangkeni kami toiki etu.”
8 Nauli ni Yehuda i tuamana, “Paliumode toiki etu kikeni lau. Aku anu mamposurunga ane ba adiwa luwu pewalina toiki. Ei-ei ina mangokamo kami, bona ntena ria sadua lako si kita anu mamate malaluara, malompe kami awetu mbui iko uma, ai anaki sira. 9 Akumo anu mamposurunga duduuku mamate, ane baria ia kikeni mpesola luwu i rara ngkalompe-lompe. 10 Ane kekasaliu nupaliu kami lau ante toiki, kamonsona kekarombelanamo kami mesola.”
11 Nasonoi sira nu tuamara, nauli, “Ane lawi ewa etu peundeami, nikenimode apa pansumba-nsumbata anu malompe mpii lako i tana ei, niunsa i karumi, mewali popedupami si gubernur etu, ewa dupa, tinasa, nompi, beau ai wua nu saleka. 12 Nikeni mbui doi rombela kaisina lako i doi anu nikenimi naliu, lawi doi anu nisumbami mpesola i rara nu karumi etu, sangangaa nipopesola. Tainsanidapae babila sala mpamboli mbotoda sira. 13 Nikenimode toimi etu, ai polo lau mpesola komi lau mampomberumpaka gubernur i tana Masiri etu. 14 Taperade si Pue Ala anu makuasa, bona gubernur etu mampokaasi komi, ai madota ia mampopesola i Benyami ai i Simeo si kita. Kono si aku ei, ane lawi napalengimo aku nu anaku sira, tapadiwakanapae.”
15 Roo awetu, poka ni Yusupu mangokamo sira lau i tana Masiri simbela-mbela ai i Benyami. Kalaura ni tempo etu, mangkeni sira pedupa ai doi rombela kaisina, lako i anu nikenira ni mpolinguruna. Awetu sira dongka i tana Masiri, lau mpuumo sira mampomberumpaka i Yusupu. 16 Awetu naita ni Yusupu i Benyami ai powutuna sira, naposawaakamo tadulako nu topokadipuraka tombina, nauli, “Nukeni sira tau aridou i tombiku, lawi ina mangkoni kami simbela-mbela, togo eo ei. Nusambale sambaa binata, ai nudaka nupakatomo pangkoni etu.”
17 Toperora i tombi etu mampopolumakomo sawaa etu, mpane poka ni Yusupu nakenimo lau i tombina.
18 Awetu sira rakeni mesua i rara nu tombi ni Yusupu, wulunga sira, mpane mololita sore kapa sira, raulira, “Rakeni kita i se ei nakeni nu doi anu nisumbata i rara nu karuta kamaita ni banimpia. Tau ei ina mosoko kita, mpane radoara kalideta, mpane rapopewalira kita batuara.” 19 Etumo mpane, mengkagompi sira i toperora i tombi ni Yusupu, i boboka nu tombi etu, rapololitakara, raulira, 20 “Merade tempo kami, Tua, ba pensani kami mololita. Ni banimpia, sambelamo kami mai mobaluki pangkoni. 21-22 Agaiana tempoki mesola, ai awetu kami mosambengi i dala, nibungkasiki karuki, tingkarada kami mangita doi anu nipopobaiariki gandu, nisumbaki mpesola i bobo nu karuki baria makura imbana, ba ima anu mamboli mpesola doi etu. Mewali doi anu nisumbaki etu, nikeniki mpesola mai, simbela-mbela ai doi anu ina kipopobaluki mpesola pangkoniki.”
23 Mesono tadulako nu toperora i tombi etu, nauli, “Inee komi maeka ba masusa rarami. I Pue Ala anu nipenombai, ai anu napenombai mbui nu tuamami, Iamo anu mounsa doi etu i rara nu karumi. Doi anu nipopobaiarimimo ni banimpia, nidokokumo.”
Roo awetu, rakenimo i Simeo si sira, 24 mpane rapopesua sira i rara nu tombi ni Yusupu. Nakiraka sira ue rapopobakosira paara, mpane kalidera rapakoni. 25 Rapopainsanika sira, kaina mangkoni simbela sira ai i gubernur etu, mewali rapasilolongaramo popedupara, ane dongka mai i gubernur mampomberumpaka sira togo eo etu.
26 Awetu i Yusupu mesua i rara nu tombina, molingkudu sira motumpa i liona, mpane rasusuramo popedupara etu si ia. 27 Napekune sira ni Yusupu, nauli, “Ni banimpia nipololitamimo si aku kono i tuamami anu matuamo etu. Mewali, adiwa tuamami? Malompe-lompe mbotopae ia?”
28 Motumpa sira, mpane rasonoira raulira, “Batuamu, tuamaki malompe-lompe mboto ia, ai tuwu mani.”
29 Awetu naita ni Yusupu i Benyami toina anu santawuni ai ia, mekune ia, nauli, “Mewali eimopae toimi anu torapotoi mpii, anu nipololitami si aku? Taperade bona i Pue Ala mowati iko anaku.” 30 I Yusupu ina baria nabuku motaha kabilana ai pampokaasina toina, etumo mpane napalengi sira mpane mesua ia i rara nu lontana mpane motumangi.
31 Roo ia motumangi, nabakosi liona, mpane mensuwu ia lako i rara nu lontana mai, agaiana baria napatongawa si sira kamabilana mpane naposawaaka batuana, nauli, “Pasilolongamode pangkonira.” 32 I Yusupu tepatani meja pangkoniana, lako i meja nu pokana sira, awetu mbui sira toMasiri anu ria i se etu, tepatani mbui meja pangkoniara, lawi toMasiri baria pensani mangkoni simbela-mbela ai toIbrani, lawi rapokarikara ane mogulu mangkoni ai toIbrani. 33 Meja nu poka-pokana mombelio ai meja pangkonia ni Yusupu, mpane momeso sira modede-dede mangula pombeunsu nu tinuwura mepuu lako i torapowutu, duduuna dongka i torapotoi mpii. Awetu raitara pokadipuraka etu, mombetotoki sira sadua ai sadua ai mawuli rarara.
34 Pangkoni anu raroraka sira, lako i meja ni Yusupu, agaiana i Benyami raroraka pangkoni lima mbela kaisina lako i powutuna sira, mpane mangkoni ai manginumo sira sukana pebukuara sadua ai sadua.